a102.25-27Ibr 1.10-12

Psalms 102

Amɨn kɨnda da jɨgɨ paŋek bɨsit asak

Amɨn kɨnda jɨgɨ paŋek tapmɨmni mɨnisi aŋakwan Yawe da aŋpulugosak do bɨsit agɨt.

Yawe, bɨsitno nandaki. Nak gak da aŋpulugoki do yaŋ tɨdosot.
Nak dakon kunamno nandaŋ nabi.
Jɨgɨ madepsi pakeŋ bɨsapmon dɨma gandakeŋ yaŋ do dɨma pasɨlgi.
Bɨsitno nandaki.
Gak do yaŋ tɨdokeŋ bɨsapmon tepmɨsi nandaŋek nak aŋpulugoki.
Egɨp egɨpno uŋun mukwa da yaŋ bɨsap pɨsɨpmɨsok taŋek pasɨlgaŋ uŋun yombem.
Kɨndap madep da sosok uŋun da tɨlak gɨptɨmno tepmɨsi sosok.
Amɨn da joŋ kɨbɨdaŋbi bamoŋ uŋudeŋ nak yokwisi egɨsat.
Do jap nok do dɨma galak tosot.
Nak iyoŋ iyoŋ yosot, ae gɨptɨmno madep dɨma, nak kɨdarɨ gɨnsi.
Nak sɨŋgɨŋ da yaŋ mɨktɨm kɨbɨrɨ tɨmon yokwisi egɨsat.
Ae kalbi dakon mɨnam da kokup amɨn da aŋtasɨk abi do amɨn da arɨpmɨ dɨma egɨpmɨ tɨmon ekwaŋ uŋun da arɨp egɨsat.
Nak dɨpmɨn potpot tamokon pokdot, mani dabɨlno si sɨŋtaŋ egɨsak.
Bupmɨsi, nak mɨnam kɨnda da yut kwenon yɨkdak uŋun da tɨlak nak naga gɨn egɨsat.
Gɨldat kɨnda kaloŋ uwal da nak gen yokwi nayaŋ.
Tasɨk tokeŋ do yaŋek yaŋsul aŋ namaŋ.
Gak nak do butjap madepsi nandɨsal, do abɨlak baŋgɨn nosot, ae dabɨl pakbino kapmon maŋba pakbi gat kɨsi nosot.
Nak sɨbɨt sɨbɨt baŋ yaŋ abɨdaŋ mabɨ tɨmɨ kɨndakon kɨgɨm.
11 Pɨlɨndo gɨldat da pɨgɨsak uŋun da arɨpmon egɨp egɨpno bɨsap pɨsɨpmɨsok gɨn.
Nak joŋ da kɨbɨdoŋ uŋun yombem.
12 Mani Yawe, gak kɨla amɨn madep toktogɨsi egɨsal.
Mango uŋun wukwisi, do mɨŋat amɨnyo don altokdaŋ uŋun da gak nandaŋ gamdaŋ.
13 Abɨsok abɨŋ Saion kokup pap do bupmɨ nandaŋ ɨmɨŋek aŋpulugoki.
Bupmɨ nandaŋ ɨbi dakon bɨsap kɨlɨ noman tak.
Abɨsok bupmɨ bɨsap.
14 Saion kokup pap uŋun yokwi tak, mani oman amɨngo da yut agak tɨp morapni do but dasi galak taŋ yomaŋ.
Abɨsok yokwi tak, mani kosit madepni dakon kɨmbabaŋ pɨndagek uŋun da but yokwi yomɨsak.
15 Piŋkop da Saion kokup pap aeni wasaŋek tɨlɨmni mɨŋat amɨn kabɨkon yolɨkdɨsak.
Aŋakwan mɨŋat amɨn kabɨ morap Yawe do pasolni, ae mɨktɨm dakon kɨla amɨn madep morap tɨlɨmni do pasal ɨmdaŋ.
17 Uŋun gɨptɨm dakon yo do wadaŋ amɨn uŋun dakon bɨsitni nandaŋ yomdɨsak.
Bɨsit aba saŋbeŋek manji dɨma yomdɨsak.
18 Yo uŋun Yawe da asak uŋun papiakon mandano babɨ kabɨ don altoni da Yawe da pi uŋun agɨt dakon gen nandaŋek mani awɨgɨni.
19 Gen uŋun yaŋ mandaneŋ, “Yawe iyɨ da telagɨ kokupmon kwen egek sɨŋtaŋban pɨgɨt.
Uŋun Kwen Kokup egek sɨŋtaŋban mɨktɨmon pɨgɨt.
20 Aŋek dam tebanon amɨn jɨgɨ paŋek kunam tagakwa nandagɨt.
Ae dapba kɨmotni do yaŋbi amɨn uŋun pulugaŋ yopban kɨwit.”
21 Yaŋ agɨt do Saion mɨŋat amɨnyo da Yawe dakon man yaŋ teŋteŋoni.
Jerusalem mɨŋat amɨnyo da aŋkɨsini.
22 Uŋun bɨsapmon mɨŋat amɨnyo gat ae kɨla amɨn madepni gat Yawe gawak ɨm do Jerusalem muwugek yaŋ akdaŋ.
23 Nak tagaŋ amɨn madep egapbo Yawe da tapmɨmno aŋupbal aŋek bɨsapno aŋpɨsɨp agɨt.
24 Do nak yaŋ iyɨgɨm, “Piŋkopno, toktok teban egɨsal.
Nak amɨn pelaŋ dɨma at, do egɨp egɨpno abɨsok dɨma gwayeki.
25  a  On mɨktɨm dakon teban tokni kalɨpsigwan kɨlɨ yɨpgul da tosok.
Ae kundukon yo morap toŋ uŋun gak dakon kɨsit kɨlda.
26 Kundu gat mɨktɨm gat tasɨk tokdamal. Ɨmal gɨraŋɨ da pudaŋ kwaŋ, uŋun da tɨlak yokwi tokdamal.
Amɨn da ɨmal kulabɨk aŋ, uŋun da tɨlagon gak da kulabɨk aŋaki saŋbeŋek dɨma tokdamal.
Mani gak toktok teban egɨpdɨsal.
27 Gak kulabɨk dɨma aŋek yaŋ gɨn egɨpgul da egɨsal.
Gak dagok dagogɨ mɨni egɨ wɨgɨkdɨsal.
28 Oman amɨngo nin dakon mɨŋat monjɨyo gak da buron egɨpdaŋ.
Ae uŋun dakon dɨwatni paŋpulugaŋaki gak gat tagɨsi egɨpdaŋ.”

Kap 103

Copyright information for `YUT