Luk 22:39-46 | AltIBT2017 | STEP | Иисус айылдаҥ чыгып, Бойыныҥ јаҥжыкканыла Елеон кырга барды. Ӱренчиктери де Оныҥ кийнинеҥ бардылар.

‏ Luke 22:39-46

39 Иисус айылдаҥ чыгып, Бойыныҥ јаҥжыкканыла Елеон кырга барды. Ӱренчиктери де Оныҥ кийнинеҥ бардылар. 40 Једер јерге једип, Иисус олорго айтты:

– Ченелтеге кирбеске, мӱргигер!

41 Бойы дезе, таш чачым кире ырайла, тизеленип, мӱргий берди:

42 – Ада! Кӱӱниҥ бар болзо, бу кыйын-шыраны Менеҥ кыйыштыр. Андый да болзо, Мениҥ кӱӱнимле болбозын, Сенийиле болзын.

43 Теҥеридеҥ Ого ангел кӧрӱнип, тын-санаазын сергидип турды. 44 Ол тартыжуда болуп, там кичеенип мӱргиди. Оныҥ тери јерге тамчылаган кан ошкош болды.

45 Мӱргип божойло, ӱренчиктерине келерде, олор тыҥ кунукканына уйуктап калтыр.

46 – Не уйуктап јадыгар? – деп, Иисус олордоҥ сурады. – Туруп, ченелтеге кирбеске, мӱргигер!