Psalms 75

Piŋkop amɨn yokwi pabɨŋ yopmaŋek amɨn kɨlegɨ paŋpulugosok

Asap dakon kap kɨnda. Kap on Piŋkop gawak ɨmɨm dakon kap. Kap yoŋ amɨn dakon kɨla amɨn da mɨŋat amɨnyo yoyɨŋban “Dɨma paŋtasɨk ani” uŋun tegon da yoni.

1Piŋkop, nin gak do ya yaŋ gayɨŋek mango toktogɨsi awɨkwamaŋ.
Aŋek man madepgo do yaŋ teŋteŋok aŋek wasok tapmɨmɨ toŋ mibɨlɨ mibɨlɨ agɨl uŋun do yomaŋ.
2Piŋkop da yaŋ yosok, “Nak da gen pikon depbeŋ dakon bɨsap kɨnda kɨlɨ manjɨgɨm.
Gen kokwin kɨlegɨsi akdɨsat.
3Mɨktɨm wudɨp aŋakwan mɨŋat amɨnyo uŋun yaworɨ dɨma ekwaŋ.
Mani mɨktɨm dakon mibɨlɨ tebai abɨdaŋapbo tebai tosak.
4Nak da iyɨ do nandaba wɨkwaŋ amɨn yaŋ yoyɨsat, ‘Ji pɨbɨt tɨdok dɨma ani.’
Ae amɨn yokwi yaŋ yoyɨsat, ‘Ji dɨsi dakon man dɨma pawɨgɨni.
5Dɨsi dakon tapmɨm do kɨsɨk kɨsɨk dɨma ani, ae madepsi yaŋ tɨdaŋek manji gen dɨma yaŋ namni.’ ”
6Mɨŋat amɨnyo man madep yomyom dakon pi uŋun mɨktɨm terɨ terɨ taŋ aŋ aŋ kwaŋ dakon amɨn kɨnda da arɨpmɨ dɨma agagɨ.
7Piŋkop kaloŋ dagɨn aŋpaknin kokwin asak.
Uŋun da amɨn dɨwarɨ pabɨŋ yopmaŋek amɨn dɨwarɨ pawɨgɨsak.
8Yawe da kɨsitnikon kap kɨnda abɨdosok, uŋun wain yokwisi ae tebaisi yo ɨsɨpmɨ gat ɨktagɨlbi uŋungwan tugaŋbi.
Uŋun tagalban amɨn yokwi morap da kɨsi naŋ mudoŋ.
9Mani nak toktogɨsi Jekop dakon Piŋkop do yaŋ teŋteŋok aŋek mani awɨgɨk do kap yokeŋ.
10Piŋkop da amɨn yokwi dakon tapmɨm wɨrɨrɨkban pasɨldaŋ.
Mani amɨn kɨlegɨ do tapmɨm madepsi yomdɨsak.

Kap 76

Copyright information for `YUT