Psalms 89

Yook 89

Maskil ye yook Esraman Itanbed wongkoon.

1Ne kuu Yariman ye womoniyiibban ye mimyob dowaken ye dowad aron korem yook wingkaniin,
kwane eb ma korondiyiibban eweng awini ye kerekmen kuu nimakarub yaro dobere dobere yaro wananiib korem aom ne mongkodkonombed kedmengkandaniine yikaadkeraniib.
2Kedi, nembed yedmaan, “Eb womoniyiibban ye mimyob dowaken kuu darewoob ari kere weneen aron korem,
kwane eb ma korondiyiibban eweng awini ye kerekmen kuu ebbed yumbon ongmewen kuu Ewen arimbed kii.” andaan.
3Ebbed yedmewen, “Nembed kinaanman yaa kuu amob weng ongmaan.
nembed ne deme karub Dewid yaa yedme koweni yedmenaan kuu kei,
4‘Nembed eb yob dowad aron korem ye yumbon konaniin,
kwane eb dibere ooni ye yumbon kuu nimakarub yaro dobere dobere yaro wananiib korem aom kwane angkimbaraneen.’ andaan.” andoon.Selah
5O Yariman, binangke eb yaa anam andi yeman ongmenabewen kuyaa kuu Ewen aridanbed miin amun yeman andimaib,
kwane eb ma korondiyiibban eweng awini ye kerekmen kuu karadmodan
89:5,7 Kuye “karadmodan” kuu engyus.
nedbenib miin amun yeman andimaib.
6Kedi, ambid ari karub kane kuu Yariman yaa ma ibnaneen? Dowan.
Ewen ari karub kane kuu Yariman yaa ma ibnaneen? Dowan.
7Karadmodan nedbimaib kuu yi korem God yaa uni darewoob kerimaib,
kwane yembedmo kuu unimbonman, kwane kane kane ye yaa awanewandiwendan korem kuu ye arebban.
8O Ana Nangmidan Yemoon Ye Yariman God, eb areb kuu kane? Dowan.
O Aromkonomo Ye Yariman, eb ma korondiyiibban eweng awini ye kerekmen kuu eb yaa kanawanewandoon.
9Eb kuu karamok oknondokiib yaa kuu oonimaab.
Kwane oknondok kubune daane kaimaun kuu ebbed ben kubunebimaab.
10Ebbed Rehab
89:10 Rehab kuu karamok yu omyere maa, ye weng id angkara kuu “niida kurudayiibban miin arewa ye inamen”.
kuu dore bunbeewe bobnoon,
kwane eb dingki aromkonombed eb bondan kuu ben buyokbayok kerundewen.
11Eweniib ambidiib kuu ebman, okad kangkon ebman,
kwane ebbed okadiib yu kumkam koremiib ongmenabewen.
12Kwane, ebbed kariyiib kiriyiib kuu ongmenabewen.
Aangko Taboo yoom aangko Heemon yoom kuu ewaningko ye dowad kubi yook wingkimaib.
13Eb dingki kuu aromkono kaiyiib,
eb dingki birid kangkon aromkonoyiib, eb dingki wiwi kuu nambiriyiib.
14Yorokmo dobiriyiib anammo wengyundiyiib kuu eb dibere oonimbon ye ambokab,
kwane womoniyiibban ye mimyob dowakeniib anam anamiib kuyaambed kwane ambangkimaab.
15Kane kane eb yaa kube baandimaib kuu amun kerundimaab,
o Yariman, yi kuu eb arinambo ari eb nambiri aom winimaib kui.
16Yi kuu aronki doboob ewaningko yaa kubimaib,
kwane yi kuu eb yorokmo kerekmen yaambed benkoobimaab.
17Amborom kuu ebbedmo kuu yi aromkono ye nambiri,
kwane eb kubi dowaken yaambed nub aromkono kuu arimbed kondewen.
18Kedi, nub dorondari ye karub kuu Yarimanbed oonoon,
nub king kuu Israeldan yi God Karadmo ye karub kui.
19Anuk kuu ebbed eb karadmodan yaa wane angkadere daandewen,
“Nembed ana nangmi yekaad ye karub yaa awanenaan,
nembed nimakarub kuyaombed kinaanman kuu nen aningko arimbed konaan kui.
20Ne deme karub Dewid wedmenaan.
Ne oiyo karadmombed ye ari bune kinaan.
21Ne dingkimbed awanenembaraniine kangdommo doberembaraneen,
kwane ne dingkimbed aromkono konembaraniin.
22Bondan kuu ye yaa bironaibban,
kwane miin arewa kamenabi ye karub kuu ye yaa dabab wayiraanban.
23Nembed ye arinambo arimbed ye bondan kuu dore bunbeni,
ye yaa manmo keriwendan kuu yengkadmaniin.
24Ne ma korondiyiibban weng awini ye inameniib womoniyiibban ye mimyob dowakeniib kuu ye yaa angkimbaraneen,
kwane naningko yaambed ye aromkono kuu arimbed konaniin.
25Nembed karamok kande ye oonimbon aom kowaniin,
kwane ok awaan ari ben ye oonimbon aom nongkobaniin.
26Yembed ne yaa baande yedmaneen, ‘Eb kuu ne Ambe,
ne God, ne Bobni Yaa Burudande Nendi Ye Karub, ne aromkonombon.’ andaneen.
27Nembed ye angkon ne wonob dana areb kine kowaniin,
kwane ye kuu okaddan yi king korem burudande aningko arimbed konaniin.
28Aron korem ye yaa womoniyiibban ye mimyob dowaken keenembaraniin,
kwane ye yaa amob weng ongmaan kuu dowan keraanban.
29Nembed ye awoya ari yaa kuu aron korem ye yumbon kondaniin,
ye dibere ooni ye yumbon kuu Ewen areb aron korem angkimbaraneen kui.
30Kumban ye dana meed kuu ne amob yaa wunekaraniib
o yi kuu wongkaan ye amob yaa awinaibban keraniib
31o dakmaan ye amob yaa domokbaniib
o kwanime andi ye amob yedme kowaan yaa korondaniib kuu,
32nembed yi ambarakmi dowad atdebokbed ukum kondeni
yi arewa kami dowad nong yikyikiibbed wangkaniin.
33Kumban ne mimyob dowaken Dewid yaa keenaan kuu angkon neka kandainban,
kwane ne ma korondiyiibban weng awini ye kerekmen ye yaa angkeen kuu bongmainban.
34Amob weng ongmaan kuu domokbainban,
kwane ne mongkodkonombed komo dakmaan kuu kan kimyen kerainban.
35Naningko karadmo yaambed mimo yedme kowaan,
kukuu Dewid yaa biranainban andi yeman kui,
36Nembed ye awoya ari yaa kuu aron korem ye yumbon kondaniin,
ye dibere ooni ye yumbon kuu aron diberembirimaun areb ne arinambo ari angkimbaraneen kui.
37Kukuu wood diberembirimaun areb aron korem angkimbaraneen,
kwane wood ambid aom diberembirimaun kuu God ye weng yaa anam ande wedmi yeman.” andoon.Selah
38Kumban, o God, ebbed nub king kuu wunekare kan angka korarewen,
ebbed ye ari oiyo bune kinewenman yaa arud darewoob wandewen kui.
39Eb deme karub yaa amob weng ongmewen kuu kibikbed ari kuu awinainban andewen,
kwane king keroon ye kuru ye korok ari dereni yeman kuu monmare ingkud yiri korarewen.
40Ebbed ye siti kuuk kuu bongmeneb
ye aromne angkumonimbon korem monmareewe ambib bob areb kereen.
41Ye aromkono dowan kowe korem kane kane kuyaa dewene burudandimaib kuu ye yiribman ogoodmo yid bimaib,
kwane ye dia doriibdanbed damangkanimbon keruniwen.
42Ebbed ye bondan kuu awande aromkono kondewen,
kwane ebbed ye yaa kwamewen kowe ye bondan korem kuu kubiwen.
43Ebbed ye kerewang arud kuu dingkekoreb,
ana nangmi yaa kuu awanenindo kerewen.
44Ebbed ye nambiri kuu kan korarekoreb,
ye dibere oonimbon kuu kan okad yiri korarewen.
45Ebbed ye kewed yaa yaromkono kuu monmare kiomnoon ye karub areb kerunekoreb,
karakmo kerunewen.Selah
46O Yariman, aron komoyiib? Eb kuu ne yaa aron korem kwane biknembaraneeb dee?
Eb norin kuu aron komoyiib amot areb denembaraneen?
47Ne wadkeri kuu kirodmo dowan keraneen kuyaa ika meene.
Kedi, nimakarub korem kuu idiib kerindeban ye dowad ongmenabewen kii!
48Karub kuu komo kere dobere bobni wedmokban kerene,
bobni yaromkono yaa kuu burudandaneen? Dowan!Selah
49O Yariman, anuk kuu ma korondiyiibban weng awini ye inamen Dewid yaa yedme kowewen kumbed
eb mimyob dowaken darewoob keenewen kuu kuna?
50O Yariman, eb demedan yaa damangkandiwen kuyaa ika meene.
Ambibkin yemoondanbed ne yaa damangkawiwen kumbed ne niindem aom yiminban keraan kuyaa ika meene.
51O Yariman, eb bondanbed damangkawiwen kuyaa ika meene.
ebbed ye ari oiyo bune kinewenman komo komo kamenaboon yaa damangkaniwen kuyaa ika meene.
52 Yariman yaa aron korem amun kerunemborok!
Anam kwanok, kedi, anam kwanok.
Copyright information for `YON