Psalms 145

Yook 145

God yaningko kankooni ye yook Dewidbed wongkoon.

1Ne God ne King, eb kubebde eb kuu darewoob arimbed andaniin,
kwane ewaningko kuu aron korem korem kankoonaniin.
2Aronki mimim korem ewaningko kankoonaniin,
kwane eb kubebde eb kuu darewoob arimbed andaniin aron korem korem.
3 Yariman kuu darewoob arimbed, ye aningko yaamo kankooni yeman.
Ye inamen kuu darewoob arimbed kowe, karub mim kanembed kaadkerunindeban.
4Awodkiya awaana kumbed eb ambangkanabi yaa kube kankooni weng kuu yi dana meed yaa dakmenabaniib,
kwane yimbed eb kamenabi aromkonomo ye weng kangkon dakmenabaniib.
5Yi kuu eb dobiri manimanandeb ye nambiri kwane dakmenabaniib kii.
Eb ambangkanabi kumbed binangke eb yaa kubimaib ye weng kuu kube meendobaniin.
6Eb kamenabi binangki yeman kuye aromkono ye weng kuu nimakarubbed kwane dakmenabaniib.
Kwane nembed eb kuu darewoob arimbed ye weng kuu dakmenabaniin.
7Eb amun amun yiminmo kamendimaab ye weng kuu nindorokiibbed dakme kubaniib,
kwane eb yorokmo kerekmen ye dowad kubi yook wingkaniib.
8 Yariman kuu kabamoon kondoon ye mimyob dowaken keendimaan angkon mimyob keende kakman are nonondandimaan,
kwane ye norin arud kuu yodbirimban emambed angkon mimyob dowaken darebmoyiib.
9 Yariman kuu nimakarub korem yaa amun amun kamendimaan,
kwane ongmenaboon ye kumkam korem yi dabab kandimaib yaa kuu mimyob keende awandimaan.
10O Yariman, ongmenabewen ye kumkam korem kuu eb yaa eso andaniib,
kwane eb karadmodan kuu eb kubebde eb kuu darewoob arimbed andaniib.
11Yi kuu eb oonimbon ye nambiri ye wengiib,
eb aromkono kai ye wengiib dakmenabaniib.
12Kwane dakmaniib kumbed nimakarub korem kuu eb kamenabi aromkono kuyiib
eb oonimbon ye nambiri manimanandeb kuyiib kuu yikaadkeraniib.
13Eb oonimbon kuu dowan keraanban aron korem kwane angkimbaraneen,
kwane ebbed korok kere ooni ye kerekmen kuu nimakarub yaro dobere dobere yaro wananiib korem aom kwane angkimbaraneen.
 Yariman kuu ye weng kunduk korem kuu kwane kuyaamo ambangkimaan, ma korondaanban,
kwane ongmenaboon ye kumkam korem yaa kuu mimyob dowaken keendimaan.
14Kane kane kombiriwen kuu Yarimanbed awande benkoobimaan,
kwane kane kane dabab aom kande doriib kuu yembed ben angka nongkobimaan.
15Wad doriib ye dingkaniib nimakaruwiib korem kuu eb kwananeeb ande kerebdombaraiwa,
animan kuu aron anam arimbed yi yaa bangkandimaab.
16Eb dingki kan yire yiminmo bangkandaawe,
wad doriib ye dingkaniib nimakaruwiib korem kuu ane mikmonimaib.
17 Yariman kuu ye kerekmen korem yaambed kuu yorokmo,
kwane ongmenaboon ye kumkam korem yaa kuu mimyob dowaken keendimaan.
18Kane kane yi kuu Yariman yaa baandimaib kuu ye kuu yi korem diamo keroon,
anam anam yaambed ye yaa bandimaibdan kui.
19Kane kane yi kuu ye yaa une bumangkimaib kuu yembed yi dowaken yaa kuu id kerundi kondimaan,
kwane yi baandi kuu wengamberende ben burudande angka nongkobimaan.
20Kane kane yi kuu Yariman yaa mimyob dowaken keenimaib kuu yembed yi yaa kerendombere oonendimaan,
kumban arewa kamenabidan korem kuu yembed monmaraneen.
21Ne mongkodkonombed Yariman ye aningko kankooni weng dakmenabaniin,
kwane wad doriib ye dingkaniib nimakaruwiib korem kuu ye aningko karadmo kankoonembaraniib aron korem korem.
Copyright information for `YON