Psalms 95

Yook 95

Minime, Yariman yaa kube wingkem.
Nub bobni yaa burudande bindi ye Aromkonoman yaa kube baandem.
Ye arinambo ari menenub eso andenub
kube baandenub ye aningko kankooni yook wingkem.
Kedi, Yariman kuu God darewoob arimbed,
ye kuu god yena burudande King darewoob arimbed keroon.
Okad yu ambokab yiri kuu ye dingki dem aom awine oonoon,
kwane aangko dungkun dungkun mana angka kangkon yeman.
Karamok kuu yeman, amborom kuu yembed ongmoon kowe.
Kwane, ye dingkimbed okad kamkono ongmoon.
Aomnime, ye yaa bumangkane korok kankibine ye aningko kankoonem,
kwane nub ongmenaboonman Yariman yaa bumangkem.
Amborom kuu ye kuu nub God,
kwane nub kuu ebka bangkandimaabdan ye nimakarub,
nub kuu sibi areb yembed dorondare oonimaan.
Kibikee, ye weng wengambiribka

Meriba yaambed kwaniwen areb kwane yiib niindem aom kamkono keraib,
kwane Massa yaa amiibban ye amboon angka kangkon kwaniwen areb kwane keraib.
Kuyaa kuu yiib awoya yiri kuu nembed komo kamaan kuu wedmiwen kuned,
ne yaa komboon darobe kaamone wedmiwen.
10 Weeb 40yiib kuu ne kuu yi yaa kongendembaraan,
kwane nembed yedmaan, “Yi kuu niindem aom kimyen winimaibdan,
kwane ne dobiri kerekmen kuu yangmadandimaib.” andaan.
11 Kowe norin wandeni amob weng ongmeni yedmaan,
“Yi kuu ne yiidkimbon aom awunaibban.” andaan.
Copyright information for `YON