Psalms 26

Yook 26

Dewid ye yook.

O Yariman, ne dowad ebbed wengyundeneb ma ambarakmindo ande,
amborom kuu ne kuu ambarakmoon kii ande kadwoniyiibban ye dobiri yaambed dobaraan kowe.
Ne kuu kirokkarokiibban Yariman yaambed yone dobaraan.
O Yariman, ne inamen andangke.
Kwane, ne nen komboon darobewe.
Ne dowakeniib inameniib kuu wengyunde.
Amborom kuu eb womoniyiibban ye mimyob dowaken kuu ne arinambo ari angkeen,
kwane ne kuu eb anam anam yaambed yarembirimain.
Ne kuu birandidan yoom dibirimokban,
kwane aadidmidan yoom daboknenwimokban.
Ne kuu arewa kamimaibdan yi nedbi yaa kuu kangkadmimain,
kwane ne kuu arewa kamembirimaibdan yoom dibiri kuu wunekarundimain.
O Yariman, ne kuu ambarakmoon kii ande kadwoniyiibban kumbed dingki okeni,
eb dowad bod wuube dingkan aye nengke baeb konimbon ye deme awinimain.
Kwanimain kuu ewaningko kankooni ye weng baandimain,
kwane ebbed komo komo kamenabi manimanandeb kuu daandimain.
O Yariman, ebbed doreeb yambib kuu dowakeniib kerimain,
eb nambirimo derenkoroonbon kui.
Ne kingkin kuu ambarakmidan yoom ben angkanaab,
kwane ne wadkeri kangkon kuman yenbandimaibdan yoom ben angkanaab.
10 Yi inamen aom kuu wunonwanon kami miin arewayiib,
kwane yi dingki wiwi aom kuu od yemyeb kandene ambarakmindoman yaa ambarakmoon ande yedmi yeman yemooniib kii.
11 Kumban ne kuu ambarakmoon kii ande kadwoniyiibban ye kerekmen yaambed doriin,
kowe ne nen arud yaa burudande angka koweneb ne yaa mimyob keewe kakman are nonondande.
12 Ne yon yiri kuu okad dabonmo arimbed doriin,
kwane kadaareb nedbaniib aom kuu Yariman yaningko kankoonaniin.
Copyright information for `YON