Revelation of John 15

God eri komri tame ep yekwo let ep yekwo let bor pes kei (7-pela) eme wurare wurare eme tatame emne yaper nente wos semenem.

God eri komke akeite eisau wos wuri an sene lam, an wouken aken ep abo ep abom. An lam, God eteri komri tame ep yekwo let ep yekwo let bor pes kei (7-pela) tame wurare wurare eme nowselri tatame emne yaper nente wos semenem. God ere pap wayem, ere etek tete yaper wos ere kiyi womenem. Ete yaper wos akei nenen omote, e ab ete. Ere tatame emne yaper sene beke kip nen. God ere pap sene beke kip waye.

Sene an peik kupa eisau lam. Peik mei le kuyese nerewarbe. Ok ker etek eibetem. An lam, tatame eme ete peik kupa keraruke tetmenem. Ete tatame eme boul base eri tame nel, eri sigri namba emne teitkwunem tatame. Keraruke tetmenem, God ere emne newom gawu me eme letke semenem. Letke sen, eme sekwo lombetem. God eteri yaku kerebetem tame, Moses eri sekwo eme lombetem, Sipsip Yen eteri sekwo eme lombetem, eme etepke lombetem.

Keryen God, mure eisauken God, ne yaku eisau, yaku yenbowai kerebe.
Ne akei nowselri tatame etemri Keryen, ne wule yenbo, seken nenbe.
Keryen, nerenwou ne wule yenbosubuwai nenbe. Eke tatame nogwape eme nene kwokwos kwokwos me abobe. Eme neri sig yenbowai wobe.
Ne tame yaper emne yaper awosein nenbe, tame yenbo emne ne yenbo awosein nenbe. Ne wule yenbo nenbe.
Tatame nogwape eme etep laten, eke akei nowselri tatame eme yan nene sukye worabe. E sekenwai.
Eme etepke lombetem.

Sene an lam, God eteri Hevenke tetan ake eisau eri ake puri yenbowai eri eru eme latem. God ere ete ake puri yenbowaike temenem. Latem, God eteri kom tame ep yekwo let ep yekwo let bor pes kei (7-pela) eme ek yan woram. Eme wurare wurare eme tatame emne yaper nente wos semenem. Emri tame oub geipa, tame oub yenbo warmenem, eme golke nenem somokep mopke simenem. Kelpe tetan wos epe pes epe pes emri wuri ere yan God eteri komri tame ep yekwo let ep yekwo let bor pes kei (7-pela) emne golke nenem ware wurare wurare newon yam. Som temente God eteri pap wayebe wule ete warek ep yekwo let ep yekwo let bor pes kei (7-pela) etek yewomenem. God eteri mure, eteri wule yenbosubuwaike, ker bou etek wayen ake eisauke temenem. Eteri komri tame ep yekwo let ep yekwo let bor pes kei (7-pela) tame, eme ep yekwo let ep yekwo let bor pes kei (7-pela) wos yaper omosatek, tatame eme ete ake eisauke sene ek wurte.

Copyright information for `YSSYAWU