Psalms 56

Yook 56

Yook ambo bi ye karub yeman. “On Arud At Amaan Angka Dibeen” ye yook ye kiwaan yaambed wingki yeman.Miktam ye yook Dewidbed wongkoon. Filistiadanbed Gat angkambed awinenoon kumbed wongkoon.

O God, karub yenambed ne nande kerewenmo yarimaib,
kwane yimbed aronki doboob ne nenbandande kamimaib kowe,
ne yaa mimyob keeweneb awawe.
Ne bondan kuu aronki doboob ne nande kerewenmo yarimaib,
kwane yemoon kuu kerengkanbed ne nenbandenmo yarebimaib.
Ne unaniin kuu
eb yaambed yone dobaraniin.
God yaa kui, ye weng yaambed kubimain.
God yaambed yone dobirimain kowe, ma unainban.
Duknaniib ye nimakarubbed ne yaa komo kamaniib kuyaa meenainban.
Aronki doboob kuu ne weng kuu yimbed ben nengkidme weng arewa keruwimaib,
kwane yi kuu ne yaa nuubnaan kamembirimaib.
Yi kuu wunonwanon kamenib yemyeb darobenib
ne yarebi korem yaa keewombirimaib,
ne dowad nindorokiibbed ayem ande kaimaib.
O God, korondaawa yi kirokmone wanaib.
Kwane noroddan, ne bondan kui, yi kuu eb norin aombed ben kubune.
Ne kirokkarok kamimain kuu wongkewen.
Kwane ne inok wanabi kuu eb awong aom kambungkewen.
Korem kuu eb buk aom kowewenoo? Anamaa.
Nembed awawe ande baandaniin kuu
ne bondan kuu ika angkurom korokbe korondaniib.
Kwane wedmeni nekaadkeraniin kuu God kuu ne dowad doreen kii.
10 God yaambed yone dobirimain kii, ye weng kuu amunmo andimain.
 Yariman yaa kui, ye weng kuu amunmo andimain.
11 God yaambed yone dobirimain kowe, ma unainban.
Nimakarubbed ne yaa komo kamaniib kuyaa meenainban.
12 O God, ne kuu eb yaa amob weng ongmaan kumbed kwane ambangkaniin.
Eso ande munob koni yeman kuu eb yaa bangkabdaniin.
13 Amborom kuu ebbed ne nen bobni yaa burudande angka kowewen.
Kwane ebbed ne yon kuu boknande kombaraan ande awawewen.
Kwanewen kuu eb arinambo arimbed dodkanmo wonok andewed,
wad doriibdan yaa yuroon ye nambiri aombed.
Copyright information for `YON