Mark 10:46-52
Сокор Вартимейди јасканы
(Мф. 20:29-34; Лк. 18:35-43)
46Иерихонго келдилер. Иисус ӱренчиктериле, кӧп улусла кожо Иерихонноҥ чыгып јадарда, јолдыҥ кырында Тимейдиҥ уулы Вартимей деп сокор суранчыктап отурган. 47Бу Назарет јеринеҥ Иисус деп угала, ол кыйгырып, айда берди: – Давид Уулы Иисус, меге буурза! 48Кӧп улус оны унчуктырбаста, ол: «Давид Уулы, меге буурза!» – деп, там тыҥыда кыйгыра берди. 49Иисус токтой тӱжӱп, оны кычыртып ийди. Сокорды кычырып, айттылар: – Коркыба, тур, Ол сени келзин дийт. 50Ол катанчыгын суурып, таштайла, ӧрӧ туруп, Иисуска базып келди. 51Иисус оноҥ сурады: – Мени сеге нени этсин деп туруҥ? Сокор кижи Ого айтты: – Ӱредӱчи, кӧзим јарызын деп турум! 52Иисус айтты: – Бар, бӱдӱп турганыҥ сени аргадап алды. Бу тарый кӧзи јарып, ол Иисусты ээчий јолло басты.
Copyright information for
AltIBT2017