Luk 12:41-48 | AltIBT2017 | STEP | – Кайракан! Бу укаа сӧсти јаҥыс биске айдып туруҥ ба, айса ончо улуска ба?

‏ Luke 12:41-48

41 – Кайракан! Бу укаа сӧсти јаҥыс биске айдып туруҥ ба, айса ончо улуска ба? – деп, Петр Оноҥ сурады.

42 Кайракан айтты:

– Јалчыларды башкарзын деп, олорго ӧйинде курсак берип турзын деп, бий кӧстӧгӧн бӱдӱмјилӱ ле керсӱ айыл башкараачы кем болотон? 43 Бийи келип, кулы анайда эдип јӱргенин кӧрӧр болзо, байагы кул кежиктӱ. 44 Чынын айдадым слерге: оны ончо јӧӧжӧзине баш эдер. 45 Је ол кул ичинде: «Бийим бачым келбес» – дейле, јалчыларды, јалчы кыстарды согуп, ичип-јип, аракыдап јатса, 46 ол кулдыҥ бийи сакыбаган кӱнде, сананбаган ӧйдӧ келер. Оны бойынаҥ кезе чабар, оныҥ салымы бӱдӱмји јок улустыҥ салымындый болор.

47 Бийиниҥ табын билип, белен эмес болуп, оныҥ табыла этпеген кул кӧп соктырар; 48 је билбеген кул, кезедерине турар кылык эткен де болзо, ас соктырар. Кемге кӧп берилген, оноҥ кӧп ок некелер, кемге кӧп бӱдӱмјилелген, оноҥ кӧп ок суралар.