Hebrews 10

God erne kiyi kwar pebetem wule e wule yaper beke peten sepit.

1God ere Moses erne newom wule e wule seken berai. Nema Moses erne newom wule labe, nema yuri tete wos yenbo kerawaike labe. Moses erne newom wule sebe tame eme nabek nabek bulmakau nep som kwar pebe. Etep tebe, ete wule ere God erne sukye worabe tatame emri wule yaper mapeke akei peten sepit. Eme tatame yenbo mapeke te. Berai. 2Beke eme God erne kwar som pebe? God erne sukye worabe tatame emri wule yaper God ere peten sepitin eme tatame yenbo tete wom, eme emri wule yaper sene beke pauk abo. Etep temente wom, eme God erne kwar sene beke pauk pe. 3Eme emri wule yaper som abobe, eke nabe nabek eme God erne kwar som pebe. 4Metye. Bulmakau nepken meme nepken e wule yaper mapeke peten sepit.

5Etepkap, Krais ere gwote selke yam yabel ere God erne etep wom.

Tatame eme nene wos newobe, eme bulmakau pen nene kwar pebe, ne etep beke abo. Eke ne ane more tame etemri wusom ane newon an more tame tem.
6Tatame eme bulmakau o sipsip pen wiwi kerke lisin nene kwar pebe. Eme epkap epkap kwar pebe wule nenen etemri wule yaper tukte abobe, eke eme kwar pebe. Eme etep nenbe, ne emne kenake beke metekwas.
7Sene an emne etep wom. God, an neri selpapke abobekapwou tobote yawo. Kiyi eme ane abon siglouke bas rasemkap, an neren wobekap etep tobote.
Krais ere etep wom.
8Moses erne newom wule etemri kwar pebe wule ere kiyi abon etep wom. God, tatame eme nene kwar pebe, nene wos newobe, ne etep beke abo. Moses erne newom wule eme gwopkapke tebe. Eme bulmakau pen kerke lisin etemri wule yaper tukte abobe, eke eme kwar pebe. Ne etep labe, ne beke metekwas. Etep wom. 9Sene ere etep wom. God, an neri selpapke abobekap tobote yawo. Etep wom, ere kiyiri kwar pebe wule teitkwunem. Teitkwunem, ere God eter yuri wom wule noub meten tobobetem. 10Jisas Krais ere God eter wom porerekap nenbetem. Tewo wurik ere eri wusomke God erne kwar pem, eke nema tatame yenbo tem.

Krais ere God erne kwar pem, ere nemri wule yaper kuyese peten sepitim.

11Kwokwos kwokwos God eteri akek yaku kere tame eme teten yaku kerebetem. Kwar pebe wule eme etepwou tewok tewok nenbetem. Etep tebetem, eme tatame etemri wule yaper kuyese beke peten sepit. 12Krais eter, tewo wurisubu ere God erne kwar pen tatame emri wule yaper geruwum. Ere akei geruwun omom. Akei geruwun omom, ere God eteri piseit yekwok yin siten. 13Ere etek sin kouten, God ere eteri peiktame emne peten eri tewo kulke pete wurte. 14Krais ere God erne tewo wurik kwar pemke, ere tatame etemri wule yaper peten sepitim, eme tatame yenbo som temente.

15God Eteri Wou ere nemne kir etep wobe.

16Aneyen ere etep wom. Sene an gwopkap tuma Israel tatame etemken namderaste. E yuri tete yabelke an emne gwopke nente nenbe. Ari wule an emri porerek raste. Ari wule an etemri selpapke bas raste.
17Etep won, ere sene wom.

Emri nenbetem wule yaper an emne akei wan gette. An sene beke kip abo.
Etep wom.
18God ere tatame etemri nenbetem wule yaper sene beke kip abo, eke eme kwar sene beke kip pe.

Nema God erne kenawaike abon erne mekinke yin tete.

19Ari geisimase, Jisas ere etep nenem, eke nema eteri nepke nema sebera beke ya, eke nema God eteri Ake Puri Yenbosubuwai kuyese wurbe. 20Jisas ere nemne som temente wule ager nemne peteram. Eri wusom e God eteri ake purik eisten matekap. Jisas ere sam, ere e mate tagworasem, nema God eteri ake yenbowai kuyese wurbe. 21Jisas ere nemri apeilake. Ere God eteri ake, eteri wakse emne kom panen sibe. 22Eteri nep ere neremri porere yaperke akei neberam, nema porere yenbo sene tem. Ok yenbok ere nemne baptais ok wiruwum. Eke, nema porere yenbo kenawaike abon God erne mekinke yin tete. 23God ere nemne womkap, ere etepke tete nenbe. Eke neremri kouten wos, nemri wusoube wos nema etep kenawaike abote. Nema porere pes mane tete. 24Nema awoawo abon wule wurisubu sen etep wote. Kem geisimase emne pap yewon noub nente. Kem yaku yenbowou kerete. 25Kem wurisubuk sin God erne sukye worabetete. Tatame kau eme etep beke nen, e yaper. Kem awoawo pap yenbo met tuma wobetete. Aneyen eter sene yate yabel mekin mekinye, eke kem ete wule muresen nenbetete.

Nema God Eri Yen erne mane magel taite.

26God eteri tuma seken metbe tatame eme etemri porerek wule yaper som nenbetete wote, eme God erne kwar sene mapeke pen God ere emri wule yaper mapeke peten sepit. 27Berai. Ete tatame eme me aken God ere emne tuma namdete yabel koumente. Ye. God ere eteri peiktame emne ker eisauke liste nenbe. 28Moses erne newom wule sebe tatame eme gwopke nenbe. Tame eme Moses eri wule tousibe, akeite tame pes o mur eme etep labe, eme emne tuma namdebe. Eme emne kobo beke kip la, eme emne pen sabe. Eme etepwou nenbe. 29Eke God Eri Yen erne magel taibe tatame God ere emne kenake pete nenbe. Kiyi God eteri namderasem tumakap Krais eri nepke ete tatame emri wule yaper akei eyi geruwun eme yenbo tem. Etep tem, ete tame sene eme Krais eri nep yaper wobe. God eteri pap yewobe Wou erne sene e tatame eme erne tuma yaperwai wobe. Ete tatame emne God ere emne kenake pete nenbe. 30God eteri wobekap nema metten. Ere etep wobe. Aren, an emne yaper sene nente. Aren, an etep nente nenbe. Sene ere etep wobe. Aneyen ere eteri tatame emne tuma tasen namdete nenbe. Etep wobe. 31Som som temente God ere tatame emne yaper awosein nente wote, eme kenake akte nenbe.

Nema God eri tuma kenawaike som abobetete.

32Kiyi kem God eri tuma kenawaike meten Kristen tem. Ete yabel kem sene abote. Ete yabel tatame eme kemne yaper nenbetem, kem mus eisau metbetem. Mus metbetem, kem muresen teten taskwurbetem. 33Kau yabel eme kemne tatame nogwape etemri bitimik won teten eme kemne tuma workwoyeken resen kemne pebetem. Kau yabel eme kemri Kristen tatamesip emne etepkap yaper nenbetem, kem pap yaper tebetem. 34Kristen geisimase eme ake yaperke temenem, kem emne pap yewon noub eyarbetem. God eteri peiktame eme kemri wosbas petbetem, kem pap yaper beke te. Kem pap yenbo som ten kenawaike etep abobetem. Yuri God ere nemne som temente wos yenbowai newote nenbe. Etep abobetem.

35God ere kemne noubwai nente nenbe, eke kem Kristen kenawaike abobe wule mane mesginte. 36God eri wom tuma kem som tobobetete. Kem mane bwolken tete. Eri tuma kem beke kip mesgin, God ere newote wom woskap kem etep pette nenbe. 37God eri siglou e etep wobe.

Kerake tete, yate wobe tame ere yate.
Ere som beke te.
38Ari kenem tatame yenbo eme ane kenawaike som abotete, eme noub som temente. Etemri kau eme ane mesginte, an emne beke metekwas.
Etep wobe.
39God erne mesginbe tatame eme yaper tete nenbe. Nema etepkap berai. Nema God erne kenawaike som abobe, eke nema noub som temente nenbe.

Copyright information for `YSSYAWU