Psalms 42

Buk Ayoob

Yook 42-72

Yook 42

Yook ambo bi ye karub yeman.Maskil ye yook Korah ye awoyambed wongkiwen.

1O God, diiyambed ok moom bobnekore okmanambon yaa anande wenemoon areb
kwane ne kingkin kuu eb ande onmeen.
2Ne kingkin kuu God yaa ok moom areb keroon, wad doreen ye God yaa kui.
Aron komo arimbed Godiib yaa wene durunenaniin?
3Yenambed amkimombed wene amnoom kuu ne yaa yedmimaib,
“Eb God kuu kuna? Dowan!” andimaib kowe,
ne kuu amnoomiib awingyawiib
animan koronde inokmo wimain.
4Anuk kuu nembed kadaareb bindore
God ye kurikuri ambib yaa kinban winimain,
kukuu kube baandiyiib eso ande baandiyiib
ne yoom kadaareb yoom God ye orokbon winimaub.
Kuyaa kuu kibikee ika meenekori
ne mimyob wandi kuu God yaa koneni ye yaa baandimain.
5O ne kingkin, eb komande yerene no kubokban kerewen?
Komande ne niindem aom monmareeb?
Kedi, God yaningko kankoonaniin kowe, God yembed ari kwananeen ande meene.
Ye kuu neyiib yaa doberene awawimaan ye karub, ye kuu ne God.
6Ne kingkin kuu miin kubiyiibban keroon.
Kwane kowe, ne kuu okad Yooden yaambed eb yaa ika meenaniin,
aangko Heeman yaambed, aangko Misaa yaambed kui.
7Ok niindem yirimbed okad niindem yiri yaa baandemoon areb,
eb ok benbon ye kuweng kumbed kui,
eb umbakiib oknondokiib korem kumbed ne ari beengkaiwe,
korem yiminban kerimain.
8Aronki kuu Yarimanbed ye womoniyiibban ye mimyob dowaken keewok,
amnoom kuu ye yook kuu ne yaa angkimborok,
kukuu kurikuri yeman ne wadkeri ye God yaa kui.
9Ne kuu God ne aromkonombon yaa kaamonimain,
“Eb komande ne nonondanduwewen?
Komande ne bondanbed yobdood keruwaiwe
ne kuu kwane yuudi ameng kamembirimain?” andimain.
10Ne bondanbed ne yaa damangkawimaib,
amkimombed wene amnoom kwane yedmimaib,
“Eb God kuu kuna? Dowan!” andimaib,
kowe kono domabangki ye yewed areb kuyiib keraan.
11O ne kingkin, eb komande yerene no kubokban kerewen?
Komande ne niindem aom monmareeb?
Kedi, God yaningko kankoonaniin kowe, yembed ari kwananeen ande meene.
Ye kuu neyiib yaa doberene awawimaan ye karub, ye kuu ne God.
Copyright information for `YON