Romans 9

Pol re Israel tatame remne pap metem.

An Krais eterri. An tuma sekene webo. An tuma be yikokobo. An God Reri Wowri kulke tetane, eker ari wuribai re anne kirkir webo, an be yikokobo. An pap yaperwai sekene teye. An ari tame beig remne som op habo op habobo. An omuteke selbo, ari tame beig rem Krais rene omuteke habote. Opkap, Krais re anne kirkir wete wem, an reri tatame pelebeten ari tame beig rem ari emi potte wem. An God reri pap yokbo wuleri kulke tete wem, God re remne potte wem. An etop habobo. Israel tatame rem God eterri tatame. Re remne

reri yen webo. Reri yabel rik pasrastene kitimena, re remne peteram. Re remkene tuma natobobem. Re reri wule remne newom. Rem rene lom yokwote wule sekene re remne peteram. Re remne teiktebem tuma re remne newom.
Remri warege rem keryen yen bukre. Krais re more tame tem, eter mere re etemri wuri. Aboyei wos God eterri kulke tetane. Aboyei tatame rem reri sig yenbo bukre som webet. Et sekene.

God re Israel remne nenbemkap, Pol re wesowem.

Kiyi God re Israel tatame remne op wem. An kemne kenem, kem areri tatame. Gwopte nem labo, rane Israel rem God reri tatame be tem. Nem berke wete? God reri wemkap re be nenem o? Yehow. Nem etop be wete. Nem op webo. Aboyei Israel rem God eterri tatame sekene bo. Abraham reri gurnan sokonan aboyei rem God reri yen bo. Kiyi God re Abraham rene tuma op teiktem.

Aisak eterke ne nugwape nugwape gurnan sokote.
(Stat 21:12)

Tuma tobo re gwop. Aboi Abraham eterri yen rem God reri yen bo. Yehow. God re Abraham rekene tuma teiktem yen, etemwou rem God reri yen. God re Abraham rene tuma op teiktem.

Aren weye yabel, an sene yate.
Sara te tauryen ek wurte.
(Stat 18:10)

10 Op tem, yuri Rebeka te taureyen pes warwiyem. Repri ha re neremri warege Aisak. 11 God eterri wuribaike re wete, tatame rem eterri tatame tete. Re be wete, rem reri tatame be tete. Opkap re reri wuribaiwou nenemke, re taureyen wuri kiyi kenem. Yen repne be warwiymenem, rep yenbo wos o yaper wos be wuri nenmenem. Yehow. God re eterri wos nenem, re taureyen wuriwou kenem. 12 Re nawot Rebeka tene op wem.

Lake re mase reri yaku nen tame tete.
(Stat 25:23)

13 God Reri Siglow tuma op webo.

Jekop re mase, an eterne pap yewote.
Iso re lake, an rene pap be yewote.
(Malakai 1:2-3)

14 Nem berke wete? God reri nenbo wule yaper o? Yehow. Yaper bo. 15 God re Moses rene op wem. An tame wuri rene pap mette, ankene mette. An ta wuri tene heyar nente, ankene nente. Et areri wos. 16 Nem op sanete. Tame re selbokap o re nenbokap God re rene be kenebo. Yehow. Eterri wuribaike re ta o tame wuri heyarte o be heyarte. 17 God Reri Siglow op webo. God re Isipri keryen yen rene op wem.

Aren wemke, ne keryen yen bukre tem.
Nerenke an ari kitimena bukre tatame remne peterate.
Nerenke rem ari sig aboyei kwomke kwomke mette.
(Kisim Bek 9:16)

18 Op tem, nem mettene, God re tame wuri rene pap mette, rekene pap mette. Re tame wuri rene wuribai ager newote, rekene etop newote.

19 An habobo, kemri wuri re anne op wemette. Tame rem God reri wemkap etopwou nenbo, God re remne ker mapurke raste? Re Keryen Yen God, eker nem rene mapurke nasweite? 20 Ari tame nowu. Ne yike, ne Keryen Yen God rene sewaite, re opkap wule kap nente? Tame re ou rasbo, er ou re ou rasbo tame rene op be wemetbo.

Mapurke ne anne gwopkap nenye? Yehow.
Re op be wemetbo.
(Aisaia 29:16)

21 Ou rasbo tame re eterri purerek etop nenbo. Re ou sel poten ou pes nente, ou wuri et miktou, wuri et ou towbo ou. Et ou rasbo tame eterri wos.

22 God eter mere, re etopkap nenbo. Re pap yokbem tatame remne pik pete nenem. Re reri pap yokbo wulekene reri kitimena bukrekene remne peterate habom. Sene re remne pap meten eipye be pem. 23 Opkap, re reri yabel rik pasrastenekap tatame remne kirkir peterate selem. Eker re reri pap metbo tatame nemne kiyi heyarem, re reri yabel rik pasrastene wule yenbo nemne ek newobo. 24 Nerem, nem er tatame. God re nemne wepoten heyar nente wem. Rane nem Juda tatame. Rane nem Juda tatame bo. 25 God Reri Tuma wesow tame, Hosea, reri op basrasem siglowke God re op webo.

Tatame rem ari tatame be temenem,
sene an remne op wete.
Kem areri tatame.
An remne pap be yewom tame beig,
sene an remne op wete.
Kem areri meseke mogulri.
(Hosea 2:23)

26 Remri temenem emik an remne op wem.
Kem areri tatame bo.
Eter emik an remne sene op wete.
Agerbo tatame rem kemne wete,
kem somsom tetane Keryen Yen God reri yen.
(Hosea 1:10)

27 God Reri Tuma wesowbem tame, Aisaia, re Israel tatame remne habon op wem.

Israel tatame rem nugwapewai tete.
Rem kersepkap ok barri senkap nugwapewai temente,
Haneyen re etemri rane etemnewou sene poten heyar nente.
28 Ekeya. Haneyen re nowselri tatame remne
tuma nenkeipem.
Sene re remne agetage pen sate nenbo.
(Aisaia 10:22-23)

29 Aisaia re yuri tete wos kiyi op basrasem.

Kitimena Sikabewaikene
Haneyen re nemri yennan remne ab pete wem,
nem Sodomkene Gomorakene rem be
temenemkap wem.
(Aisaia 1:9)

Israel tatame rem God rene omuteke be habom, eker rem tatame yenbo be tem.

30 Sene nem op webo. Juda bo tatame, kiyi rem God reri tatame yenbo tete be habobem, sene rem omuteke habobo. Eker God re remne op webo. Kem areri tatame yenbo. 31 Israel tatame rem Moses Reri Wule muresen nenen tatame yenbo tete nenlaweyem, rem God reri tatame yenbo be tem. 32 Berke rem God reri tatame yenbo be tem? Rem omuteke habobo wule be sem. Rem etemri murek sem. Opkap rem tame tubanebo pa etek tubanem.

God Reri Siglow tuma re er pa rene op webo.
Metye. An Pa wuri Saion kwowke rasbo.
Eter Pak tatame rem tewo tubanete,
rem selke waren tuknate.
Tatame rem er Pa rene omuteke habote,
rem tewo be tubanen rem be waren tuknate.
Rem be semarkute.
Rem pap yaper be tete.
33 (Aisaia 28:16)

Copyright information for `YSSYAMANO