a116.102Ko 4.13

Psalms 116

Piŋkop da amɨn kɨnda aŋpulugaŋban ya yaŋ iyɨgɨt

Yawe da bɨsitno nandɨsak, do nak but dasi galak taŋ ɨmɨsat.
Asisi, bɨsitno nandɨsak.
Nagon tobɨlek bɨsitno nandagɨt, do mɨktɨmon egɨpbeŋ bɨsapmon bɨsit dɨma yɨpmaŋ dekgeŋ.
Kɨmot da nak nap da yaŋ wamgut.
Nak kɨmakbi kokup do nandaŋek pasol pasol madepsi agɨm.
Yaŋ aŋek nandaba kɨk madepsi agɨm.
Yaŋ nandaŋ egek Yawe yaŋ iyɨgɨm, “O Yawe, pulugaŋ nepbi!”

Yawe da nin nandaŋ yaworon dasi yo tagɨsisi aŋnimɨsak.
Piŋkopnin da bupmɨ nandaŋ nimɨsak.
Yawe da nandak nandakni mɨni amɨn paŋkutnosok.
Kalɨp tapmɨmno mɨni da egapbo pulugaŋ nepgut.
Yawe da nak do yo tagɨsisi aŋ namgut, do butno aeni yaworɨsi tosok.

Yawe, pulugaŋ nepbɨ dɨma kɨmakgɨm.
Yaŋ aŋek dabɨl pakbino wɨrɨrɨgek kɨlano aŋaki dɨma kesal nɨkgɨt.
Yaŋdo, nak mɨktɨmon egɨpbeŋ bɨsapmon Yawe gat kaloŋɨ agɨpdeŋ.
10  a  Nak Piŋkop nandaŋ gadaŋ ɨmɨŋek bɨsit yaŋ agɨm, “Yawe, nak jɨgɨsi nandaŋek egɨsat.”
11 Ae si pasalgɨm bɨsapmon yaŋ yagɨm, “Amɨn kɨsi morap uŋun top amɨn gɨn.”

12 Yawe da nak do yo tagɨsi aŋ namɨsak, do kobogɨ do yo ninaŋ ɨbeŋ?
13 Yawe da nak yokwikon naŋ abɨdagɨt, do ya yaŋ iyɨŋek paret ak do wain kap aŋenokgeŋ.
14 Mɨŋat amɨn kabɨni abɨŋ muwutni da dabɨlon nak kalɨp Yawe do yo ak do yaŋ teban tok agɨm uŋun abo pɨndatdaŋ.

15 Yawe dakon telagɨ amɨn uŋun iyɨ dakon wam tabɨlni, do kɨmokgoŋ bɨsapmon pɨndakban yo madepsi aŋ.
16 Yawe, nak gak dakon oman monjɨgo.
Meŋno da kalɨp gak dakon pi agɨt, abɨsok monji nakyo kɨsi pigo asat.
Nak nap tebanon egapbo pulugaŋ nepgul.
17 Nak ya yaŋ gayɨŋek paret aŋek mangokon da bɨsit abeŋ.
18 Mɨŋat amɨn kabɨni abɨŋ muwutni da dabɨlon nak kalɨp Yawe do yo ak do yaŋ teban tok agɨm uŋun abo pɨndatdaŋ.
19 Yawe, nak Jerusalem kokup papmon gak da telagɨ yutnon paret uŋun abeŋ.
Yawe aŋkɨsini!

Kap 117

Copyright information for `YUT