Psalms 25

Amɨn kɨnda Piŋkop da kɨlani asak do bɨsit agɨt

Dewit dakon kap kɨnda.

Yawe, aŋpulugoki do bɨsit gayɨsat.
Piŋkopno, egɨp egɨpno gagon tosok yaŋsi nandɨsat.
Aŋpulugaŋaki mayagɨ dɨma pakeŋ, ae uwalno da abɨŋ nepmaŋek kɨsɨk kɨsɨk dɨma ani.
Amɨn morap gak do nandaŋ gadaŋ uŋun mayaktok dɨma pani,
mani amɨn paŋkewalgaŋ amɨn uŋun mayaktok pakdaŋ.
Yawe, niaŋ egɨpbeŋ do nandɨsal uŋun nolɨki.
Kositgo nolɨki.
Piŋkopno, yokwikon baŋ aŋpulugosol do nayɨŋ dekbɨ gengo bamɨ yol aŋaŋ kɨkeŋ.
Gɨldat kɨnda kaloŋ aŋpulugoki do jomjom aŋegɨsat.
Yawe, gak amɨn do bupmɨ nandaŋek but dasi galak taŋ yomɨsal uŋun do nandaki.
Kalɨpsigwan da aŋpak uŋun agɨl da aŋaŋ obɨsal.
Piŋkop nak monjɨ bɨlagɨ egek aŋpak yokwi agɨm uŋun do dɨma nandaki.
Gak amɨn do bupmɨ nandaŋ yomɨsal, do but dasi galak taŋ nabi.
Yawe uŋun wagɨl tagɨsi ae kɨlegɨsi.
Yaŋdo, yokwi pakpak amɨn kositni yolɨsak.
Amɨn iyɨ do nandaba paŋ uŋun kositni kɨlegɨ yolɨsak, ae aŋpakni kɨlegɨ yoyɨŋ dekdak.
10 Yawe da saŋbek saŋbekni ae gen tebani yolgaŋ mɨŋat amɨnyo uŋun do but dasi galak taŋ yomɨŋek dɨma yopmaŋ dekdak.
11 Yawe, man bingo tagɨsi tosak do yokwino morapmɨsi uŋun wɨrɨrɨk nabi.
12 Yawe yolgaŋ amɨn kosit kɨlegɨ niaŋ agɨpni uŋun yolɨsak.
13 Uŋuden amɨn tagɨsi egɨpdaŋ, ae monjɨ gwayoni uŋun da mɨktɨmni abɨdokdaŋ.
14 Yawe uŋun mɨŋat amɨnyo pasal ɨmaŋ uŋun dakon notni egɨsak.
Aŋek saŋbek saŋbek uŋun gat agɨt uŋun do yoyɨŋ dekdak.
15 Yawe da gɨn nak paron naŋ kukwosok, do uŋun da aŋpulugosak do dabɨlno uŋudon gɨn yɨpmaŋdat.
16 Naga dage egapbo amɨn da yokwi aŋ namaŋ, do tobɨl abɨŋek nandaŋ yawok nabi.
17 Butjɨk morapno uŋun si pap tosok, do wɨrɨrɨk namɨŋaki yaworɨ egɨpbeŋ.
Aŋpulugaŋaki jɨgɨ da dɨma abɨŋ nepni.
18 Butjɨk morapno gat ae jɨgɨno gat do nandaŋek yokwi morapno yopmaŋ nabi.
19 Uwalno morapmɨsi uŋun do pɨndat.
Uŋun nak do japmɨsi nandaŋek ukwayɨt aŋ.
20 Aŋpulugoki do obɨsat, do egɨp egapno kutnoki, ae uwal da kɨsiron naŋ abɨdoki.
Aŋpulugaŋaki mayagɨ dɨma pakeŋ.
21 Aŋpulugoki do jomjom aŋegɨsat, do aŋpakno tagɨsi ae kɨlegɨsi uŋun da nak aŋkutnoni dosi nandɨsat.
22 Piŋkop, amɨn kabɨgo Israel yumaŋ naŋaki jɨgɨni mibɨlɨ mibɨlɨ toŋ uŋun da dɨma pabɨŋ yopni.

Kap 26

Copyright information for `YUT