Psalms 92

Yook 92

Yook, God yaningko kankooni yook kui. Sabat aron ari wingki yeman.

 Yariman yaa eso andi kuu amun,
o Korem Burudandoon Arimbed Ye God, ewaningko kankooni ye yook wingki kuu amun kii.
Amkimo korem eb womoniyiibban ye mimyob dowaken daandi kuu amun,
amnoom korem eb ma korondiyiibban weng awini ye kerekmen daandi kangkon amun kii.
Ewaningko kankooni dowad nong angko angkoyiib ye laiya wangki kuu amun,
ewaningko kankooni dowad kuweng amuniib ye haap wangkenabi kangkon amun kii.
O Yariman, eb ambangkenabi kumbed kubaan kuda.
Eb dingkimbed komo komo kamenabewen kuye dowad kubi yook wingkaniin.
O Yariman, eb kamenabi kuu miin darewoob arimbed!
Eb meeni inamen kuu miin indengandengmo.
Inameniibbandan kuu yikaadban,
awon korokdan kangkon kaadkerindeban yeman kukei,
miin arewa kamenabidan kuu kereek areb yemoon yeedere kainimaib,
kwane ambarakmidan kuu yiribman yemoon kerimaib kumban,
yi kuu aron korem dowad ben monmare dowan keraneen.
Kumban, o Yariman, eb kuu aningko darewoob arimbed kwane aron korem doberembaraneeb.
O Yariman, eb bondan kuu duknaniib kuda,
yi korem kuu monmare dowan keraneen kii,
kwane ambarakmidan korem kuu buyokbayok keraniib.
10 Ebbed ne aromkono kuu oksen kiib areb darewoob arimbed kankonewen,
kwane oiyo yeweb kuu ne ari bune kinewen.
11 Ne indobbed wedmendaan ne bondan kuu Godbed nangme burudande doroon,
kwane ne kerendembed wengambaraan miin arewadan ne yaa manmo keriwen kuu nangmoone ikakman kirokmone winiwen.
12 Yorokmodan kuu orom at areb kirodmo kaine amne amunmo dobaraniib,
yi kuu Lebanon ye at sidaa areb amunmo kaine amnaniib kui.
13 Yi kuu at Yariman yambib yaa kibingkemoon areb keraniib,
yi kuu nub God ye kurikuri boyambib yu kuuk wirinimbon aom amunmo dobaraniib kui.
14 Yi kuu kiomnaniib kumban yowiib iremoon areb kere dobaraniib,
yi kuu at nunungiib awoyeebmo areb aromkonoyiib dobaraniib kui.
15 Yi kuu kwane yedmaniib, “ Yariman kuu kangdommo,
ye kuu nub aromkonombon, ye kuu ma arewayiibban.” andaniib.
Copyright information for `YON