Psalms 144

Yook 144

Dewid ye yook.

1 Yariman ne aromkonombon yaningko kankoonem.
Yembed ana nangmi dowad kedmengkawoon,
ana nangmi kedmengki korem kui.
2Ye kuu mimyob dowaken keewi ye God angkon ne aromne angkumonimbon,
ye kuu ne aromkonoyiib dobirimbon angkon ne nen arewa yaa burudande angka kowi ye karub,
ye kuu ne dorondari ye karub angkon ye kukbimaanbon aom doriin,
kwane yembed ambibkin yena kuu ne dabderem yiri kerundimaan kui.
3O Yariman, nimakarub kuu kaneyakob eb kuu yi yaa oone doreeb?
Yi dana kuu kaneyakob eb kuu yi yaa meenmo doreeb?
4Karub mimim yi dobiri ye weeb kuu eb yaambed inum koni mimo areb kumbedmo.
Yi kuu ayari on kuruwak dewene burudandemoon areb barang darewoobban.
5O Yariman, eb Eweniib ambidiib kuu biringke yiri kamene.
Kwane aangko aangko kuu angkorondebko amarengiib dembok.
6Imak kuu ben nongkobeneb bondan kuu bokne daware buyokbayok kerunde.
Eb ana ben barambereneb yi kuu yenbandebko kirokmone winime.
7Eb amaan ari kumbed eb dingki yireneb,
ok darewoowiib noroddaniib yaambed
ne kuu nen burudande angka kowe.
8Yi mongkodkono kuu dudanabimbed yukne diiroon,
kwane yi dingki wiwi kuu aadidmi awaan.
9O God, ne kuu eb yaa yook yeeb wingkaniin,
eb yaa nong angko angkoyiib ye laiya wangke wingkaniin.
10Yembed kingdan yaa kuu ana nangme burudande dori bangkandimaan,
kwane yembed ye dememan Dewid kuu arewa kamenabidan yi kerewang yaambed nen burudande angka kowimaan.
11Ne kuu noroddan yaambed nen burudande angka kowe.
Yi mongkodkono kuu dudanabimbed yukne diiroon,
kwane yi dingki wiwi kuu aadidmi awaan.
12Nub karub dana meed kuu ongmendebko
kab amunmo dembe kainimaan areb kewed kerime.
Nub nima dana meed kuu ongmendebko
king ye ambiwoom dodkono manimanandeb ongmiwen areb kwane koyu kerime.
13Nub animan nongkobimbon ambib ben ongmendebko
animan mimim korem kuu diirok.
Nub sibi kuu ongmendebko
nub okad arimbed tausen tausen yemooniib kerime.
14Nub oksen kuu ongmendebko
mana yemooniib kerenib mana bobniyiibban yiminmo kerime.
Bondanbed nub awingke ben wini kuu kebene.
Nub kambong aom kuu miin yiminban kere baande komkiyiibban kerok.
15Kwamune keriwendan kuu amun kerundoon,
kaneya yi God kuu Yariman kuu amun kerundoon kii!
Copyright information for `YON