1 Thessalonians 1
Саламалъул рагӏаби
1Нилъер Эмен – Аллагьасде ва Тӏадегӏанав Гӏиса Масихӏиде иман лъуразул Фессалоникаялда бугеб агьлуялде Павелил, Силал ва Тимофейил салам буго. Баркат лъеги нужеда!«Дугӏадулъ нужги рехсон, Аллагьасе рецц гьабула»
2Нужеде баркат рещтӏаралъухъ Аллагьасе рецц гьабула нижеца кидаго, нижерго дугӏадулъ нужги рехсола. 3Нилъер Эмен – Аллагьасе дугӏа гьабулаго нижеда кӏочон толаро божи-иманалъ нуж захӏмат баччизе тӏамулел рукӏинги, рекӏелъ рокьигун хӏалтӏулел рукӏинги ва нилъер Тӏадегӏанав Гӏиса Масихӏиде хьул лъеялъ нужелъ сабру бижун букӏинги. 4– 5Нижер Рохалил хабар, рагӏабаздалъун гуребги, Илагьияб Рухӏалъул хӏалкӏолъиялдалъунги нужехъе щведал ва гьеб кинабго хӏакъаб-кьучӏаб бугелъул, нижеда лъала, вацал, Аллагьасе нуж рокьулеллъиги гьес нуж тӏаса рищун рукӏинги. Нужеда лъала нужее лъикӏлъиялъе ниж гьенир кин хӏалтӏаралали. 6Нижедаса ва Тӏадегӏанасдаса мисал босун хьвадана нуж. Гӏемер гӏазаб-гӏакъуба бихьаниги, Илагьияб Рухӏалдаса рохун къабул гьабуна нужеца нижер рагӏи. 7Нужгоги мисаллъун лъугьана Македониялда ва Ахаялда ругел киналго иман лъуразе. 8Македониялда ва Ахаялда гуребги, киса-кибего нужедасан тӏибитӏана Тӏадегӏанасул хӏакъалъулъ хабар, гьединго тӏибитӏана Аллагьасде нужер иманалъул хӏакъалъулъ хабарги. Гьединлъидал нужер рахъалъ лъиданиги щибниги бицине кколаро нижеца. 9Гӏадамаз жидецаго бицуна нижеда гьениб нужеца нижее гьабураб гьоболлъиялъулги, гьересиаллагьзабазул сураталги нахъе рехун, нуж Бичасде руссиналъулги, Чӏагояв ва Хӏакъав Аллагьасе гьабулеб нужер гӏибадаталъулги, 10хваралъуса вахъинавурав гьесул Вас, къиямасеб къоялъ Аллагьасул цциналдаса нилъ хвасар гьарулев Гӏиса вачӏиналъухъ нуж ралагьун чӏун рукӏиналъулги.
Copyright information for
AvaIBTNT