Acts 2

God Reri Wow re yan yerem.

1Pentikos yabel tem, Jisas rene habobem tatame rem yan wuriwouke duwmenem. 2Agetage rem metem, marye bukre kenkap nelke yam. Etem simenem akek nugwape ken bukrewai rem metem. 3Rem lam, ker taulekap wos temenem. Sitermenem tatame remne er ker taulekap wos etemne wulare wulare etek ten yam. 4God Reri Wow re remne yan etemne gurerem. Wow re remne kitimena newom, rem agerbo agerbo kwomri tumak welepe ek namrebem.

5Er yabel nugwape Juda tatame rem kiyi agerbo nowsel mesegenen Jerusalem kwomke sene yan temenem. Er tatame rem God rene lom yokwobo tatame. 6Rem nelke yam ken bukre kirkir metem, rem yan duwem. Rem metem, God Reri Wow gurerem tatame rem agerbo agerbo kwom tumak namrebem. Etop metem, rem remri kwom tuma kirkir etop metemke, rem danekene sekem. 7Rem op habo op habon op wem. Nemri kwom tuma namrebo tatame rem Galiliri tatame. Rem nemri kwomri tatame bo. 8Rem mapurke neremri agerbo agerbo kwom tumak namrebo? 9Nem agerbo agerbo nowselke yam. Nem Partia nowselke, Midia nowselke, Elam nowselke yam. Rane nem Mesopotemia yokwok, Judia yokwok, Kapadosia yokwok yam. Rane nem Pontus yokwok, Esia yokwok yam. 10Rane nem Frigia yokwok, Pamfilia yokwok, Isip nowselke yam. Rane nem Sairini kwom meknik tetane yokwo Libiak yam. Rane nem Rom nowselke yam. 11Nem Romke yam tame, rane nem Juda tame. Rane nem Juda tame bo, nem Juda tame etemri wule setene tame. Nem rane Krit tame, rane Arebia tame. Nem aboyei, nem God eter nenbo yaku bukre neremri kwom tumak metbo. 12Op wem, rem danekene seken habolaweyem. Rem etemwou etemwou op wemetbem. Berke rem opkap tuma namrebo? 13Op wem, rane rem wekeyen op wem. Neremri tumak namrebo tame rem nugwape ok yaper an sisi pebo.

Pita re tuma wesowem.

14Sene Pita re Jisas reri werasen yi tame letpeis tewo wuri kere tamekene rem teten Pita re tatame remne tuma yaye op wem. Juda tatame. Jerusalemke yam tatame. Kem wan tai. Kem meten labo wos an kemne tuma tobo wesowte. 15Agerbo agerbo kwom tumak namrebo tatame rem sisi be pebo. Et kerwukem. Kerwu nem ok yaper be abo. 16Kem metbo wos, God reri kiyi temenem tuma wesowbem tame, Joel, re op wesowem.

17God re op wem. Nowsel yaper tete yabel matnatek,
an ari Wow rene aboyei tatame remne newote tetane.
Kemri yentenyen, tauryen rem yuri tete wos wesowte.
Kemri muyensi yen tame rem nugsikap labo wos late.
Kemri kar tame rem nugsi tukna late.
18Ari Wow an rene areri yaku nen tatame remne newote.
Newote, rem yuri tete wos wesowte.
19An kitimenakene bukre wos nelke nente tetane.
Kem lan danekene sekete.
Kem nepkene kerkene ker bow nugwapekene late tetane.
20Yabel re be paste. Liyp te kupkap tete.
Etop kiyi tetek, Keryen Yen re ek yate tetane.
21Tatame rem Kwobo La God rene wemete,
re remne sene poten rem pow tete tetane.
(Joel 2:28-32)

22Pita re sene op wem. Juda tame. Kem ari tuma heyar met. An kemne Nasaret kwomri Jisas eterne kemne wesowte. God re Jisas eterne werasen yam, re nugwape yenbo wos nenbem, re kitimenakene bukre wos nenbem, re yaku bukre nenbem. God re rene kitimena bukre newon re er wos nenbem. Kem etop lan sanetene. 23Kiyi God re eterri wuribai purerek habon re Jisas rene keremri letke rasem. Wule yaper nenbem tame rem rene mek kwuren peikkeren ek sam, kem lewouke me lam. Kem remne be sewayem. Opkap, kerem, kem rene pen sam. 24God re Jisas reri sam mus poten septim, re rene wow sene newom, re selek mesegenem. Tame sabo wule et Jisas rene keikerelaweyem. 25Kiyi Devit re Jisas eterne habon op wem.

An labo, God re anne temnas yi tetane.
Re arenkene meknik som tetane.
Re anne kitimena newobo,
eker be wos wuri anne tete, an be aken polpolte.
An be op habo op habote.
26An metekwasbo, an webo tuma an okbop tebo.
An more tame temente,
an ege sin yuri tete wos heyar kowbo.
27Ne ari wow be mesegente tetane,
an gambo kwomke som be temente.
Ne anne be mesegente, neri yaku omuteke nenbo
tame re sele meike be kupoite.
28An heyar somsom temente wule, ne anne peteram.
Ne arenkene temente, an okbop tete tetane.
(Buk Song 16:8-11)

29Pita re remne sene wem. Ari gesmase, nemri warege Devit eterne an kemne wesowte. Re er tuma basrasem, re eter kworer be basrasem. Devit re sam, rem rene pertayem, reri sele som tetane. 30Devit re God Reri Tuma wesowbem tame, eker re God reri puromon teiktem tuma op sanem. Yuri Devit reri gurnan re reri wolbaye poten re kwom panen site tetane. 31God re yuri nente wos Devit re etop metem. Re metem, Krais re sate, God re rene wow sene newote. Devit re etop metem, re op wem. God re Krais rene sou be mesegente, re gambo kwomke sou be tete, re be kupoite. Op wem. 32Nem lam, God re Jisas rene wow sene newom. Nem etop lam, nem kemne etop wesowbo. 33God re rene wow sene newom, re yawun re God eterri let mame yokwori wolbaye yenbok sitene. God re kiyi wemkap, re etop nenem, re Eterri Wow Jisas rene newom. Gwotepte re Eterri Wow rene, nemne werasen nemne gurereye. Kem etop meten laye. 34Devit eter re God reri kwom be yawum. Devit re Krais eterne habon re op basrasem.

Keryen Yen God re areri Keryen Yen rene op wem.
Ne yan ari let mame yokwok site.
35Yuri an wete, ne nereri
peiktame remne teitkwunte.
Ne remne panen site tetane.
(Buk Song 110:1)

36Pita re sene op wem. Kem Israel tatame, kem heyar met. Kem Jisas rene mek kwuren peiken sam. Eter, God Re Lebam Tame, eter, re Haneyen.

Wule yaper mesegenem tatame nugwape remne, rem okke panen waren tirmunen ek nenewayem.

37Tatame rem Pita reri tuma metem, rem wuribai lisokon pap yaper metem. Rem Pita eterkene Jisas reri werasen yi tamekene remne op wemetem. Lakemase, nem berke nente, God re nemne pap mette? 38Pita re sein op wem. Kem wulare wulare kemri nenbem wule yaper kem mesegenkeipte, opkap wule yaper sene mane nente. Sene nem Jisas Krais eterri sigke kemne wulare wulare okke tirmunte. Kem etop nente, God re kemri wule yaper poten septite, re Reri Wow kemne newote. 39Kiyisape God re wem, re Reri Wow keremne, keremri yenkene remne newote wem. Re genek tetane tatame remne kirkir newote wem. Keryen Yen God re kenem tatame etemne re Reri Wow newote tetane. Pita re op wem.

40Pita re agerbo tuma nugwape remne wesowem. Re kwobke op wem. An kemne ei me pebo. God re wule yaper nenbo tatame remne yaper sein nente tetane. Re kemne etemkene yaper kap nente. 41Op wemke, nugwape tatame rem reri tuma omuteke metem, remne okke tirmunen nenewayem. Er yabel nugwape ta ok tame ok (3,000) tatame rem Jisas rene omuteke habom.

Jisas rene habobo tatame rem wuribai wuriwou tem.

42Kwokwos kwokwos Jisas rene habobo tatame rem pap teten Jisas eterri werasen yi tame remri tuma metbem. Rem Jisas eterri sigke awosein awosein kwobo labem, wuriwouke sin awos abem, God rekene tuma namrebem. 43Jisas reri werasen yi tame rem nugwape kitimenakene bukre wos nenbem, nugwape tatame rem lan danekene sekebem. 44Jisas rene omuteke habobem tatame rem kirkir tem, awosein awosein kwobo lan newobem. 45Rem etemri selkene wosbaskene getke rasen rem tokwo potbem. Tokwo potbem, rem woskene bo tatame remne newobem. 46Kwokwos kwokwos rem God Reri Kwoborke duwbem. Rem akek akek yin wuriwouke duwen awos an wuribai yenbo ten boteyatebem. 47Kwokwos kwokwos rem God eterri sig yenbo webem. Nugwape tatame rem remri wule labem, rem remne pap yenbo tebem. Kwokwos kwokwos Keryen Yen God re reri kiyi kenem tatame, rem Jisas rene omuteke habobem. Eker Jisas rene omoteke habobem tatame rem nugwape tebem.

Copyright information for `YSSYAMANO