Psalms 51

Yook 51

Yook ambo bi ye karub yeman. Dewid ye yook. Yembed Batseba yoom nenem kamoone profesiman Natanbed mene ongkanoon kumbed wongkoon.

1O God, eb womoniyiibban ye mimyob dowaken yaambed
mimyob keewe kakman are nonondande.
Eb mimyob keendi darewoob kerekmen yaambed
ne wabkad kami kuu are kankare.
2Ne arewa kami korem kuu oke dowan kere.
Kwane nambarakmi are koroomiibban kai areb kere.
3Kedi, ne wabkad kami kuu wedme nekaadkeraan,
kwane nambarakmi kuu ne kiringkono ari angkeen.
4Eb yaamo ambarakmaan,
kwane eb indob arimbed miin arewa kamaan.
Kowe ne dowad dakmimaab kuu anammo kerimaan,
kwane nambarakmi wengyundimaab kuu weng anammo andimaab.
5Kedi, ne kuu woonaan yaambed ambarakmimain,
kwane enambed ne nendeen yaron kuu ne kuu ambarakmi ye karub.
6Kedi, eb dowaken kuu nub niindem aom kuu anam anam kumbed yurok andimaab,
kwane ebbed meeni kangdom ne niindem aom kedmengkawimaab.
7Ambarakmi aari kiwaan ebbed ongmewen yaambed aruwebko niindem aom koroomiibban kera.
Kwane ne niindem aom okewebko karadmo dangkorong kera.
8Ongmewebko kubi dowakeniib kera.
Kwane ne kono ebbed beengkewen kuu ongmebko kubok.
9Ne ambarakmi yaa eb murubia kan biknekoreb,
nembed arewa kamenabaan korem kuu are kankare.
10O God, ne niindem aom yeweb karadmo ongme.
Kwane ne inamen kuu kangdommo kerune.
11Eb arinambo yaa kuu ne kan angka karaab,
kwane eb Kingkin Karadmo ne yaa kuu ebka kandaab.
12Ebbed ongmewebko ebbed nimakarub ben bobni yaa burudande bindi kerekmen yaa ika kuba.
Kwane ebbed ne nen angkumoneneb ne yaa inamen nindorokiib kawe.
13Ne yaa kwamebko wabkaddan yaa eb kiwaan kedmengkanda.
Kwananiin kuu ambarakmidan kuu amonombe eb yaa anam andaniib.
14O God, eb kuu ne nen bobni yaa burudande bindi ye God,
ne kuu karub ma aye kowaan ye kakman kuu are nonondande.
Kwananeeb kuu ne mongkodkonombed eb yorokmo kerekmen dowad kube yook wingkaniin.
15O Yariman, ne mandakad dande.
Kwanebko ne mongkodkonombed ewaningko kankooni weng dakma.
16Eb kuu dingkan aye nengke baeb kabdi yaa kuu kubokban,
dingkan aye kumundin nengke dene baeb kabdi yaa kangkon eb kubokban,
kuyaa kubimaab karen bangkabdimain karen.
17God ye kubi dowaken keri yeman kuu yiibka kankubuni.
O God, kane kane kuu yika kankubunenib God ebbedmo yimin andimaib
kuu ebbed yi yaa wunekaraabban.
18Eb kubi dowaken yaambed Saiyon yaa amun kameneb awande.
Kwane Yerusalem yu kuuk kuu angkon ika yenbe ongme.
19Kwananeeb kuu yorokmo kerekmen yaambed eb yaa dingkan aye nengke baeb kabdaniiwe kubaneeb,
dingkan aye nengke baeb kabdiyiib dingkan aye kumundin nengke dene baeb kabdiyiib kui.
Kwane buromakau kuu eb bot wuubimbon arimbed baeb kabdi dowad nengkimamaniib.
Copyright information for `YON