Psalms 97

Piŋkop uŋun kɨla amɨn madep mibɨltogɨ

1Yawe uŋun kɨla amɨn madep egɨsak. Mɨktɨm gak kɨsɨk kɨsɨk aki.
Mɨktɨm tɨm tap binap toŋ ji but galak nandani.
2Gɨkwem gat ae pɨlɨn gat da aŋgwasamal.
Aŋpak kɨlegɨkon da amɨn kɨla asak.
3Kɨndap da mibɨl taŋ ɨmɨŋek uwalni aŋgwasɨŋek ekwaŋ uŋun soŋban pasɨlgaŋ.
4Uŋun da malni yopban mɨktɨm teŋteŋosok.
Mɨktɨm da kaŋek nɨmnɨmɨkdak.
5Yawe apban kaŋek kabap da pakbi dagoŋ.
Uŋun mɨktɨm morap kɨsi dakon Amɨn Tagɨ egɨsak.
6Kundu da aŋpakni kɨlegɨ do yaŋ teŋteŋok aŋakwan mɨŋat amɨn morapyo da tɨlɨmni koŋ.
7Amɨn kokup kɨdat gawak yomɨŋek paŋkɨsaŋ uŋun mayak tok paŋ.
Kokup kɨdat, ji Yawe gawak ɨmni.
8Saion kokup pap amɨn gat, ae Juda mɨktɨmon kokup pap taŋ aŋaŋ kwaŋ uŋun dakon amɨn gat da uŋun nandaŋek, gen kokwin tagɨsi asal uŋun do but galak nandaŋek kɨsɨk kɨsɨk aŋ.
9Nido Yawe gak Piŋkop Wɨkwisi egek mɨktɨm morap kɨsi kɨla asal.
Gak piŋkop ŋwakŋwarɨ morap kɨsi yapmaŋek mango wukwisi tosok.
10Ji Yawe but dasi galak taŋ ɨmaŋ amɨn, ji aŋpak yokwi do nandaba ɨŋanisi asak.
Iyɨ dakon telagɨ amɨn kabɨni, yokwi aŋ amɨn da kɨsiron baŋ tɨmɨgek kɨlani asak.
11Piŋkop da amɨn kɨlegɨ teŋteŋaŋ yoban kɨsɨk kɨsɨk paŋ.
12Amɨn kɨlegɨ, ji Yawe kɨsɨk kɨsɨk aŋɨmɨŋek mani telagɨ do nandaŋek ya yaŋ iyɨni.

Kap 98

Copyright information for `YUT