Hebrews 2

Tuwa Bayau mene name kora noiya, awiya nona bainakama ara.

Arare ge nigiwangne awiya yangdoro wang ine yero darasero babonine sero, name ge awiya iniro tau-tataware yanene. Gitau angelo mene Tuwa Bayaura be yero sao tauyao ge puro bumuwa, arare emo bauno ge awiya yausepunauwita dedunauwa awiya abena nuna tapunasani nauwa ara. Arare name yeme korayao bainakama auna ge awang sanane Tuwa Bayau mene abena pugai name nono yero daigarinenine? Name daigao ine teng oko ara. Noeno oko, ge awiya angelo wosao mene oko, Tuwa Yesu mene nung nuka nutope gitau keregaina. Keregainu dawong me nunae mene nigiwa amimene name eno sero butunawe duwa gigiwangne me yena. Tuwa Bayau nung nuka nutope ge awiya ganane me yaise sero tani putoungne benaung giti nasani Owenona buro benaung giti awiya aratamao nuna-una zuma aung bono yenu pumuwangne.

Yesu nung angelo dubura wese ine yero nasani nauna.

Tawing zo ago kasa yariniya auna ge sanene. Tuwa Bayau mene tawing awiya angelo mene diya yaese oko sena. Auna ge emo zo mene keregaina awiya eyero gaewa mitiya era,

  • Nae emo ewiya nono yao ing ayero sero kotupunosi? Nae emo wosao ewiya nono yao ing ayero sero diya nosi?
Nae angelo dubura wese yero nanenese sasa. Ning nae emo tuwa ine waegaore yazo bowire mene simasa emo tuwa ine yewangne. Ayero nasani nona apakana auna maung yanenese te nanae-una wese atu pugasa ara. Ge gayao zo ayero mitiya. Tuwa Bayau nung nona apakana emora wese pugari sena, amaze gagausi nasani okowata, zere tutupore ayero diriyegari sena. Ora be yeme ewiya nona apakana emora wese atu dubure gurutu yao awiya oko gosinonane. Arata name Yesu nung emo yazore simao waegaore puro noiya awiya gosinonane. Tuwa Bayaura mono iwaing mitiya, arare Yesu mene emo bauno apakana aeno magayaise sero Tuwa Bayau mene nung name ine yero angelo dubura wese ine yero naise sena. Aeno ayero nasani magayaora atu yaya tauna.

Yesu nung name metamani nuna ayero sari sero nete meng oko gaina.

10 Tuwa Bayau mene yazo bowire nuna eno nona apakana yena. Nung amimene Yesu mene mani awiso daigairo yumai simao waegaore nuna-una atu kasa yanenese sero korayao emo naname amimene yaya taungno aune gitau yao yaise senu teng yena. 11 Yesu mene name saenu Tuwa Bayaura dubu yewangne, arare name Yesu aune Maung naname dekaongka gege ara. Aeno Yesu mene name eno “metamani nana” ayero sari sero nete meng oko gaina. 12 Ge nuna eyero gaewa mitoiya,

  • O Tuwa Bayau, na yazo bowire nina metamani nana eno keregairo tugata-magata yarinena. Na dubura towang atu
  • yere gapunasani ning bowi yarinena.
13 Nupema zo eyero sena,

  • Na dema Tuwa Bayau tumo didinasani narinena.
Deka aine zo era,

  • Ewiya gipu! Na mani awiso Tuwa Bayau mene
  • na eno pugaina aune dema nenane ara.

Yesu nung name ine yena, aeno nung name sorepunoiya.

14 Name mani awiso nuna mene tawing taung puro nonane, aeno nung tawing taung puro wosiro buro kasa yero name ine yena. Ayero magayao nuna mene magayaora maung Sanda auna putoung dai aung yaise nung tawing taung puro kasa yena. 15 Emo bauno magayao awang nasani nauwa awong amaze magayaora awang yao mene bunenu be giti mitauwa, awong awiya besari sero ayero yena. 16 Nung angelo soremari sero awong ine oko yena. Nung tawing emo yero Abrahamna saisibuna name sorepunoiya ara. 17 Arare nung metamani nuna ine yaise sao ara. Nagibo zo oko mitauna. Aeno Yesu nung pirisa baina iwaing, ao-diyaore, ge dimaore, yero nasani Tuwa Bayaura ditira atu zawing pugao buro yero nasani emo bauno meko naname disari sero ayero yena noiya. 18 Etegao nuna-una kasa nauwa nung nuka nutope yaya tapunasani nauna, aeno nung name etegaora atu sorero pumaora putoung mitoiya auna teng name sorepunoiya ara.

Copyright information for `ZIA