2 Timothy 2

Ya nesia Yesu Kerisonu kobere meremere uwara ibiawe

Nanu amara Timoti, nanu sina naua. Yesu Kerisoma a durua uteda buna matasuba Danu amarana a idoba buna utebea. Nanu abai we mawetu utebitararo uwara faiyawere nautebita sina webaro naufitate moana uwaraba webitaro naufitae watane. Ana Yesu Kerisonu kobere ami amara ariba uwarama aba siosawere ufitaitana iya da uyate buna ua. Ami uwara emanu ununa dera yawoeta uwarama emaba kobererau webitae iba ami me uwaranu gaukara utawa ami uwaranu gaukara torowa utaita. I waribo utaita uwarama i waribonu we enanari ueta tarawatu nautawa utaitana moko da mubitaita. I waiya ubi amarama gaukara derawere utasuba i waiyanu botai ba sineta ietata ifisu.

I ikiki rarogonu imuegou ufaro yanu Dera Waria Amarama a durua ufiro nesia iwata ufasu. Yesu Keriso imuegou ua! Dana Deiwidinu sisia Amara. Dawa ba eme sinite ba uite nono uietaroma uyari webitaraba uwarama ibo utate na ba dibura amara ari budari utate diburaro oita. Nono Godinu kotofu sina budari utawa. 10 Godinu mune bou ui uwaraba moana uwarama naba siosawere utaitana emanu wakiki ogo imaro Godinu mune bou ui uwara Yesu Kerisobai wirofitate Godinu araetawere orofaro me ibene ibene ibifitae iba na ibo utawa uete watane.

11 Ewa ba sina ea. I sinana edono, Dawaini uieta ari usiba Dawaini me ibifeisi. 12 Danu gaukara kobererau utaisiba Dawaini eme yawofeisi. Dawa ekodifeisina Dawa ya ekodifisu. 13 Ya Danu sina nauteda naue nautawa ari utaisina Dawa Danu torowa Danu sina daido rorowarau uteda Danu torowa ekodawa utasu.

Gaukara kobererau ueta uwara Godinu iboro emanu ifu bobo

14 Godinu iboro inaibeda ewa sina anu uwaraba eno wia, sina aika maika weta iba bebetuma urane yarane da uawe wia. Eno ufitaitana siosawere ufitate emanu torowa ma arama ufitaita.

15 Godinu gaukara bunawere ufaro Godima a kobere gaukara amara webie watane. Godinu gaukara buna uetaba maru da uate Godinu ba sina kobererau wia. 16 Sara siosa sina da webia. Uwarama eno webitaitaba siosawere ueta faiyawere ufitaita. 17 I uwaranu sinana amaimawere ari. Amaima kikiratu utasute derawere utebasu, i ari emanu sina siosawere utasu. Eno waisi amara sadeinu ifuna Aimeniasini Fairitasini. I amara sadeima Godinu sinaba iwawa uteda eno waisi, duburo i uieta uwara uietaroma da uyafitaita. I uietaroma uyareta kowa me sini eno waisiba moana uwarama nauteda Godi imuegou utawa utaita. 19 Godi Danu uwaraba imuetana su tutubu ari. Kimu derawere imutasuba i tutubuna wawana wawana utawa utasu. Godi Danu ere iwata ueta sina eno ibinu, Godima Danu uwara nesia iwata utasu. Nono mui eno, anama Godinu ifu mubisuna siosawere ueta kodifi eno ibinu.

20 Mui dera amaranu suro ietata ieta nabero faiyawere ibinita. Moana naberona goru. Moana naberona siriwa. Moana ba tewo. Moanana ba okia. Moana nabero ubarero kobere ieta odaitate owiga uwaraba mataita. Moana naberona ubarero gamo odaitate mu sanaita. 21 Anama ba me ueta ekodifite danu neno ma kobererau ufisuna dana i goruini siriwa nabero ari amara. I su dera yawoeta amara, Yesu Kerisoma, i amara, nabero ari, mubite Danu gaukara ufie ma kobererau ufisu.

22 I reka uwaranu ba me ueta sineta kodia. I Dera Waria Amaranu neno kobererau uwarabai ibeda emaini kobere ueta uate Godi imuate eme neno arama uate urane yarane da uate merau ibia. 23 Sara siosa yaraneta sina kodia. Uwarama i sinaba yaranaita. Nono Godinu gaukara amara urane yarane da ufite uwara nesiaba kekerama ufite we mawetu uegou ufite ibo da ufite dawaba wasai utaita uwaranu imueta kekerama ma wirofisu. Eno ufisuna Godima i uwara durua ufisuba emanu ba me ueta dubena afu sabitate Godinu ba sina naufitaita. 26 Enoba i uwarama seitanibai ibeda danu unu utebe utebe dawa ekodifitate seitanibairoma Godibai durami ue anibitaita.

Copyright information for `YRB