Psalms 69

Yook 69

Yook ambo bi ye karub yeman. “Bingko Wuung” ye yook ye kiwaan yaambed wingki yeman. Dewidbed wongkoon.

O God, ne nen burudande angka kowe,
amborom kuu ok kuu derebe yukne nandameen kowe.
Ne kuu birinbon dareb yiri kubunaan,
kuyaa kuu yon dore aromnikinban kii.
Ne kuu ok kaba dareb yiri kubunaan,
urokbed derebe yukne kanwanandamuun kui.
Ne kuu awawime ande komkimain kumbed ne kiwadkok kuu kiwandoon.
Ne kuu God ande onmoni nindob yidnoon.
Kane kane ne yaa ogoodmo idiibbanbed arud wandembiriwendan kuu
kimingke yemoon kai keroon, ne awung kimingki arebban.
Kane kane ne yaa ogoodmo idiibbanbed bon keriwendan kuu
aromkonoyiib, yi kuu ne neene monmarem ande kamiib kui.
Nembed yid bindo kumbed
ongmok ande dedmobimaib.
O God, ne inamen arewa kuu ebkaadkerewen,
kwane ne ambarakmi kuu eb yaambed kuu ma bikniyiibban.
O ana nangmidan yemoon ye Yariman God,
kane kane eb yaa amaan ari kwananeen ande meedmiibdan kuu
neyiib kowe yenambed yi yaa karak kondaib.
O Israeldan yi God,
kane kane eb ande onmiibdan kuu
neyiib kowe yenambed yi aningko ben kubunaib.
Amborom kuu ne kuu eb dowadbed damangkawe irinyowaiwe,
ne kuu karak bobnimain.
Kowe, ne aaroka yaa kuu ne kuu norodman keraan,
nena anam yu karub dana meed yaa kuu owodman keraan kui.
Amborom kuu ewambiwoom ye nindorok kumbed aikmewembirimaan,
kwane damangkandi weng yimbed eb yaa damangkabdiwen kuu ne yaa monoon kii.
10 Ne kuu inok we animan koronde God yaa meenimain kuu
ne yaa damangkawe irinyowimaib.
11 Ne kuu yuudi dowad ebkad karong korobmo deebimain kuu
nimakarubbed daawi yeman kerimaib.
12 Kane kane siti kuuk ambongko yaa dibirimaib kuu damangkawimaib,
kwane awarak yimaundanbed ne dowad damangkawi yook wingkimaib.
13 Kumban, o Yariman, eb kubi dowaken keri yaron arimbed
eb yaa kurikuri kamimain kowe,
o God, eb womoniyiibban ye mimyob dowaken darewoob yaambed
inanduweneb ma korondiyiibban ye inamenbed awine ne nen burudande angka kowe.
14 Domowaawe birinbon yiri kubunain,
nen burudande angka kowe.
Kane kane ne yaa arud wandembirimaib yaa
ne nen burudande angka kowe,
ok kaba dareb yiri areb kuyaa kui.
15 Korondaawe ne kuu urokbed nen yuknaun,
o ok kaba dareb yiri ne nen anukmunaun,
o dem yiri kubunaine winderaun.
16 O Yariman, eb womoniyiibban ye mimyob dowaken kuu amunmo kowe kuyaambed inanduwe.
Eb mimyob darewoob kawewen yaambed ne yaa wedmewe.
17 Eb deme karub ne yaa murubia kan yeknaab,
kwane ne kuu dabab kandaan kowe kirod inanduwe.
18 Dia mene ne bidde,
ne kuu bondaniib kowe.
19 Eb kuu ebkaadkerewen ne bondanbed ne nen irinyowenib damangkawenib karak kawimaib,
yi kuu wedmende doreeb kui.
20 Damangkawiwen kumbed kubiyiibban kereni
ne niindem aom miin yiminban keraan.
Mimyob keewidan ande onmaan kumban ma wedmindo,
kwane ne mimyob wandi kankubunidan ande onmaan kumban ma wedmindo.
21 Ne bondanbed naniman ari mung kookiib dabokenib,
ok moomiib keraan yaa kuu kookiib ye ok kawimaib.
22 Kowe, yi orokbon arak kumbed kawaad areb kerundok,
kwane yi yoom yone doriibdan yaa warab areb kerundok.
23 Kwane, yi indob kuu wiiwiib yonoko wedmindeban kerime,
kwane yi angkurom kuu aron korem nikmingkandok.
24 Yi ari kuu eb norin arud onduknende.
Kwane yi kuu eb arud amoyiib denobeen kumbed ben dabuknandok.
25 Kwane, yi yumbon kuu korem obonmo kerok,
kwane yi kombon ambiwoom kuu karub maa ma doborokban kerok.
26 Amborom kuu kane kane ebbed ukum kondewendan kuu yimbed yenbandaiwe,
kwane ebbed durud yewed kondewendan yi weng kuu yimbed kanyare daandimaib kowe.
27 Yi ambarakmi kuu wuubenmo daanekoreb ukum darewoob konde.
Kwane yorokmo dobiri ye kiwaan ebbed ongmewen kuu yi kuu kandaib.
28 Kwane, yi aningko wadkeri buk aom kuu are daadme.
Kwane, yi kuu yorokmodan yi aningko yaa wongke daboknaab.
29 Ne kuu yewediib niindem aom miin yiminban keraan,
o God, bobni yaa burudande bindi ye kiwaan ebbed ongmewen kumbed ne nen dorenare.
30 Ne kuu God yaningko kankooni ye yook wingkaniin,
kwane ye yaa eso ande nambiri konaniin.
31 Kwananiin kuu Yarimanbed kubi darewoob keraneen,
oksen aye nengke baeb koni arebban,
buromakau ambi duruwiib biridiib kumundin nengke baeb koni arebban kui.
32 Dabab meneboondan kuu kwane wedmenekorib kubaniib,
yiib kane kane God ande onmiibdan, yiib niindem aom kuu kubimbed angkimborok!
33 Kamboknondan yi weng kuu Yarimanbed wengambirimaan,
ye nimakarub bondan yi dabderem yiri doriib kuu yangmadandimokban.
34 Kwane, Eweniib okadiib kuu ye aningko kankoonime,
karamokiib yu kumkam koremiib kwangkon ye aningko kankoonime.
35 Amborom kuu Godbed Saiyon kuu arud ye barang yaambed burudande nendene,
Yudadan yi siti kuu ika yenbenabaneen kowe.
Kwananeene ye nimakarub kuu kuyaombed nekwane dobere oonaniib,

36 ye demedan yi meed kuu kuye okad kuu yiman keranuun kui,
ye yaa mimyob dowaken keenimaibdan kuu kuyaa dobaraniib kui.
Copyright information for `YON