‏ 1 Timothy 3

Иман лъуразул агьлуялъул бутӏрулги кумекчагӏиги

1Гьале кьучӏаб калам: бетӏерлъи гьабизе ният-къасд ккей цӏакъ лъикӏаб иш буго. 2Иман лъуразе бетӏерлъи гьабизе ккола багьана-гӏайиб чӏвазе бакӏ гьечӏого гӏумру гьабулев, цо нухалъ гурони чӏужу ячинчӏев, сабруяв, цӏодорав, гӏадлу-тадбир бугев, гьалбал хирияв, насихӏат гьабизе бажарулев чияс. 3Гьев вукӏине бегьуларо гьекъолдухъан, вагъизе бокьулев чи. Вукӏине ккола хӏеренав, питна гьабуларев, гӏарцуда хадув лъугьунарев чи. 4Вукӏине ккола рукъалъул агьлуялъе гӏадлу гьабизе кӏолев, гӏинтӏамулел ва сундулъго хӏурмат-къадру бугел лъималазул эмен. 5Жиндирго рукъалъул гӏадамазе гӏадлу гьабизе кӏоларев чиясда Аллагьасде иман лъуразул агьлуялъул тӏалаб гьабизе кӏвеладай? 6Гьев вукӏине бегьуларо цӏидасан иман лъуразда гьоркьоса чи, – гьев цӏакъго чӏухӏила, ва илбисалъе гӏадинаб гӏазабги хӏакълъила гьесие. 7Нилъер агьлуялда гъорлъ гьечӏезда гьоркьобги лъикӏаб цӏар-рецц букӏине ккола гьесие гьабулеб, гьечӏони – гӏадамаз кӏалухъ вахъила ва илбисалъул къорикье ккела.

8Гьесул кумекчагӏиги рукӏине ккола къадру-къимат бугел, кьураб рагӏуе хисуларел, чагъир гӏемер гьекъоларел, хӏарамаб бечелъиялда хадур лъугьунарел, 9цебе балъгояблъун букӏун, гьанже нилъее загьирлъараб божи-иманалдаса кьуруларел ва намус бацӏцӏадал гӏадамал. 10Гьезулги цебеккунго хӏалбихьизе ккола, ва гьезул щибниги квешлъи бихьичӏони, хъулухъ гьабизе тезе бегьула.

11Гьезул лъудбиги рукӏине ккола адаб-хӏурматалъе мустахӏикъал, мацӏ гьабуларел, гьекъолдуларел, сундулъго божилъи гьабизе бегьулел. 12Гьел кумекчагӏиги рукӏине ккола цо нухалъ гурони чӏужу ячинчӏел ва лъималазеги рукъалъул гӏадамазеги гӏадлу кьезе лъалел. 13Жидеца хъулухъ лъикӏ гьабулеб бугилан гӏадамазда гьоркьоб къимат борхараз хӏинкъичӏого бицине бегьула Масихӏ Гӏисаде бугеб божи-иманалъул хӏакъалъулъ.

14Кватӏичӏого духъе вачӏине рес ккелилан дир хьул бугониги, хъвалел руго дица гьал насихӏатал, 15нагагь дун вачӏине кватӏани, нужеда лъан букӏине Аллагьас тӏаса бищараб агьлуялда, ай абадияв-даимав Аллагьасде иман лъуразул агьлуялда гьоркьор кин хьвада-чӏвадилелали. Гьеб ккола хӏакъабщиналъул хӏубиги сангарги. 16Лъилниги щаклъи ккезе бегьуларо нилъер божи-иманалъулъ кӏудияб балъголъи букӏиналда.

Дов вуго инсанасул чорхолъ Аллагьас жив загьир гьавурав,

Илагьияб Рухӏалъги жив ритӏухъ гьавурав,

Малаикзабаздаги жив вихьарав,

Халкъаздаги жиндир хӏакъалъулъ лъазабурав,

Дуниялалдаги жинда божарав,

Живги Аллагьасул къудраталдалъун зобалазде восун арав.
Copyright information for AvaIBTNT