Psalms 25

Yook 25

Dewid ye yook.

O Yariman, eb yaa ne wadkeri kuu kan kabdaan.

O ne God, eb yaambed angkumone doriin.
Korondaawa yenambed ne nen karak ari kowaib.
Kwane, korondaawa ne bondanbed ne nen burudande doraib.
Kane kane ebbed kwananeeb ande meedmimaib kuu
karak ari ma ben nongkobaabban.
Kumban kane kane idiibban kumbed birandimaib kuu
karak ari ben nongkobaneeb.
O Yariman, eb kiwaan kuu ne korokbewe.
Kwane, eb inamen kuu kedmengkawe.
Eb anam anam yaambed ne nen kinban weneneb kedmengkawe.
Amborom kuu eb kuu ne nen bobni yaa burudande bindi ye God kowe.
Kwane, amkimombed wene amnoom kuu ebbed kwananeeb ande meedme dobirimain.
O Yariman, eb mimyob keende kakman are nonondandiyiib womoniyiibban ye mimyob dowakeniib kuu ika meene.
Amborom kuu kuye inamen kuu unyeman anukbed ongmewen kowe.
Ne kewed yaa komo komo ambarakmaan kuu ika meendobaab, nonondande.
Ne wabkad kamaan kwangkon ika meendobaab, nonondande.
O Yariman, eb womoniyiibban ye mimyob dowaken yaambed ne yaa ika meendobe.
Amborom kuu eb kuu amun yeman kowe.
 Yariman kuu amunmo, ye kuu kangdommo.
Kwane kowe, yembed ambarakmidan kuu ye kiwaan korokbende kedmengkandimaan.
Yembed yika kankubune yiri keriwendan yaa yorokmo kerekmen yaambed korokbendene,
ye kiwaan kedmengkandimaan.
10 Kane kane Yariman ye amowiib wengiib kuu awine kandimaibdan kuyaa kuu,
ye kiwaan korem kuu womoniyiibban ye mimyob dowaken yeman, kwane yi kuu ma korondiyiibban no awandi yeman.
11 Ne ambarakmi kuu miin darewoob kuned,
o Yariman, ewaningko ye dowadbed,
ne ambarakmi kuu are nonondande.
12  Yariman yaa une bumangkimaibdan, yi kuu kane kane?
Yi kuu kedmengkandaneene kiwaan kinoon arimo wananiib.

13 Kwane, yi kuu ongmendaneene wad dobaraniib kuu yiminmo dobaraniib.
Kwane, okad kinoon kuu yi awoya yiman keraneen.
14 Kane kane Yariman yaa une bumangkimaib kuu yembed inamen kan biknoon kumbed yi yaa korokbendaneen,
kwane amob weng ongmoon kuu yi yaa korokbendaneen.
15  Yarimanbed awawok andi dowad ye yaa kereknembirimain,
amborom kuu yembedmo arud yaa ne nen burudandimaan kowe.
16 Ne kirimo obonmo angkon dabawiib keraan kowe,
ne yaa murubia kaweneb ne yaa mimyob keewe kakman are nonondande.
17 Dabab ne niindem aom kuu yemoon keroon,
kowe ne meendobimo yiminban keraan kuu obon keruwe.
18 Ne dabawiib yiminban keraan kuyiib kuu wedmewe awawe.
Kwane, ne ambarakmi korem kuu are kankorare nonondande.
19 Ne bondan kuu yemoon keroon kowe, yi yaa wedme.
Kwane, yi kuu ne yaa arud miin darewoob wandembirimaib kuyaa wedme.
20 Ne wadkeri kuu nen amukne ooneneb yi yaambed ne nen burudande angka kowe.
Kwane, korondaawe yenambed ne nen karak ari kowaib,
amborom kuu ne kuu ebbed kukbimaabbon aombed dobirimain kowe.
21 Ne dobiriyiib inameniib kuu ibmo amunmoyiib angkon ne dobiri kangdommoyiib kumbed ne nen dorondandok,
amborom kuu ebbed kwananeeb ande meedme doriin kowe.
22 O God, Israeldan kuu yi dabab kandiwen korem yaambed kuu
ebbed ben burudande angka nongkobe.
Copyright information for `YON