Psalms 65

Kɨsɨk kɨsɨk aŋek Piŋkop ya yaŋ iyɨwit

Dewit dakon kap kɨnda. Kap on Piŋkop gawak ɨmɨm kap. Kap yoŋ amɨn dakon kɨla amɨn do mandabi.

Piŋkop, nin Saion kokup papmon kɨŋek gak aŋkɨsineŋsi.
Yaŋ aŋapno yo morap ak do yagɨmaŋ uŋun kɨnda dɨma suŋ tosak.
Gak da bɨsitnin nandaŋ nimɨsal.
Amɨn morap kɨsisi gagon opdaŋ.
Dɨwarɨnin da wɨtjɨŋba wagɨl yokwisi egɨpgumaŋ, mani gak da dɨwarɨnin wɨrɨrɨk nimgul.
Amɨn gak da yutnon opni do manjɨsal uŋun kɨsɨk kɨsɨk ekwaŋ.
Gak da Telagɨ Yut Madepmon yo tagɨsi toŋ uŋun baŋ tugok tugogɨsi paŋek ekwamaŋ.
Piŋkop gak dasi nin yokwikon baŋ tɨmɨk tɨmɨk aŋaki tagɨsi ekwamaŋ.
Gak bɨsitnin nandaŋek pi tapmɨmɨ toŋ aŋek nin paŋpulugosol.
Amɨn mɨktɨm dɨwarɨsikon ae tap dɨwarɨsikon ekwaŋ uŋun kɨsi gak da paŋpulugoki do jomjom aŋ.
Gaga da tapmɨmon kabap morap wasaŋ yopgul da tamonikon toŋ.
Gak tapmɨmgo madepsi.
Gak da tap madep paptaŋ tamalɨgakwan aŋyawot aŋaki wayɨŋɨ mɨni tosok.
Ae mɨŋat amɨn kabɨ egɨ aŋaŋ kwaŋ gen pap yaŋek pɨdok pɨdok aŋ uŋun gak da paŋyawot asal.
Wasok madep madep aŋaki amɨn uŋun do pasolgoŋ.
Gɨldat wɨsak tetgɨn ae pɨgɨsak tetgɨn wasok tapmɨmɨ toŋ asal uŋun do nandaŋek kɨsɨk kɨsɨk kap yaŋ gamaŋ.
Gak da mɨktɨm kɨlani ak do sɨkak yɨpbɨ mosok.
Yaŋ aŋaki mɨktɨm tagɨsi aŋakwan jap bamɨ tagɨsi toŋ.
Piŋkop gak da pakbi morapmɨ yopgul da dɨma dugoŋ.
Yaŋdo, jap bamɨ madepsi ɨreŋ taŋakwa amɨn da arɨpnikon paŋ noŋ.
Gak da yaŋ ak do kɨlɨ nandagɨl.
10 Gak da sɨkak morapmɨ yopbɨ maŋek mɨktɨm aŋyawot aŋakwan pakbini toŋ aŋakwa jap gɨsamɨgaki bamɨ tagɨ toŋ.
11 Gak nin do tagɨsi nandaŋek jap pakpak bɨsapmon jap madepsi paŋɨreŋaŋ nimɨsal.
Jap tamokon jap morapmɨsi tugaŋ wɨgɨsak.
12 Mɨktɨm amɨn dɨma ekwaŋon joŋ tɨm morap taŋ aŋaŋ kwaŋ uŋudon bulmakau gat ae sipsip gat morapmɨsi ekwaŋ.
Ae ɨleŋ morapmon joŋ kalɨkalɨgɨsi kwaŋakwa kɨsɨk kɨsɨk aŋ.
13 Joŋ tɨmon sipsip morapmɨsi ekwaŋ ae galegɨkon wit morapmɨsi kwaŋek toŋ,
do yo morap kɨsɨk kɨsɨk aŋek kap yoŋ.

Kap 66

Copyright information for `YUT