Psalms 21

Yook 21

Yook ambo bi ye karub yeman. Dewid ye yook.

O Yariman, eb aromkono ye dowad king kuu kuboon.
Ebbed awanenewen kowe kubi darewoob keroon!
Ye niindem aombed komo yaa dowakeniib keroon kuu ebbed ee yimin ande konewen,
kwane ye wengbed komo kaamobdoon kuu konewen, ma korondindo.Selah
Ebbed ye yaa yewudmo amun kerune angkodmeneneb,
ye korok ari kuu dereni yeman bod gold yankorenmombed ongmiwen kumbed kan derenenewen.
Yembed wadkeri dowad kaamobdoone konewen,
aron yemooniib, aron korem korem kui.
Ebbed awanenewen yaambed ye nambiri kuu darewoob keroon,
kwane ebbed ye ari dobiri manimanandewiib nambiriyiib bangkanewen.
Ebbed aron korem ye amun keruni konewen,
kwane yeyiib yaa doreeb kowe kubimo doreen.
Amborom kuu king kuu Yariman yaambed inamen angkumone doreen,
kwane Korem Burudandoon Arimbed Ye God ye womoniyiibban ye mimyob dowaken yaambed ye kuu ma kiringmaanban.
Eb dingkimbed eb bondan korem awingkandaneeb,
kwane kane kane eb yaa arud wandembiriwen kuu eb dingki wiwimbed yire awingkandaneeb.
Eb mananeeb yaron ari kuu yi ben amot nimin darewoowiib denemoon areb kerundaneeb.
 Yarimanbed norin wandaneen kumbed yi ben yoobkaneene
ye amotbed yi dene kubunaneen.
10 Ebbed yi awoya ben monmaraneewe okad arimbed dowan keraniib,
kwane yi yumbon kuu nimakarub kumaom kuu dowan keraneen.
11 Yi kuu eb yaa bon keri ye inameniib birandi ye inamen arewayiib ongmiib kumban,
yi kuu ma kamindeban keraniib,
12 amborom kuu ebbed yi yaa eb ana baradmaneeb kumbed
yi kuu angkurom korokbebde kirokmonaniib kii.
13 O Yariman, ewaromkono yaambed aningko ariyiib kerok.
Nub kuu eb aromkono dowad yook wingkenub ewaningko kankoonanuub.
Copyright information for `YON