Luke 3

Tatame remne Okke Panen Waren Tirmunem Tame, Jon, re tuma wesowbem.

(Mat 3:1-12; Mak 1:1-8; Jon 1:19-28)

Taiberius re Rom tatame remri keryen yen temenem. Nabe letpeis tewo letrane (15), re keryen yen som temenem. Pontius Pailat re Judia yokwori tatame remri keryen yen. Herot re Galili yokwori tatame remri keryen yen. Reri maser, Filip, re Ituria yokwo, Trakonitis yokwori tatame remri keryen yen temenem, Lisanias re Abilene yokwori tatame remri keryen yen temenem. Anaskene Kaiafaskene rep God reri Kwoborke yaku nen tame remri keryen yen temenem. Er yabel Jon, Sekaraia reri yen, re tamekene bo emik temenem, God re rene tuma wepeteyam. Jon re Jordan Peik yokwori kwomke kwomke yin tatame remne tuma wesowbem. Re op webem. Kem kemri yaper nenbo wos mesegente, an kemne okke panen waren tirmunte. God re kemri yaper nenbo wos poten septite, re kemne tuma be wete. Re op webem. Kiyi temenem tuma wesowbem tame, Aisaia, re er tuma siglowke op basrasem.

Tame wuri re tamekene bo emik temente,
re tuma yaye op wete.
Kem Keryen Yen reri kelow nowbte.
Kem reri kelow heyar nente.
Wau temente, kem sel yewote.
Kwow bukre temente, kem sel tan heyarte.
Kwur kwartene kelow kem heyar sene rasen sagwunate.
Pa temente kelow kem heyar sene nente.
Op nente, nemne potte Tame rene God re werasen yate. Nem etop late.
Nugwape tatame rem Jon rene lasyam, Jon re remne okke panen waren tirmunte. Re remne op wem. Kem sopo yaperkap, kem wuribai yaperkene tatame. Yuri God re pap yoken tatame remne paku pete, re kemne kirkir pete tetane. Yike kemne amete wem? Kiyi kem wule yenbo nente. Kem op nente, nem sanete, kem yaper nenbo wos mesegenye. Kem mane op wete. Abraham re neremri warege. Re tame yenbo, eker nerem mere, nem tame yenbo. Kemri op webo tuma et tuma sekene bo. Kem Abraham reri nan, kem tame yenbo bo. Reri nenbemkap, kem etop be nenbo. Kemri wuribai yaper kem mesegente, kem tame yenbo ek tete. God re selte, re gwor pa poten tatame nente, sene rem Abraham reri yen tete. Kem bupo kap op wete. Nem Abraham eterri yen. Yuri yate tame re wer sete tamekap. Re me teite, re somok teite. Nugwape me rem supa yenbo be yabo, re er me remne teyen kerke liste tetane.

10 Re op wemke, nugwape tatame rem rene op wemetem. Nem berke nente? 11 Re remne sein op wem. Tame re tame oub pes temente, wuri re tame oubkene bo tame rene newote. Awos tetane tame re etopwou nente. Re awoskene bo tame remne awos newote. Re op wem. 12 Kel potbem tame rem Jon rene lasyam, Jon re remne okke tirmunte wem, rem rene op wem. Tuma Peikbo Tame, nem berke nente? 13 Re remne sein op wem. Kem kel potte, kem keremri keryen yen eter webokapwou potte. Kem kel tep bisi kap ate. Re remne op wem. 14 Ei nai tame rem rene yan op wemetem. Nerem, nem mapurke nente? Re remne sein op wem. Kem tame remne kap pen remri kel ek potte. Kem tame remne tuma kap yikokon nenen remri kel ek potte. Kem kemri yaku nenbo tokwowou kem poten okbop tete.

15 Tatame rem Jon reri tuma metem, rem rene op habom. Kap Jon re Krais, God eter lebam tame? 16 Jon re remne op wem. An kemne okke panen waren tirmunte. Yuri tame wuri re yate tetane, re tame bukre, tame yenbo. An tame eisow. An tame yenbo bo, nes wolbaye wurik be site. An eisow yen, an selke site. Er tame re God Reri Wow kemne newote tetane. Kemri yaper nenbo wos re kerke liste tetane. 17 Rais wes tame rem poten ker petewarbokap, er tame re tatame yaper remne kerke petewarte tetane. Er ker re som eibet tetane. Tame rem rais om poten akek rasbokap, re tatame yenbo remne reri akek panen yite tetane.

18 Op wem, Jon re God Reri Tuma Yenbo remne weiwebem, agerbo agerbo tuma re remne kirkir wesowbem.

Herot re Jon rene ake yaperke wen wurem.

19 Yuri Jon re Keryen Yen Herot rene tuma op wem. Ne neri mase reri ta, Herodias, tene kerepoten panem. Et yaper. Agerbo yaper wos nugwape ne kirkir nenbem. 20 Op wemke, Herot re yaper sene nenem, re Jon rene ake yaperke wen wurem.

Jon re Jisas rene okke tirmunem.

(Mat 3:13-17; Mak 1:9-11)

21 Jon re nugwape tatame remne kiyi okke panen waren tirmunem, yuri re Jisas rene kirkir panen okke waren tirmunem. Waren wayem, Jisas re God rekene tuma namrebem, rem lam, gwan beram. 22 God Reri Wow re nelke bour apkap rene yeren sim. Tuma wuskiy nelke op wem. Ne ari meseke mogul Yen. An nene okbop tebo.

Jisas reri yeiwarege sig.

(Matyu 1:1-17)

23 Kiyi Jisas re yaku tobotam, reri nabe et tame wuriri ok agerbo tameri letpeis (30). Tatame rem rene op habom. Re Josep eterri yen.

Josep re Heli eterri yen.
24 Heli re Matat eterri yen.
Matat re Livai eterri yen.
Livai re Melki eterri yen.
Melki re Janai eterri yen.
Janai re Josep eterri yen.
25 Josep re Matatias eterri yen.
Matatias re Amos eterri yen.
Amos re Nahum eterri yen.
Nahum re Esli eterri yen.
Esli re Nagai eterri yen.
26 Nagai re Mat eterri yen.
Mat re Matatias eterri yen.
Matatias re Semen eterri yen.
Semen re Josek eterri yen.
Josek re Joda eterri yen.
27 Joda re Joanan eterri yen.
Joanan re Resa eterri yen.
Resa re Serubabel eterri yen.
Serubabel re Sealtiel eterri yen.
Sealtiel re Neri eterri yen.
28 Neri re Melki eterri yen.
Melki re Adi eterri yen.
Adi re Kosam eterri yen.
Kosam re Elmadam eterri yen.
Elmadam re Er eterri yen.
29 Er re Josua eterri yen.
Josua re Elieser eterri yen.
Elieser re Jorim eterri yen.
Jorim re Matat eterri yen.
Matat re Livai eterri yen.
30 Livai re Simeon eterri yen.
Simeon re Juda eterri yen.
Juda re Josep eterri yen.
Josep re Jonam eterri yen.
Jonam re Eliakim eterri yen.
31 Eliakim re Melea eterri yen.
Melea re Mena eterri yen.
Mena re Matata eterri yen.
Matata re Natan eterri yen.
Natan re Devit eterri yen.
32 Devit re Jesi eterri yen.
Jesi re Obet eterri yen.
Obet re Boas eterri yen.
Boas re Salmon eterri yen.
Salmon re Nason eterri yen.
33 Nason re Aminadap eterri yen.
Aminadap re Atmin eterri yen.
Atmin re Arni eterri yen.
Arni re Hesron eterri yen.
Hesron re Peres eterri yen.
Peres re Juda eterri yen.
34 Juda re Jekop eterri yen.
Jekop re Aisak eterri yen.
Aisak re Abraham eterri yen.
Abraham re Tera eterri yen.
Tera re Nahor eterri yen.
35 Nahor re Seruk eterri yen.
Seruk re Reu eterri yen.
Reu re Pelek eterri yen.
Pelek re Eber eterri yen.
36 Eber re Sela eterri yen.
Sela re Kainan eterri yen.
Kainan re Arpaksat eterri yen.
Arpaksat re Siem eterri yen.
Siem re Noa eterri yen.
Noa re Lamek eterri yen.
37 Lamek re Metusela eterri yen.
Metusela re Enok eterri yen.
Enok re Jaret eterri yen.
Jaret re Mahalalel eterri yen.
Mahalalel re Kenan eterri yen.
38 Kenan re Enos eterri yen.
Enos re Set eterri yen.
Set re Adam eterri yen.
Adam re God eterri yen.
Copyright information for `YSSYAMANO