Mark 1

Baptais ok wirubetem tame, Jon, eteri wusoubetem tuma.

(Matyu 3:1-12; Luk 3:1-9; 3:15-17; Jon 1:19-28)

1Jisas Krais ere God Eteri Yen. Eteri tuma yenbo gwotek bas rasten. 2God eteri tuma yenbo gwopkapke tem. Aisaia ere womkap etep yam. Aisaia ere God eteri kiyi temenem tuma wusoubetem tame, ere tuma kiyi siglouke bas rasen, etep wom.

Kem wan raste. Gwo tame ere ari tuma wusoube tame, an erne won yate, ere taresin yin ari tuma wote, ere neri yate kelu noub eyarte.
3Tame wuri ere tameken berai emik temente, ere noubke etep wote. Keryen ere yate. Kem eteri yate kelu noub eyarte. Etepke wote.
4Aisaia ere etep bas rasem, etepkap Jon ere etek yam. Yam, ere tameken berai emik yan temenem, ere tatame emne baptais ok wirubetem, ere tuma wusoubetem. Ere etep wusoubetem. Kem keremri wule yaper mesgintek, an kemne baptais ok wirubetete. Baptais ok wirubetete, God ere keremri wule yaper peten sepitite, ere kemne beke tuma namde. 5Etep wom, Judia nowselri tatame, Jerusalem komri tatame eme akei Jon eterne yin lam. Eme emri nenbetem wule yaper wusowumke, Jon ere emne Jordan peikke baptais ok wirubetem.

6Jon ere kelworken tame berai, ere kerap yaper, kamel por wuske nenem tame oub warbetem, ere somo kep borke sibetem. Sibetem, ere boulri wos yaper abetem. 7Etep tem, ere tuma etep wusoubetem. An taresin yam, tame wuri ere tiptiwun yate. Eter ere tame eisau, tame yenbowai. An tame eisau berai. An tame yenbo berai, nesa situk wurik beke si. An yen nebule, an selke site. 8An kemne okke wirube. Yuri yate tame ere kemne God Eri Wou kemne newote.

Jon ere Jisas erne baptais ok wiruwum.

(Matyu 3:13-17; Luk 3:21-22)

9Sene Jisas ere Nasaret kom mesginin yim. Nasaret kom e Galili distrikke tetan. Mesginin yim, ere Jordan peikke yim, Jon ere erne etek baptais ok wiruwum. 10Jordan peikke ok wiruwumke, Jisas ere peik mesginin barke wayen teten ere nerulam, ei gwan beram, God Eteri Wou ere nelke ap bourkap yan yeirin, Jisas eteri gwarek yeirin sim. 11Yeirin sim, tuma wuri nelke etep wom. Ne Ari Yen yenbowai. An nene metekwasbe. Etep wom.

Satan ere Jisas erne seilabetem.

(Matyu 4:1-11; Luk 4:1-13)

12God Eteri Wou ere Jisas erne won yim, ere tameken berai emik yim. 13Yim, eikina abona tame tabe por toub eme etek temenem. Neirken yabelken nogwape (40-pela) ere etek temenemke, gabo etemri keryen, Satan, ere erne seilabetem. Seilabetem, God eteri komri tame eme yan erne eyarem.

Jisas ere yaku yenbo Galilike yin tasen kerem.

(Matyu 4:12-17; Luk 4:14-15)

14Yuri Jon ere ake yaperke temenemke, Jisas ere Galilike yin God eteri tuma yenbo etek wusowun etep wom. 15Awo tobo teye. God ere Keryen, ere kom panen site nenbe. Kem porere yaper mesginte, sene kem porere yenbo pette. Kem God eteri tuma yenbo meten kenawaike abote. Jisas ere etep wom.

Jisas ere omyen petbetem tame epe pes epe pes emne wopetem.

(Matyu 4:18-22; Luk 5:1-11)

16Jisas ere Galili peik kupa barke sewurbetem, ere lakemase Saimonken Andruken epne lam. Lam, epe omyen petbetem tame, epe wuli peikke rasen omyen petbetem. 17Petbetem, Jisas ere epne etep wom. Kep wayen arenken yite. Kiyi kep omyen petbetem. Omyen petbekap, sene an kepne peterate, kep tatame emne etepke pette. Pette, eme ari wakse tete. 18Etep womke, agetage epe etepri wuli mesginin eterken yim.

19Ere epkera sene yibetem, ere lakemase Jemsken Jonken epne lam. Epe Sebedi eteri yen. Lam, epe perek sin wuli let mate nabetem. 20Let mate nabetem, Jisas ere epne yate wom. Womke, epe ar erne eteri yaku kerebetem tameken eme perek temenem, epe emne mesginin Jisas eterken yim.

Gabo gulelemenem tame.

(Luk 4:31-37)

21Jisas ere anepoi tameken eme yim, eme Kaperneam komke yan tem, ege si yabel Jisas ere God eteri akek wurin tatame emne tuma wusowum. 22Wusowum, eme eteri tuma metem, eme wouken akem. Ere emne Moses eteri wule wusoubetem tame etemri wusoubetemkap beke wusou. Keryen emri wusoubetemkap ere emne etepke wusoubetem, eke eme wouken akem. 23Ere emne wusoubetem, tame wuri, erne gabo gulelemenem tame, ere God eteri akek yan woram. 24Yan woran, ere noubke etep wom. Jisas, ne Nasaret komri tame. Ne kap nesetne be wos nente? Kap ne nesetne botkwute yawo, o berai? An nene laten. Ne God eteri tame yenbo. Ere nene won yam. 25Etep womke, Jisas ere erne wom. Ne elen me te. Ne tame erne mesginin yite. 26Etep wom, gabo ere tame erne selke teren, ete tame ere let tewoken negnegem. Negnegem, gabo ere taye piten tame erne mesginin yim. 27Mesginin yim, tatame nogwape eme etep lam, eme wouken akem, eme etemwou etemwou etep wolam. E mapkap tame? Ere mureken keryenkap wobe. Gabo eme eri tuma metbe, eme tame emne mesginin amebe. Etep wom. 28Agetage Galiliri tatame akei eme Jisas eri nenemkap eme akei metem.

Jisas ere Pita eteri owi tene eyarem, te yenbo tem.

(Matyu 8:14-15; Luk 4:38-39)

29Jisas ere eri anepoi tameken eme God eteri ake mesginin yin Saimonken Andruken epri akek yin wurim. Jonken Jemsken epe kir yin wurim. 30Yin wurim, Saimon eteri owi te kapoyi keyem, te tiyke tuknamenem. Tuknamenem, eme Jisas erne etep wom. Gwo ta te kapoyi keiwo. 31Etep womke, ere yin tene let keren nenewayen siruwum. Siruwum, te yenbo tem, te wayen emne iyawu keren emne awos newon am.

Neir teketem, Jisas ere tatame nogwape emne eyarbetem.

(Matyu 8:16-17; Luk 4:40-41)

32Yabel waremke, tatame eme let yaper tewo yaper te tatame, gabo gulelemenem tatameken emne panen Jisas erne yin lam. 33Yin lam, nogwape komri tatame eme ake eruke yan tetyewom. 34Tetyewomenem, Jisas ere eikina abona let yaper tewo yaper te tatame emne eyarbetem. Gabo eme tatame nogwape emne gulelemenem, ere emne akei won yibetem. Gabo eme Jisas erne lam, ere emne wotakem, eme eri sig mane wusoute.

Jisas ere tuma yenbo Galili kom komke wusoute yim.

(Luk 4:42-44)

35Neir tepke Jisas ere wayen yim, ere tatameken berai emik yim, ere Apei God eterken tuma namdebetem. 36Namdebetem, Saimon, eterken temenem tame kau eme erne sopen yim. 37Yin lam, eme erne etep wom. Tatame nogwape eme nene sopbe. 38Ere emne etep wom. Nema yi. Nema akeite akeite mekinke tetan komke yite. An emne tuma kir wusoute. An ete yaku kerete yam. 39Etep wom, ere Galili yewok yin sewurbetem, ere God eteri akek wurin tuma wusoubetem, gabo emne won amekirbetem.

Jisas ere numa pe tame wuri erne eyarem.

(Matyu 8:1-4; Luk 5:12-16)

40Numa pe tame ere yan gulke pan Jisas erne etep wom. Ne abote, ne ane noub nente. 41Etep womke, Jisas ere erne kobo kenake lam, ere erne let kerelan etep wom. An aboye. Ne yenbo te. 42Etep womke, eter wobetem tuma tepken erne pemenem numa eme sok ten, ere yenbo tem. 43Yenbo tem, Jisas ere erne etep wom. 44Metye, an nene noub wote. Agetage ne God eteri akek yin neri wus God eri akek yaku kerebe tame erne peterate. Moses ere kiyi womkap ne etep nente, ne God erne kwar pete. Etep nente, tatame eme late, eme mette, nene pemenem numa sok teye, ne yenbo tetan.

45Jisas eri wom tuma ete tame ere metem, ere beke tobo. Ere yin tatame nogwape emne wusowun sewurem. Wusowum, tatame eme Jisas erne late wom. Etepke Jisas ere kom wuri mapeke yi. Tameken berai emik ere etek yin temenem. Ere etek temenem, komri komri tatame nogwape eme eterne etek yin lam.

Copyright information for `YSSYAWU