Psalms 101

Kɨla amɨn madep dakon yaŋ teban tok

Dewit dakon kap kɨnda.

1Yawe, nak amɨn do but dasi galak taŋ yomɨsal, ae amɨn dakon aŋpak kokwin kɨlegɨsi asal uŋun do kap yokeŋ.
Nak gak aŋkɨsik do kap yokeŋ.
2Nak aŋpak kɨlegɨ baŋ gɨn yolgeŋ.
Yawe, ni bɨsapmon gak abɨŋ nak aŋpulugoki?
Nak naga da yutnon aŋpak kɨlegɨ baŋ gɨn abeŋ.
3Nak yo ɨŋani kɨnda dɨmasi kokeŋ.
Piŋkop manji ɨmaŋ amɨn dakon aŋpak do dɨma galak tosot.
Nak uŋun gat kaloŋɨ dɨma agɨpneŋ.
4Nak butnokon da yokwi dɨ dɨma abeŋ.
Ae aŋpak dɨma agagɨ do nandak nandak dɨma abeŋ.
5Nak da amɨn do yaŋba yokwi tok aŋ amɨn obɨsi paŋupbal akdɨsat.
Iyɨ do nandaba wɨgɨsak amɨn gat dɨma egɨpneŋ.
6Nak amɨn Piŋkop yolgaŋ uŋun baŋ galak taŋ yobeŋ, ae uŋun gat gɨn nak da yutnon tagɨ egɨpneŋ.
Amɨn toktogɨsi aŋpak kɨlegɨ aŋ, uŋun amɨn dagɨn oman amɨno egɨpni.
7Jamba but amɨn nak da yutnon dɨma egɨpni, ae top yoŋ amɨn nak gat dɨma egɨpneŋ.
8Gɨldarɨ gɨldarɨ amɨn yokwi mɨktɨmninon ekwaŋ uŋun paŋupbal ak do pi abeŋ.
Nak da amɨn aŋpak yokwi aŋ amɨn wɨrɨrɨgapbo Yawe da kokup papmon saŋbeŋek dɨma egɨpni.

Kap 102

Copyright information for `YUT