Mar 12:41-44 | AltIBT2017 | STEP | Иисус акча-јӧӧжӧлӱ кайырчактыҥ јанында отурып, ого акча салган улусты ајыктады. Кӧп байлар кӧптӧҥ салып турдылар.

‏ Mark 12:41-44

Тул ӱй кижиниҥ сыйы

(Лк. 21:1-4)

41 Иисус акча-јӧӧжӧлӱ кайырчактыҥ јанында отурып, ого акча салган улусты ајыктады. Кӧп байлар кӧптӧҥ салып турдылар.

42 Бир јокту тул ӱй кижи келип, эки оок јес акча салды. 43 Иисус ӱренчиктерин кычырып алала, айтты:

– Чынын айдадым слерге: бу јокту тул ӱй кижи кайырчакка салгандардыҥ ончозынаҥ кӧп салды. 44 Ончозы артыкташканынаҥ салгандар, ол дезе, андый јокту бойы, не барын ончозын, курсак алар акчазын салган.