Psalms 97

Yook 97

 Yariman kuu oone doreen kowe, okaddan kuu kubime,
kwane dudbi dudbi angka doriibdan kangkon kubime.
Wiiwiib amnoom doromodiib kuu ye yaa awanewandiwen,
kwane yorokmo ye kerekmeniib anammo wengyundiyiib kuu ye dibere oonimbon ye ambokab.
Ye arinambo ari kuu amoyiib denimaan,
kwane kuye amotbed ye bondan kunaya doriib kuu denendimaan.
Ye imakbed okad kumundin kee nambirimaan,
kwane okad kuu wedmekoru kiringmimaun.
 Yariman kuu aangko aangko dia keraane in yawaak kere okmo keremoon areb kerimaib,
okad kumundin yu Yariman ye arinambo arimbed kui.
Eweniib ambidiib kuu ye yorokmo kerekmen yaa dakmimaib,
kwane ambibkin koremdan kuu ye nambiri wedmimaib.
Kane kane kuruwak god yaa kurikuri kerimaib kuu yi korem yaa karak kondimaib,
kuruwak god yaa kerengkan keriwendan yaa kui.
Goddan korem, yi kuu ye yaa bumangke ye yaningko konkoonime.
Saiyon kuu wengamberekoru kubeen,
kwane Yudadan yi kambong kambong kuu kubiyiib keriwen,
amborom kuu, o Yariman, ebbed wengyundewen kowe.
O Yariman, eb kuu okad yu kumkam korem yaa Burudande Darewoob Arimbed Keroonman,
ebbedmo kuu aningko darewoob arimbed, god yena arebban.
10  Yariman yaa mimyob dowaken keenimaibdan, arewa yaa kuu wangdandunime.
Kedi, ye kerekmen yaambed doriibdan kuu yembed dorondarimaan,
kwane yi kuu yembed miin arewadan yi aromkono aom ben angka nongkobimaan.
11 Nambiri kuu yorokmodan ari yurene
kubi kuu kangdommo doriibdan yaa kondimaan.
12 Kane kane yorokmo doriibdan, yiib kuu Yariman yaa kubenib
ye aningko karadmo kankoonime.
Copyright information for `YON