Psalms 65

Yook 65

Yook ambo bi ye karub yeman. God yaningko kankooni ye yook. Dewid ye yook.

O God, Sayion aom kuu ewaningko kankooni deme angkeen,
kwane eb yaa amob weng ongmenabuwen kuu kwane id keraneen.
O kurikuri kami yaa wengambirimaab ye karub,
eb yaa nimakarub korem kuu menebaniib.
Ambarakmenabuwen kumbed meendobi darewoob kere miin yiminban keruwen kuu
ebbed nub ambarakmi are nonondandewen.
Kane kane ebbed kingkeneb eb kurikuri ambib ye kuuk aom dobiri dowad dia ben menebewen kuu
amun kerundoon kii!
Eb kurikuri ambib ye amun amun kuu nub yaa miknemoon areb kerundoon,
eb kurikuri ambib karadmo yaambed kui.
O God nub ben burudande bindi ye karub, ebbed yorokmo ye ambangki binangki yeman kumbed nub yaa inandundimaab.
Eb kuu okad yimin yimin yaa doriibdan korem yi awandaneeb andi ye karub,
karamok ari motodbed yarebimaibdan yi kangkon.
Ebbed aangko ongmenabewen kuu ebka eb aromkonombed,
ebka eb aromkono inwarewen kumbed kwanewen.
Karamok beengkanabiib kuu ebbed ongmaawa kurune angkimbirimaun,
kuu ok umbak beengkanabiib kui.
Ambibkin maa maa korem kwangkon yi yirinde baande kuu ongmaawe kurune yemyeb kerimaib.
Ambab angka doriibdan kuu eb kami yeka mamaa yaa binangkiwen.
Ebbed komo ambangkewen kumbed
aron dembimaun angka ye okaddaniib aron kubunimaun angka ye okaddaniib kuu eb dowad kube baandimaib.
Ebbed okad oonendeneb ok kondimaab,
kwane id iri yeman yemoon bangkandimaab.
O God, eb ok awaan kuu yiminmo dembeen,
nimakarub yi yongbon id yemoon bangkandi dowad,
amborom kuu ebbed kwanok ande yedmewen kowe.
10 Ebbed am bangkandimaab kowe,
yi yongbon kidbon yiri bid benkubune wuneen yiri kuu okmanambon areb keraune,
mongkobon aangko kuu ben kubunebaune,
kab kibingkiwen yokad kuu yawinok keraune,
idiib irimaun kuu ebbed amun kerundimaab.
11 Weeb mimim aom kuu yongbon kuu ebbed ongmaawe animan yemoon kaimbed wandimaib,
kwane kuna kuna wenebimaab kuu animan id yiminmo kerundimaab.
12 Dura angka kuu animan id yiminmo,
kwane koodbon koodbon yaa kuu kubimo.
13 Dura ye kereekbon kuu dingkan kab yewuudmo anengkanan yarebiib,
kwane dabon kankubuneen yiri kuu animan id keene wonoon,
kwane yi kuu kube baandimaib, ee, kube wingkimaib.
Copyright information for `YON