Psalms 38

Amɨn kɨnda jɨgɨni toŋ dakon bɨsit

Dewit dakon kap kɨnda.

Yawe, butjap nandɨsal mani gen tebai dɨma nayɨki.
Butjap madepsi nandɨsal mani nak aŋmɨlɨp ak do tepmɨ pi dɨma nabi.
Gak gaga dakon gobɨŋ naŋ yamaŋ namɨl, aŋek kɨsitgo da nɨkdak.
Gak da butjap nandaŋ namɨsal, do sot yokwisi asat.
Nak dɨwarɨno toŋ, do gɨptɨmno tapmɨmɨ mɨnisi asak.
Gulusuŋno da kɨlɨ wɨtjɨŋ namgut.
Ae uŋun jɨgɨno yɨk yombem jɨgɨni madepsi, do nak da arɨpmɨ dɨma ɨmerɨ.
Gɨptɨmnokon wuda toŋ dakon tabani uŋun madepsi, ae mɨktaŋbi.
Nak nandaŋ kokwini mɨni amɨn da arɨpmon aŋpak gulusuŋ agɨm do aŋek uŋun noman taŋ nameŋ.
Butnokon jɨgɨ madepsi taŋakwan tasɨk tosot.
Gɨldat kɨnda kaloŋ bupmɨ nandaŋek kunam gɨn tak egɨsat.
Gɨptɨmno tedepmɨsi kɨndap da yaŋ soŋ namɨŋakwan sot madepsi asat.
Yo kɨnda da tebaisi bamaŋ namɨsak uŋun da tɨlak nak obɨsi tasɨk taŋek yokwisi egɨsat.
Butnokon da yokwisi nandaŋek tepmɨ madepsi nandɨsat do iyoŋ iyoŋ yosot.
Amɨn Tagɨ, gak da nak dakon galaktok teban nandɨsal.
Butno da kunam yokwisi takdak, uŋun gak da dabɨlon pasɨlɨ dɨma.
10 Wamno gami pi tebaisi aŋakwan tapmɨmno mɨnisi asak.
Dabɨlno pɨlɨn taŋakwan tagɨ dɨma sɨŋtosot.
11 Notnoni gat ae gen kaloŋno gat nak da kapmatjok ap do dɨma galak toŋ, nido wudano yokwisi.
Gwakno kɨsi dubagɨkon ekwaŋ.
12 Nɨkba kɨmokgeŋ do nandaŋ amɨn uŋun nak abɨdok do pat yɨpmaŋ.
Amɨn nak aŋtasɨk ak do nandaŋ amɨn yo yokwi aŋ nam do gen yoŋ.
Bɨsapmɨ bɨsapmɨ yokwi aŋ nam do gen yaŋ paŋteban aŋ.
13 Mani amɨn mɨrakni mɨni yombem geni dɨma nandaŋ yomɨsat.
Nak kadɨm yombem, do aŋtaŋ yok kɨnda dɨma asat.
14 Nak amɨn kɨnda gen arɨpmɨ dɨma nandagɨ, ae kobogɨ arɨpmɨ dɨma yogogɨ yombem.
15 Mani Yawe, nak gak do jomjom asat.
Amɨn Tagɨ, gak Piŋkopno, do gaga geno dakon kobogɨ aŋtobɨlbi.
16 Nak bɨsit yaŋ asat, “Yum pɨndagaki sagalek nɨkban uwal da but kwaktok dɨma nandani.”
17 Nido, nak kɨlɨ uŋunjok mokdɨsat.
Ae tepmɨ toktogɨsi pasat.
18 Nak gulusuŋno gagon yaŋ teŋteŋosot, aŋek yokwi agɨm do bupmɨsi nandɨsat.
19 Uwal morapno uŋun tapmɨmɨ toŋsi.
Uŋun da ɨsal dogɨn uwal aŋ namaŋ.
20 Nak aŋpak tagɨsi aŋ yomɨsat, mani kobogɨ do aŋpak yokwi aŋ namaŋ.
Nak aŋpak kɨlegɨ yolapbo uŋun do nandaŋek nak dakon uwal dagoŋ.
21 Yawe, dɨma nepmaŋ dekgi.
Piŋkopno, nak da dubagɨkon dɨma egɨpbi.
22 Amɨn Tagɨ, gak yokwikon baŋ tɨmɨt tɨmɨt amɨno.
Nak tepmɨsi aŋpulugoki.

Kap 39

Copyright information for `YUT