Psalms 35

Yook 35

Dewid ye yook.

1O Yariman, kaneya yi kuu ne yaa manmo kerimaib kuyaa kuu ebbed yi yaa manmo kerunde.
Kwane, kaneya ne yaa nangmiwen kuyaa kuu ebbed yi yaa nangmende.
2Eb kombeyiib kiyamiib be nekwe.
Kwane nekwekoreb yaro dembeneb awawi dowad mene.
3Eb maradiib ana nangmi ye daayiib benkoobe,
ne nenbandande kerewenmo yarimaibdan yaa.
Yedmewebka niindem aom anam anda,
“Ne kuu eb nen bobni yaa burudande bindi ye God” ande yedmewe.
4Ne nenbande kowande kamiibdan kuu
yi aningko kankubunebko karak kandime.
Ne yaa wunonwanon kamiibdan kuu
ben angkurom kondebko karak ye kubun aom dobirime.
5Yi kuu norok kab areb nuubbed awune kanwinimaan areb kwane kerok,
kukuu Yariman ye engyumbed wangmenmo wonok.
6Yi wini ye kiwaan kuu kumun kere kerebbonmo kerok,
kukuu Yariman ye engyumbed yenbandande kerewenmo yarok.
7Ne kuu yi yaa ma abdon kamindo kumban yi kuu ne dowad kawaad nong kowiwen,
kwane ne kuu yi yaa ma abdon kamindo kumban yi kuu ne dowad dem nidke awod kebengkiwen.
8Kudmeniibban ye monmarimbed yi yaa mene kebendok,
kwane yika yi kawaad nong kowiwen kumbed awinde bedmendok,
kwane yika dem ongmiwen kuri kirobime, yi monmari dowad.
9Kwananeen kuu ne kingkin aom Yariman yaa kubeni,
yembed yi yaambed ne nen burudande angka kowaneen yaa dowakeniib keraniin.
10Ne inamen korem kumbed baandaniin,
“O Yariman, kanembed eb yaa iibmo keroon? Dowan!
Kamboknondan kuu aromkonodanbed yenbandimaib kuu ebbed yi ben burudande angka nongkobimaab,
kwane kamboknondaniib awandime ande meeniibdaniib kuu yidbidan mene yi yiribman bimaib kuu ebbed yi ben burudande angka nongkobimaab.
11Mimyob keendiyiibban kangdod aom dudanabimaibdan menenib
kumkam ne ma kaadkerindo ye dowad ne yaa kaamowimaib.
12Ne amun kamaan ye dowad kuu yimbed arewambed inanduwenib,
ne nen kubunaiwe ne niindem aom yiminban kerimain.
13Kuned yi kuu anikad kandimaib kuu mimyob wandi ye ebkad boroneni,
animan koronde neka kankubuneni,
kurikuri kamimain kumban Godbed ma inandimokban.
14Ne angkodmi maa o ne daman maa anikadiib areb yi dowad yuudemoon areb kerimain,
kwane awaan bobnaune yuudemoon areb yi dowad ne korok wan yiri kubune yuudi ameng kamimain.
15Kumban ne yaa dabab meneboon kuu yi kuu kube nedbiwen,
kwane nenbandidan kuu ne koron kumbed nedbe ne yaa manmo keriwen.
Yi kuu womoniyiibban ne yaa wengamborokbanabimaib.
16Yi kuu God ye kiwaan yikaadbandan areb arewa keruwe damangkawenib,
ne yaa ningkambo kabang kamenib arud darewoob wandiwen.
17O Yariman, aron komoyiib awawokban kere no keewombaraneeb?
Yi monmari yaambed ne wadkeri nen burudande angka kowe.
Laiyon areb keriwendan keyaambed ne nen burudande angka kowe.
18Kee kwananeeb kuu kadaareb nedbiwen aombed eb yaa eso andaniin,
kwane kadaareb yemoon aombed ewaningko kankoonaniin.
19Korondaawa ne yaa idiibban bon keriwendanbed ambon kamewaib.
Kwane korondaawa ne yaa ogoodmo arud wandiwendanbed dabab ne yaa meneboon ye dowad kubaib.
20Yi kuu yewenub ye dowad ma dakmimokban,
kwane yi kuu dudi ye kadwoni weng ongmimaib,
kane kane nuwokad aombed iwarimo doberem ande doriib yaa.
21Ne bondan kembed ne yaa baande yedmimaib,
“Ai, ai, kee kamune kamoon kuu nuwindobbed wedmenuwen kii!” andimaib.
22O Yariman, korem kuyiib kuu wedmewen kowe iwari keraab.
O Yariman, eb kuu kwamune ne yaa ambab keraab.
23Yaro dembe. ne angkumone kebeni dowad yaro mene!
Ne God, ne Yariman, ne dowad koromoni weng nekwe!
24O Yariman ne God, eb yorokmo kerekmen yaambed ne dowad wengyunde ambarakmindo ande.
Kwane korondaawa ne bondanbed ambon kamewaib.
25Korondaawa yi kekamune meenaib, “Ai, nub dowaken keruwen kuu kanduwen kii!” andaib.
Kwane korondaawa yi kekamune ne dowad yedmaib, “Nubbed ye monmaruwen dowan!” andaib.
26Kane kane ne dabab kandaan yaa kubaniib kuu
yi korem ben karak kondoko kerebkarab kamime.
Kwane, kane kanembed ne nen yiri kubune yika yi aningko kankoonaniib kuu
yi dobiri aom kuu karakiib derendaroko kubuniibban ye aningko kandok.
27Kumban kane kane Godbed ne dowad wengyunde ambarakmindo andoon yaa kubaniib kuu
dowakeniib kere kube baandime.
Yi kuu kekamune yedmimamime, “ Yariman yaningko arimbed kerok,
yembed ye dememan amunmo dobirimaan kuyaa kubimaan kii.” andimamime.
28Eb inamen yorokmo kuu dakmendaniin,
kwane amkimombed wene amnoom kuu ewaningko kankoonaniin.
Copyright information for `YON