a81.3IDT 10.10
b81.7TP 17.7; IDT 20.13
c81.9-10TP 20.2-3; GT 5.6-7

Psalms 81

Jap noknok bɨsap madep dakon kap

Asap dakon kap kɨnda. Kokup pap Gat dakon gita tɨdaŋek yogogɨ.

Piŋkop paŋpulugoknin do kɨsɨk kɨsɨk kap kɨnda yoneŋ.
Jekop dakon Piŋkop do kɨsɨk kɨsɨk kap yoneŋ.
Kap yoni. Tambarin tɨdaŋek, gita gat ae kulele gat kɨsi tɨdoni.
a  Kanek kaluk abɨsak bɨsapmon kweŋ pɨsoni.
Kanek binap taŋakwan Piŋkop gawak ɨmɨm bɨsap madepmon kweŋ pɨsoni.
Yaŋ aneŋ do Jekop dakon Piŋkop da Israel amɨn nin do gen teban uŋun nimgut.
Kalɨpsi Isip amɨn pabɨŋ yopgut bɨsapmon, Piŋkop da gen teban uŋun Israel amɨn nin do nimgut.
Nak amɨn kɨnda tekni dɨma nandɨsat uŋun da gen yaŋban nandɨsat.
Uŋun da yaŋ yosok,
“Nak yo jɨgɨ morap ji da kwapmon tawit uŋun kukwaŋ yopgum.
Ae mɨktɨm sɨmɨl gok paŋpulugoko mibɨlɨkon yopba taŋakwa pi teban saŋbeŋek dɨma awit.
b  Jɨgɨkon egek bɨsit nayɨŋba pulugaŋ depgum.
Gɨkwem kɨrɨrɨŋ yosok uŋungwan da bɨsitji nandagɨm.
Nak Meriba pakbikon nandaŋ gadatji pɨndat do aŋek ji paŋkewalgɨm.
“Nak dakon amɨn kabɨno, nawa dayɨko nandabɨt.
Israel amɨn, nak dakon gen nandaŋek guramɨtni do madepsi nandɨsat.
c  Ji mɨktɨm ŋwakŋwarɨ dakon kokup kɨdatni dɨma yolni, ae dɨma gawak yomni.
10 Nak kaloŋgɨn ji dakon Yawe ae Piŋkopji egɨsat.
Nak naga Isip mɨktɨmon baŋ ji tɨmɨk paŋopgum.
Gen kagasi aŋtaŋ kɨŋakwa upmokgeŋ.
11 “Mani babɨkji da nak dakon gen nandak do dɨma galak tawit.
Asisi, Israel amɨn nak dakon gen guramɨt do dɨma galak tawit.
12 Do yum pɨndagapbo kwen wɨgɨk aŋpakni yolek galak toknikon yo awit.
13 “Nak mɨŋat amɨno da geno guramɨk kɨmotni dosi nandɨsat.
Ae Israel amɨn nak dakon galaktok yol kɨmotni do nandɨsat.
14 Yaŋ ani kaŋ, nak da uwalni tepmɨsi pabɨŋ yopdɨsat.
Aŋek uwal gat emat wamaŋek pabɨŋ yopbeŋ.
15 Aŋapbo mɨŋat amɨnyo nak do nandaba yokwi tok aŋ, uŋun madepsi pasal nɨmnɨmɨk namni.
Aŋakwa toktogɨsi yo yokwisi aŋ yobeŋ.
16 Mani nak da ji do bret galagɨsi, ae kabaŋ kok koron nani dabeŋ, aŋapbo butji tugokdaŋ.”

Kap 82

Copyright information for `YUT