1Th 4 | AvaIBTNT | STEP | Ахиралдаги, вацал, нижедасан ругьунлъараб къагӏидаялъ, гьанжелъизегӏан хьвадаралго гӏадин, гьанжеялдаса хадурги нуж Аллагь разилъиледухъ дагьалги лъикӏ хьвадейилан Тӏадегӏанав Гӏисал цӏаралдалъун гьарулеб буго нижеца нужеда.

‏ 1 Thessalonians 4

Павелил насихӏатал

1 Ахиралдаги, вацал, нижедасан ругьунлъараб къагӏидаялъ, гьанжелъизегӏан хьвадаралго гӏадин, гьанжеялдаса хадурги нуж Аллагь разилъиледухъ дагьалги лъикӏ хьвадейилан Тӏадегӏанав Гӏисал цӏаралдалъун гьарулеб буго нижеца нужеда. 2 Нужеда лъала Тӏадегӏанав Гӏисал амруялдалъун нижеца нужеда малъарабщинаб: 3 Аллагьасе бокьун буго нуж рацӏцӏадго хьвадизе, 4 нужер щивав чияс чӏужуялдехун ракӏбацӏцӏалъиги намусги цӏунизе, 5 Аллагь лъалареб халкъалъ гӏадин, гьаваялда нахърилълъун, хъахӏбалъи гьабунгутӏизе. 6 Гьеб ишалъулъ диналъул вац гуккизе ва гьесие квешлъи гьабизе бегьуларо. Гьеб киналъухъго Аллагьас тамихӏ-жаза гьабула. Гьелъул хӏакъалъулъ нижеца нужеда гьенибги бицун букӏана ва гьеб тӏубачӏого бегьуларилан лъазабунги букӏана. 7 Аллагьас нилъ тӏаса рищана, хъублъиги рехун тун, рацӏцӏадго хьвадизе. 8 Гьедин хьвадиларилан чӏарав чияс инсанасдасан бачӏаралде гуро мугъ рехулеб бугеб, нужеде Илагьияб рухӏ рещтӏинабурав Аллагьасдасан бачӏаралдейин.

9 Нужерго диналъул вацал рокьейилан дица нужехъе хъвазе ккеларо, Аллагьас малъун нужеда лъалеб бугелъул нужго цоцазе рокьизе. 10 Тӏолабго Македониялда ругел вацал рокьулелъулха нужее. Дица нужеда гьарулеб буго, вацал, дагьалги цӏикӏкӏун цоцазе рокьейилан.

11 Цебеги нижеца нужеда лъазабун букӏараб къагӏидаялъ, нужерго ишги гьабун, гӏодоре риччан ва нужерго квералъ бетӏербахъиги гьабун рукӏине хӏаракат бахъе. 12 Гьебмехалъ цогидал гӏадамазда гьоркьобги къадру-къимат борхила нужер ва лъидениги кколареб магӏишатги букӏина.

Гӏиса Масихӏ кӏиабизе вачӏараб мехалъ хваразе щиб лъугьине бугеб?

13 Хваразул хӏакъалъулъги нужеда бичӏчӏизабичӏого гӏеларо, хваралъуса рахъиналде хьулго гьечӏел цогидал гӏадамалго гӏадин, нужги пашманлъунгутӏизе. 14 Гӏиса хвеялда ва хваралъуса вахъиналда нилъ божулел гӏадин, нилъ божула иманалда хварал гӏадамал Аллагьас гьесда цадахъ жиндихъего рачине рукӏиналдаги. 15 Гьаб нижеца нужеда малъулеб буго Тӏадегӏанасул рагӏуда рекъон: Тӏадегӏанав вачӏинегӏан чӏаго хутӏаниги, хвараздаса цере ккеларо нилъ. 16 Аллагьасул буюрухъги рагӏараб, кӏудияв малаикас гьаракьги гьабураб ва Илагьияб ссурги пураб мехалъ живго Тӏадегӏанав рещтӏина. Ва Масихӏиде иман лъун хварал гӏадамал тӏоцере рахъина тӏаде. 17 Цинги нилъ – чӏаго хутӏаралги гьезда цадахъ Аллагьас накӏкӏазда аскӏоре зобалазде ракӏарила Тӏадегӏанасда дандчӏвазе. Гьедин абадиялъго нилъ Тӏадегӏанасда цадахъ рукӏина. 18 Гьеле гьел рагӏабаздалъун цоцазул ракӏбатизабе нужеца.