Psalms 45

Yook 45

Yook ambo bi ye karub yeman. “Bingko Wuung” ye yook ye kiwaan yaambed wingki yeman.Maskil ye yook Korah ye awoyambed wongkiwen. Wonong awani ye yook.

1Ne mimyob aom manimani inamenbed dembe yiminmo kereni
king yaa komkum dakmaan.
Ne ong kuu komkum kami niidiib dowad moo kai kerembirimaan.
2O king, eb kuu miin kerengkabdimbon kai, yena korem arebban,
kwane kabamoon kondoon ye mimyob dowaken keendi weng kuu eb mongkod aombed menebimaan,
Godbed amun kerubdoon aron korem kowe.
3O king kanangkod aromkonoyiib, eb kerewang kande inware.
Kwane eb dobiri manimanandewiib nambiriyiib kuu korokbende.
4Eb dobiri manimanandeb kumbed hoos ari dibere wene burudande dore,
anam anamiib ebka kankubune dobiriyiib yorokmo dobiriyiib korokbi ye dowad.
Eb dingki wiwi ye aromkono kumbed warekandi ye kami kuu ongmenabe.
5Eb ana kuu yidkang arudiib,
kwane yi kuu eb bondan yi niindem karewandimaan.
Ambibkin maa maadan kuu ebbed nangme burudande eb yondad dabderem yiri nongkobimaab.
6O God, eb dibere oonimbon kuu aron korem angkimbaraneen,
kwane eb ooni ye inamen kuu wengyundi anammo.
7Eb kuu yorokmo kerekmen yaa dowaken darewoobmo kereneb arewa kami yaa miin dowakeniibban anam kerimaab kowe,
God, eb God kumbed eb nen ari kowoone, eb angkodmia kuu yirimo keriwen.
Yembed eb yaa kubimaan ye oiyo eb ari bunoon kumbed eb nen ari kowoon kui.
8Eb ebkad doboob korem kuu meer baewiib alo baewiib kasia baewiib,
kwane king ye ambib aiforimbed yenbiwen kuyaambed
nongiib ye wangki yemaniib wingkenib kubi kabdimaib.
9King maa maa yi nimadana ebbed awadmewen kuu aningko darewoowiib,
kwane eb dingki wiwi angka kuu king maa ye mungkan awanandameeb kumbed doruun, yu kuu Ofiaa ye bot goldbed inwareen.
10O king maa ye mungkan, nembed komo ke yedmandamiin kee kande niindem aom kowe.
Kub ambibkindaniib karubkimiib kuu nonondande.
11Kedi, nub king kuu kub manimani yaambedmo boknoon kii.
Kedi, ye kuu kub yariman kowe, ye aningko kankoone.
12Taiya ye king ye mungkan kuu munob yeman bangkabdanuun,
kwane yiribman yemoondan kuu kubende ande kub yaa amun amun kamebdaniib.
13King maa ye mungkan kui, yu kuu manimani ye ebkad inware yu wadnarimbon aom doruun,
kwane yu ebkad kuu bot goldiib angkabiwen kumbed inwareen.
14Yu kuu kwane angkabiwen ye ebkadiib inwareen kuyiib kumbed yu kuu nen kingiib yaa wananiib,
o king, yu yoman kuu yu nima koyu amborongaadbed mananiiwe, ewiib yaa ben mananiib.
15Yi kuu kubiyiib dowakeniibbed ben kinban wananiib,
kwane yi kuu king ye ambib aom aomnaniib.
16O king, eb karub dana meed kuu eb awodkia areb king keraniib,
kwane ebbed yi kuu ben okad maa maa yi korok ongmendaneeb.
17Nembed nimakarub yaro dobere dobere yaro wananiib korem aom eb yaa meeni yeman kuu ongmaniin.
Kwani kowe, ambibkin korem kuu aron korem korem ewaningko kankoonaniib.
Copyright information for `YON