Psalms 124

Piŋkop uŋun mɨŋat amɨn kabɨni dakon Paŋpulugok Amɨni

Dewit dakon kap kɨnda. Piŋkop gawak ɨmɨm tamokon kɨgɨk dakon kap.

“Yawe da nin dɨma paŋpulugagɨt tam, niaŋɨ?”
Israel amɨn da uŋun gen dakon kobogɨ yoni.
“Amɨn da butjap nandaŋ nimɨŋek ninon emat awit bɨsapmon Yawe da nin dɨma paŋpulugagɨt tam, uwal da japmɨsi nandaŋek obɨsi tagɨ paŋupbal abam.
Butjapni pakbi da yaŋ ɨgek tɨmɨkban tagɨ pasɨlnom.
Pakbi madep uŋun ɨgek tɨmɨkban tagɨ kɨmak mudonom.
Mani dɨma.”

Nin Yawe do ya yaŋsi iyɨneŋ.
Yum nindaŋakwan uwal da nin dɨma nindapba pasɨlgɨmaŋ.
Nin mɨnam da yaŋ amɨn kɨnda da pat yɨpguron yokwalgɨmaŋ da pulugaŋ kɨgɨmaŋ.
Pat uŋun tuwɨl kɨgɨt, do nin pulugaŋ kɨgɨmaŋ.
Yawe Kwen Kokup ae mɨktɨmyo wasagɨt, uŋun da iyɨ nin tagɨsi paŋpulugosok.

Kap 125

Copyright information for `YUT