Psalms 5

Yook 5

Yook ambo bi ye karub yeman. Yurin yeman. Dewid ye yook.

1O Yariman, eb kuu ne weng ke dakmandamaan kee wengambere.
Ne kirindobi wareki keyaa meene.
2Ne King, ne God,
ne awawi kawi dowad eb yaa ke baandaan kee wengamberewe,
amborom kuu eb yaa kurikuri kerimain kowe.
3O Yariman, amkimo kaimbed ne weng dakmaina wengambirimaab,
amkimo kaimbed ne dowaken kaamobi kuu benmene eb arinambo ari nongkobekori,
anam kwanuwaneeb andi ye meenimbed meedmimain kii.
4Eb kuu inamen arewa yaa dowakenban ye God,
arewa kaimaibdan kuu eb arinambo ari dobirindeban.
5Kerengkan kamiibdan kuu eb indob ari dobirindeban,
ambarakmidan kuyaa kuu arud wandeneb dowakenban anam kerewen.
6Dudi weng dakmenabidan kuu ebbed monmaraneeb.
Kumka o kuman yenbandidaniib birandidaniib kuyaa kuu Yariman kuu komyeng baeb areb keroon.
7Kumban eb womoniyiibban ye mimyob dowaken yaambed ne kuu eb ambiwoom awudaraniin,
eb kurikuri ambib karadmo yaa bumangkaniin, ewaningko kankooni dowad.
8O Yariman, ne kuu bondaniib kowe,
eb yorokmo dobiri yaambed ne nen kinban weneneb,
yorokmo dobiri ye kiwaan ebbed ongmewen kuu korobe korokbewe.
9Ne bondan yi dakmi ye weng kuu anam ande awini yemanban,
yi niindem aom kuu monmari ye inamen kumbedmo.
Yi mongkodem kuu dabunindo ye bobkonombon areb,
kwane yi ongbed birandimaib.
10O God, yi yaa wengyunde dabab konde.
Yi wunonwanon weng kumbed yika yi meren monmarime.
Yi ambarakmi yemoon kumbed ben ambibkin bunangka kirarundeneb ika mini kuu amob ande,
amborom kuu eb yaa wabkad keriwen kowe.
11Kumban kane kane yi kuu ebbed kukbimaabbon aombed dobirimaib kuu kubime,
kwane yi kuu kubi yook wingkime.
God, eb oonendi kumbed yi ari dabunende.
Yi kuu eb yaa mimyob dowaken keebdiwen kowe, kwananeeb kuu eb yaa kubaniib kii.
12O Yariman, anam kuu ebbed yorokmodan kuu amun kerundimaab,
kwane eb womoniyiibban ye mimyob dowaken kumbed yi yaa kuu yirim areb kanawanewandundimaab.
Copyright information for `YON