Psalms 78

Yook 78

Maskil ye yook Asafbed wongkoon.

O ne karuwa nimaya, ne kedmengkandi kuu wengambirime.
Ne mongkodkonombed dakmandamaan keyaa yiib kerendem kowe wengambirime.
Ne mongkod doombereni kuruwak wengbed dakmaniin,
unyemanbed biknoon ye inamen kuu kedmengkaniin.
Wengambere nubkaadkeruwen ye weng,
nuwambeyambed nub yaa daandiwen ye weng kui,
kuye weng kuu nub danaya yaa bikderebaubban,
nub meed yaa kwane daandanuub kii,
 Yariman yaningko kankooni ye ambangkanabi ye wengiib
ye aromkono ye wengiib binangke yaningko kankooni yeman ongmenaboon ye wengiib kui.
Kedi, yembed kwanime andi ye wengiib amob wengiib Yekob ye awoya ari yaa bangkandoon,
Israeldan yaa kui.
Kuye weng kuu yembed nub awoya yiri yaa kuu
“Yiib dana meed yaa kedmengkandime.” ande yedmoon.
Kwamiwed kwane yi dana meed kuu kuye weng yikaadkeraniib,
yi dana meed mogeed wanabindo kangkon yikaadkeraniib kii,
kwane yi kuu yika yi dana meed yaa kedmengkanden wananiib.
Kee kwane kamaniib kumbed God yaa angkumone doberenib,
ye ambangki yaa nonondandaibban kerenib,
yembed kwamime andi ye weng kuu awinaniib.
Yi kuu yi awoya areb keraibban,
amborom kuu yi awoya kuu bot korok kere wabkad keriwen kowe,
yi awoya kuu God yaa korondenib
god maa maa yi yoman winiwen.
Efraimdan kuu anangkawiib nekwiwen kuned,
ana nangmi aron muneen ari kuu kirokmone ikakman winiwen.
10 Yi dowad Godbed amob weng ongmoon kuu korondenib
ye amob yaa wunekare dobiriwen.
11 Yi kuu yembed komo komo kamenaboon kuyaa nonondandiwen,
God ye aromkono wedmi yeman yi yaa kedmengkoon kui.
12 Yembed binangke ye aningko kankooni yeman yi awoya yi murubia arimbed kedmengkoon,
Idyip ambibkin yiri bidambib Soon aombed.
13 Yembed karamok kuu domokbe angkara angkara kerekore yi kuu wedyiri bid ari ben kinban yanoon,
yembed ongmoona ok kuu wan yaro anuk yine ari yine kameen kui.
14 Kwane, aronki kuu wiibbed kowe ben dore wenene,
amnoom doboob kuu amot denenmo wene yure wanaana kuyaambed kerenenmo winimaib.
15 Yembed amiibban ye ambon angkambed bot dumnad baangkenabe daadmekore,
ok ongmoone karamok awaan areb darebmo menebuune yi yaa bangkandoon.
16 Yembed okmanambon ongmoona bod dumnad aombed menebuun kui.
Yembed ok ongmoone ok awaan areb wenebuun kui.
17 Kumban yi kuu ambarakmi yaa deerewandindo, no kwane God yaa ambarakmembirimaib,
kowe amiibban ye amboon angkambed Korem Burudandoon Arimbed Ye God yaa kuu wabkad keriwen.
18 Kwane, yimbed mungi darewoob bobniwen ye animan nub yaa bangkandok ande kaamoniwen kumbed
dowakeniib kere God yaa komboon kaamobiwen.
19 Yi kuu God yaa dowakeniibban kerenib yedmiwen,
“God kuu amboon angkambed animan kuu nub yaa bangkandi yaromkonoyiib dee?
20 Kedi, yembed bot dumnad wowoone ok darebmo menebuune
okmanambon ongmoona ok awaan areb wenebeen kuned,
ye kuu nub yaa animan bangkandi yaromkonoyiib dee?
Ye kuu ye nimakarub yaa dingkan yom bangkandi yaromkonoyiib dee?” andiwen.
21 Kwanandiiwe Yariman kuu wengamberekore norin darewoob wandoon.
Kowe Yekob ye awoya ari yaa kuu ye amot baandoone denemoon areb keroon,
ye arud Israeldan yaa darewoob arimbed keroon kui.
22 Amborom kuu yi kuu God yaa anam andindo,
kwane yi kuu yembed nub awande oone bindaneen ande meenindo.
23 Kumban ye kuu ambid ari yedme kowoona
ambid ambongko nanaboona
24 yembed yi ani dowad om mena kuu am areb ben kubudoroon,
Ewen ye animan kuu yi yaa bangkandoon kui.
25 Kuye nimakarub kuu engyus yi animan aniwen,
kwane yembed animan yiminmo bangkandoon kii.
26 Yembed ambid ari kuu nuub ongmoone aron dembimaun angkambed monoone
ye aromkonombed nuub ongmoone kurimbed monoon.
27 Yembed yi yaa dingkan yom yewudmo kuu am areb ben kubudoroon,
kukuu ayari on kuu karamok yu kubuk kimingkinban areb yemoon kai bangkandoona,
28 kuye ayari on kuu yi doriib wedangkambed kubudiriwen,
yi ambib kombon dobere dobere kidangka kubudiriwen kui.
29 Kowe, yi kuu ane mikmoniwen kumban animan dowan kerindo,
kwane Godbed komo yi dowaken darewoob keriwen kuu kwane bangkandoon kii.
30 Kumban yi kuu mogeed mikmonindo ane dibiib,
animan kuu domonde aniib kui,
31 kumbed God ye norin kuu yi yaa darewoob arimbed keroone,
yi aromkonoyiibdan kuu yeene nongkoboon,
Israeldan yi kewed yenbandoone kubudiriwen kui.
32 Kwamune keroon kumban yi kuu yi ambarakmi yaa deerewandindo,
kwane yembed binangke ye aningko kankooni yeman ongmenaboon kuned ye yaa anam andindo.
33 Kowe, yembed yi dobiri yaron kuu dukmenmo naroone yi inamen ongmiwen kuu idiibban kere dukniwen,
yi dobiri ye weeb kuu dukmenmo naroone kudmeniibban uniwon karakwoniib kumbed yoworiwen.
34 Aron kunayambed Godbed yi yenbandoon kuu yoworindodan kuu ye ande onmenib,
nindorokiibbed ye yaa ika amonombenib ye kiwaan ari doberem ande kamiwen.
35 Kwane, yimbed ika meeniwen kuu God kuu yi aromkonombon,
kwane ika meeniwen kuu Korem Burudandoon Arimbed Ye God kuu yi biddi ye God.
36 Kumban yi kuu ye yaa yi mongkodkonombed birane aadidmimaib,
kwane yi ongbed dudi wengmo dakmenabimaib.
37 Kedi, yi niindem aom kuu ye yaa kowindo,
kwane ye amob weng yi dowad ongmoon kuu awinindo kimyen winiwen.
38 Kuned God kuu yi yaa mimyob kowekore,
yi ambarakmi kuu are nonondandoon,
yi kuu yembed ben monmarindo.
Aron yemoon kuu ye norin kuu yeka kan kubunoon,
kwane ye norin kuu darewoob arimbed kowindo.
39 Ye kwamune meenimaan, yi kuu okad yiridanmo andimaan,
kwane yi kuu nuub embengmo menene burudande wene dowan keremoon areb keriwen.
40 Aron yemoon kuu yi kuu amboon angkambed God yaa wabkad kerunimaib,
kwane aron yemoon kuu yi kuu ye yaa abdon kerunaiwe miin kubiyiibban kerimaan kii.
41 Ikakman ikakman God kuu kandunib komboon kaamobeni yeman kerembirimaib,
kwamaiwe Israeldan yi God Karadmo kuu yewed kandimaan.
42 Ye aromkono korokboon kuyaa nonondandiwen,
yembed dabab bangkandimaibdan yaambed yi kuu biddoon yaroniib,
43 yembed Idyip yirimbed dud kedmengkoon yaroniib,
yembed bidambib Soon aombed binangke ye aningko kankooni yeman ongmenaboon kuyaa kuu nonondandiwen kui.
44 Yembed yi ok awaan kan amonombe umkanmo keroona,
Idyipdan kuu yika yi okmanambon yaa anindeban keriwen.
45 Yembed wadmung yemoon kai yedme kowoona Idyipdan yaa durud yewed kondiwen,
kwane kot kangkon yedme kowoona yi kumkam monmariwen.
46 Yembed kwane ed yedme kowoone yongbon kab biid kuu korem aniwen,
kowe Idyipdan kuu deme awiniwen kuu idiibban keroon.
47 Yembed kwane nong yowiib nongiib kuu am yurukmo bot areb keroon kumbed monmaroon,
kwane yi yedob yob kuu wood nurok yurukmombed kirobe monmaroon.
48 Yembed kwane yi buromakau kuu am yurukmo bot areb keroon kumbed yenbandoone dukniwen,
kwane yi amongkob dingkan kuu imakbed yoon.
49 Yembed kwane ye norin nimin darewoob yi ari kan onduknoon,
ye arud darewoowiib ye kongendi darewoowiib ye yobdood darewoowiib kui,
kukuu yiwed yowori ye engyus areb yi yaa menebiwen.
50 Yembed ye norin kuu awine yinmonindo, kumundinmo yi yaa kan kowoon,
kwane yi wadkeri kuu ma domondindo,
no kwamune yenbande kiraroon bobmo.
51 Kowe Idyipdan yi wonob dana korem kuu yeene nongkoboon,
yob kowi yaromkono ibduruk korokbi dana kuu Idyipdan yi ambiwoom kuu dowan keroon kui.
52 Kumban Godbed ye nimakarub kuu sibi nimingkemoon areb ben angkanoon,
kwane yembed yi kuu sibi areb ben amboon angkarambed angkara kinban dewonoon.
53 Yembed amunmo binwonoon, kowe yi kuu uniyiibban winiwen,
kumban karamokbed yi bondan kuu yuknuune kubuniwen.
54 Kwanikob yembed yi kuu ye ambibkin karadmo angkara be monoon,
koodbon okad yembed nangme dore kandoon ari kui.
55 Yembed ambibkin yenadan kuyaom doriib kuu yenbande dariroona kirokmone wenebiwen,
kwane yi dowad bid nekwe bangkandoone okad kuu yiman kereen,
Israeldan yi amyenimbon yi bidambib kerundoone kwari dobiriwen kui.
56 Kumban yi kuu Korem Burudandoon Arimbed Ye God yaa komboon kaamone wedmenib,
ye yaa wabkad kerenib ye amob awinokban keriwen.
57 Yi kuu yi awodkiya areb God yaa angkurom korokbenib koronde kimyen winiwen,
yi kuu ana unitabbed barandaiwe kimyen wenemoon areb keriwen kui.
58 Amborom kuu yi kuu aangko aangko arimbed dudi god yi kurikurimbon ongmenabiwen kumbed ye yaa norin koniwen,
kwane yi dingkimbed ongmenabiwen ye dudi god yi aningko benkoobimaib kumbed God kuu amban nenem kamauna ambimbed koren kamemoon areb keroon.
59 God kuu kwane wengamberekore norin darewoob wandene,
Israeldan kuu kumundinmo wunekaroon.
60 Kowe, ye kuu ye dobirimbon Sailo angka kuu koronde wonoon,
nimakarub yoom dobiri ye ambib kombon yenboon kuyaa kui.
61 Kwane, God ye amob weng ongmoon kumaom kowiwen ye boks karadmo kuu kanwinime andoone arewadanbed kanwiniwen,
ye aromkonoyiib nambiriyiib kuu ye nimakarub yaa angkeen ande korokbi yeman kuu bondan yi dingki aom kowoon kui.
62 Kwane, yembed yumbon ongmoone kandiwen ye nimakarub yaa norin darewoob wandoon kowe,
kerewangbed yenbandimbon aom nongkoboon.
63 Kwane, ye nimakarub yi kewed kuu amotbed dene kubunuune
koyu kuu ma awadmindo.
64 Kwane, God dore Yuudan dore wedyiri dobiridan kuu kerewangbed yeene yuriiwe,
yi nima irib kuu binangke kingkin domoniwen kumbed ameng kirindiinban keriwen.
65 Wene yimin arimbed Yariman kuu unuk angkimbon yirimbed dembemoon areb yaro demboon,
ana nangmi karub wain ok ane warudki keremoon areb aromkonomo demboon kui.
66 Kwane dembekore, ye bondan kuu yenburoona ika winiwen,
yimin wandaanban ye karak darewoob keendoon kui.
67 Kwane, Yosef ye amyenimbon kuu yembed akmendandundoon,
Efraim ye amyenimbon kuu kingkindo kui.
68 Kumban ye kuu Yuda ye amyenimbon kingkoon,
yi bidambib kuu yembed mimyob dowaken keendimaan ye aangko Saiyoniib kowe.
69 Ye kurikuri boyambib kuu Ewen areb kamkonomo yenboon,
okad kumundin angkimbaraneen areb kwane aron korem angkimbaraneen ande kowoon.
70 Ye kangkon ye deme karub Dewid kinekore,
sibi oonimbon yaambed nendoon.
71 Godbed Dewid kuu sibiyiib yi manayiib oonoon yaambed nen menene
God ye nimakarub, Yekob ye awoya ari kui, yi yaa kuu ooni ye korok kerunoon,
yembed yi dowad yumbon ongmoondan kui, Israeldan kui.
72 Kowe, Dewidbed ma aadidmiyiibban kere ye inameniib dakmiyiib dobiriyiib ibmo keroon kumbed yi kuu oonoon,
kwane ye inamen indengandeng mengmeng kumbed ben kinban winimaan kii.
Copyright information for `YON