Revelation of John 7

God ere Israel tatame nogwape (144 tausen) emne eteri sig etemri mokwok basen yam.

Sene an lam, God eri komri tame epe pes epe pes eme tetmenem. Wuri ere yale yekwok tetmenem, wuri ere you yekwok tetemenem, wuri ere war yekwok tetmenem, wuri ere yawor yekwok tetmenemm. Etek temenem, tame epe pes epe pes eme poliken maryeken nubke wotaken, poliken maryeken nowselke beke ya, kerkerekap okke beke ya. Mena mane eme lom beke ya. Poli berer tem. Kiyi God ere ete tame epe pes epe pes emne selken wolkerkap okken yaper nente wom. Sene an lam, God eteri komri akeite tame wuri ere yale yekwok wayem. Wayem, ere som temente God eteri sig bas rasmenem wos semenem. Ere ete tame epe pes epe pes emne nubke etep wom. Wai. Kem nowsel, peik wamo wolkerkap ok, nowsel mane kiyi sag soute. God eteri yaku kerebe tatame emri mokwok an God eteri sig kiyi yin baste. Etep tetek, sene kem epe nowsel sag soute. Etep wom. Sene an lam, ere God eteri sig tatame nogwape (144 tausen) etemri mokwok basem. Israelri tame supa akei etemri tatame etemri mokwok ere sig basem.

Juda tame supa eri wakse nogwape (12 tausen) emne ere basem.
Ruben eri wakse nogwape (12 tausen) emne ere basem.
Gat eri wakse nogwape (12 tausen) emne ere basem.
Aser eri wakse nogwape (12 tasen) emne ere basem.
Naptali eri wakse nogwape (12 tausen) emne ere basem.
Manase eri wakse nogwape (12 tausen) emne ere basem.
Simeon eri wakse nogwape (12 tausen) emne ere basem.
Livai eri wakse nogwape (12 tausen) emne ere basem.
Isakar eri wakse nogwape (12 tausen) emne ere basem.
Sebulun eri wakse nogwape (12 tausen) emne ere basem.
Josep eri wakse nogwape (12 tausen) emne ere basem.
Benjamin eri wakse nogwape (12 tausen) emne ere basem.
Ete tatame emne God eri sig ere emri mokwok akei basen yam.

Tatame nogwapewai eme Apei God erne sukye worabetem.

Sene an lam, tatame nogwape eme wurisubuk simenem, emne mapeke sar. Nogwapewai. Eme akeite akeite kantriri tatame, eme akeite akeite wus, eme akeite akeite tame supa, eme akeite akeite tuma namdebetem tatame. Eme geipa tame oub lagwu waren yamenem, eme rerewuyi setirmenem. Setirmenem, eme Keryen God eteri wolbaye bitimi yekwok tetyewomenem, eme Sipsip Yen eteri bitimik teten noubke etep wom.

10 Neremri Keryen God ere wolbayek siten, Sipsip Yen ere kir tetan. Etep, epe nemne sene petem, eke nema yenbo tem. Etep wom.
11 God eteri komri tame nogwape eme Keryen eri wolbaye ganke teten ouyeimenem. Apeilake tameken kelpe temenem wos epe pes epe pesken eme etek kir teten ouyeimenem. Sene eme gulke pan yan God erne sukye worabetem. 12 Eme etep wom.

Tuma sekenwai. Nema neremri God erne pir wobe.
Nema erne tuma yenbowai wobe. Eri porere sapekenwai.
Nema erne pir wobe, eri sig yenbo wobe. Ere neremri Keryen eisau.
Eri mure sapekenwai. Etep som me temenbe. E sekenwai.
Etep wom.

God eteri yaku kere tatame eme mus sene beke kip met.

13 Sene apeilake tame wuri ere ane etep wometem. Tame oub lagwu geipa warten tatame eme eike? Eme mari? 14 An erne awosein etep wom. Aneyen, beke ne ane wometbe? Neren, ne metten. Ere ane awosein etep wom. An nene bepou me wometbe. An metten. Alwo naibetem yabel ete yabel tatame eme mus kenake metbetem. Emri tame oub lagwu eme Sipsip Yen eteri nepke keyan, tame oub geipasubu tem. 15 Eke eme God eteri wolbaye bitimi tobok tetyewoten. Neirken yabelken eteri ake eisauke eme eri yaku kerebe. Keryen eteri wolbayek siten tame ere etemken temente, ere emne noub lakerebetete. 16 Eme sene kwoi beke kip sa, eme sene wak sok beke kip te. Yabel ere emri wuske sene beke kip pas, eme wus ker sene beke kip ei. 17 Keryen God eri wolbaye borborke tetan, Sipsip Yen ere emne noub lakerete. Tame ere sipsip noub lakerebekap, ere emne etepke noub lakerete. Ere emne etek me sekbe okmoi ok yenbok panen yite. Yite, eme ete ok ate, eme noub som temente. God ere emne akei le ok saketete, eme sene beke kip kera. Eme metekwasen som temente nenbe.

Copyright information for `YSSYAWU