Psalms 71

Amɨn pelaŋ dakon bɨsit

Yawe, aŋkutnoki do gagon obɨsat.
Nak aŋkutnaŋaki mayagɨ dɨma pakeŋ.
Gak wagɨl kɨlegɨsi, do nak aŋpulugaŋek uwalno da kɨsiron naŋ kukwaŋ nepbi.
Bɨsitno nandaŋek pulugaŋ nepbi.
Gak tɨp madepno egek nak tagɨsi aŋkutnosol.
Gak tɨp tebano ae dam tebano arɨpmɨ dɨma tuwɨlɨ, do gen teban yɨpmaŋaki uwal da kɨsiron da pulugaŋ kɨkeŋ.
Piŋkopno, amɨn yokwi da kɨsiron baŋ pulugaŋ nepbi.
Uŋun emat amɨnsi, ae aŋpakni uŋun wagɨl yokwisi.
Amɨn Tagɨ Yawe, gak dasi pulugaŋ nepdɨsal yaŋ nandaŋek egɨsat.
Nak monɨŋɨsogon da nandaŋ gadaŋ gamɨŋ aŋaŋ wɨgɨm.
Meŋno da nak aŋalaŋban gak da kɨla aŋaki wɨk da abɨsok egɨsat.
Yaŋ asal do bɨsapmɨ bɨsapmɨ mango yaŋ aŋkɨsiŋ kɨmokgeŋ.
Amɨn morapmɨ nandaŋakwa yo noman taŋ namɨŋakwa yaŋ nandaŋ, gak kaloŋ dagɨn tagɨsi aŋkutnosol.
Gɨldat kɨnda kaloŋ nak gak dakon man awɨgɨsat, aŋek mɨŋat amɨnyokon gak dakon tɨlɨmgo do yaŋ teŋteŋok asat.
Abɨsok nak amɨn pelaŋ kɨlɨ at, do tapmɨmno mɨnisi.
Gak nepmaŋ degek manji dɨ nabɨm.
10 Uwalno nɨkba kɨmokgeŋ do muwugek aŋupbal ak do gen yaŋ paŋteban aŋ.
11 Uŋun yaŋ yoŋ, “Kɨlɨ yolek abɨdono.
Uŋun aŋpulugosak amɨn kɨnda dɨma egɨsak.
Piŋkop kɨlɨ yɨpmaŋ dekgɨt.”
12 Piŋkop, dubagɨkon dɨma egɨpbi.
Piŋkopno, tepmɨsi abɨŋek nak aŋpulugoki.
13 Gen yaŋ namaŋ amɨn uŋun pabɨŋ yopmaŋek dapbɨ pasɨlni.
Nak aŋupbal ak do nandaŋ, do gak da paŋɨŋtok aŋek madepsi paŋmayak abi dosi nandɨsat.
14 Mani nak toktogɨsi gak nandaŋ gadaŋ gamɨŋek aŋpulugoki do jomjom abeŋ.
Mango madepsi sigɨn awɨgɨkeŋ.
15 Aŋpakgo kɨlegɨsi uŋun do amɨn yoyɨkeŋ.
Yo masɨ masɨmɨ morapmɨsi nagon agɨl uŋun arɨpmɨ dɨma manjɨŋ mudogɨ, do gɨldat kɨnda kaloŋ gak do nandaŋ egek pulugaŋ nepgul uŋun dakon geni amɨn yoyɨkeŋ.
16 Amɨn Tagɨ Yawe, gak dakon tapmɨm do nandaŋek gak aŋkɨsikeŋ.
“Yawe kaloŋ gɨn uŋun amɨn kɨlegɨsi” yaŋ yoyɨŋ teŋteŋokeŋ.
17 Piŋkop, nak monɨŋɨsogon da gak da nayɨŋ dek aŋaŋ wɨgɨl.
Gak da yo masɨ masɨmɨsi asal uŋun do amɨn yoyɨŋ teŋteŋosot.
18 Abɨsok nak amɨn pelaŋ kɨlɨ at, ae kuluno madepsi kwaŋ, do Piŋkop nak dɨma nepmaŋ dekgi.
Nak gat egaki gak dakon tapmɨm madepgo do mɨŋat amɨn kabɨyo altaŋ altaŋ ani uŋun yaŋ teŋteŋok aŋyomɨŋ yomɨŋ abeŋ.
19 Piŋkop, aŋpakgo kɨlegɨ uŋun tugaŋ kundu da arɨpmon wɨgɨgɨt.
Gak pi madepsi agɨl.
Amɨn kɨnda gak yombem mɨni.
Gak da yapmaŋ mudosol.
20 Gak da jɨgɨ mibɨlɨ mibɨlɨ yopbɨ nagon apgwit, mani nak nandɨsat, gak da nak aego aŋteban akdɨsal.
Mɨktɨm kagagwan naŋ abɨ pɨdokeŋ.
21 Gak da mano abɨ madepsi sigɨn pap tokdɨsak.
Aŋek butno aego aŋteban akdɨsal.
22 Piŋkopno, gak dɨmasi nepmaŋ dekdal, do mango awɨgɨk do gita tɨdokeŋ.
Israel amɨn dakon Piŋkop telagɨ, mango awɨgɨk do gita tɨdaŋek kap yokeŋ.
23 Nak kɨsɨk kɨsɨk aŋek yaŋ tɨdokeŋ.
Gak do kap yaŋek mango awɨgɨkeŋ, nido yokwikon naŋ abɨdagɨl.
24 Amɨn da nak abɨŋ nep do awit, mani gak da pabɨŋ yopmaŋek obɨsi paŋmayak agɨl.
Yaŋ agɨl do nak gɨldat kɨnda kaloŋ gak dakon aŋpak kɨlegɨ do mɨŋat amɨnyokon yaŋ teŋteŋok abeŋ.

Kap 72

Copyright information for `YUT