Psalms 74

Yook 74

Asaf yeMaskil ye yook.

O God, komarewako kee nub kuu aron korem domondewen?
Komande eb ooni ye sibi areb nub yaa kuu eb norinmo womoniyiibban keendembirimaab?
Eb nimakarub unyemanbed amoddoon kuyaa ika meene,
ambibkin mimodan ebbed kinewe biddoon kuyaa kui.
Aangko Saiyon kurin anuk doberewen kuyaa ika meene.
Bondan kuu eb kurikuri boyambib monmariwen kowe,
aron doboobmo angkuun ye boyambib bob keyaa yaro dodkanmo mene.
Eb yoom nedbimaubbon yaa kuu eb bondanbed wene baankone komkiwen,
kwane yi flaekiib mane kan daaniwen.
Yi kuu at dengkoridan areb,
at nimingkaan aom dengke aremoon areb keriwen kowe,
eb kurikuri boyambiwoombed kowod yone winiwen yaa ayiib nongkobe kuruwakiib ongmenabiwen kuyaa kuu
yi kapakiib hamayiibbed wowe monmariwen.
Kwane yimbed eb kurikuri boyambib kuu amotbed kowiiwa dene kubuneen,
kwane ewaningkoyiib angimboroon ye kurikurimbon kuu monmare yon dowod yeman kerundiwen.
Nub dowad yikareb yedmiwen, “Nub kuu yi ben kumundin yob beengkemoon areb kerundem!” andiwen.
Kwane, nuwambibkin aom God yaa kurikurimbon korem kuu amotbed nengkiiwe denobeen.
Nub yaa kuu dud maa ma korokbindo,
kwane nub kumaom kuu profesiman mim ma doborokban,
kwane aron arewa kee aron komoyiib kwane awinaneen kuu nub keyaa karub kanembed ma yekaadkerindo.
10 O God, aron komoyiibbed kwane eb bondan kuu eb yaa damangkabdaniib?
Yi kuu kwamune aron korem ewaningko monmaraniiwoo?
11 Komoyiibkob eb dingki, dingki wiwi kui, yire ambangkokban kerewen?
Eb dingki bedme warewen kuu ben yire yi monmare.
12 Kumban, o God, unyeman yirimbed eb kuu ne king kerewen,
kwane ebbed okad kirimbed arud ye barang yaa burudande bindimaab.
13 Ewaromkonombed karamok kuu kan angkara angkara kere kowewen,
kwane omyere dareb dareb yi korok kuu baangkanabewen.
14 Ebbed omyere kambari maa yaningko Lewaiyatan ye korok korok kuu beengkanabekoreb,
ye ida yoma kada kuu amiibban ye amboon ye dingkan yaa bangkandeewa aniwen.
15 Ebbed ok kirubdemiib okmanamboniib kuu ongmenabewenkob menebuun,
kwane ebbed menebimaun ye ok awaan kuu ben okiibban bidmo kere kokderebewen.
16 Awingyab kuu ebman, amnoom kangkon ebman,
kwane woodiib aroniib kuu ebbed ongmenabe nongkobewen.
17 Ebbed okad kuu yu yiminmo andi yaambed ongmenabe nongkobewen,
kwane ebbed yongkonbi yaroniib amaroniib ongmenabewen.
18 O Yariman, bondanbed damangkabdiwen kuyaa ika meene.
Kedi, inameniibbandan ewaningko monmariwen kuyaa ika meene.
19 Kwane, nub kuu on arud areb arudiibban aromkonoyiibban keruwen kuu arud dingkan areb keriwendan yi dingki ari nongkobaab,
kwane dabab wayiroondan ebbed ooneeb kuyaa kuu aron korem nonondandaab.
20 Eb amob weng nub dowad ongmewen kuyaa kuu meene ongme awine,
amborom kuu okad keyaom kee bendom mirikni miriknimbon kuu yeremboromdaniib diiriwen kowe.
21 Kwane korondaawe, dabab wayiroondan kuu ika mene karak kandaib,
kwane kamboknondaniib yiminban kerenib awande andidaniib kuu ewaningko kankoonime.
22 O God, yaro dore. Ebka eb dowad koromone dakme.
Inameniibbandan kuu aronki doboob damangkabdimaib kuyaa ika meene.
23 Eb yaa manmo keriwendanbed yirinde baandimaib kuyaa nonondandaab,
kwane eb bondanbed womoniyiibban baankone komkimaib kuyaa kangkon nonondandaab.
Copyright information for `YON