1Ti 4 | AvaIBTNT | STEP | Илагьияб Рухӏалъ якъинго бицунеб буго ахираб заманаялда цо-цо гӏадамал божи-иманалдаса руссинилан. Гьел руссина гьерсал рицунел жундузде, гьел нахърилълъина шайтӏабаз малъаралда.

‏ 1 Timothy 4

Тимофейие гьарурал насихӏатал

1 Илагьияб Рухӏалъ якъинго бицунеб буго ахираб заманаялда цо-цо гӏадамал божи-иманалдаса руссинилан. Гьел руссина гьерсал рицунел жундузде, гьел нахърилълъина шайтӏабаз малъаралда. 2 Гьел къосинарила намусги яхӏги хӏатӏикь мерхьарал, ххвелал гьаризе гьунар бугел гьерсихъабаз. 3 Гьез лъудби рачине гьукъула, цо-цо нигӏматал кваназе изну кьоларо – хӏакъабщиналда божулел ва гьеб лъалел гӏадамаз баркала кьун кваназе Аллагьас гьел нигӏматал рижун ругониги. 4 Аллагьас бижанщинаб жо лъикӏаб буго, баркала кьун кваналеб щибго жо нахъчӏвазе бегьуларо. 5 Гьеб хӏалаллъизабула Аллагьасул каламалъги нилъер дугӏаялъги.

6 Диналъул вацазда гьедин малъани, мун вукӏина Масихӏ Гӏисае хъулухъ гьабулев лъикӏав чилъун. Божи-иманалъул рагӏабазулги мун нахъвилълъарал лъикӏал насихӏатазулги дуе пайда бахун букӏин бихьила. 7 Мун рикӏкӏад чӏа Аллагь рикӏкӏунарезул гьересиял ва херал руччабазул гӏадинал харбаздаса. Мунго ругьун гьаве хӏакъаб муъминлъиялъе. 8 Черх къвакӏизабиялъул пайда цо-цо мехалъ гурони букӏунаро, муъминлъиялъул пайдайин абуни кидаго букӏуна. Гьелъул пайда букӏина дуниялалдаги ахираталдаги. 9 Гьел руго нилъеца къабул гьаризе кколел хӏакъал рагӏаби. 10 Гьелъие гӏололъидал нилъ гъеж гурун хӏалтӏулел ругел, къеркьолел ругел, абадияв-даимав Аллагьасде хьулги лъун. Гьес хвасар гьаруна киналго гӏадамал, хасго иман лъуралал. 11 Гьаб кинабго ракӏалда чӏезабун амру гьабе ва малъе гьезда.

12 Гӏолохъанчи вугилан мунго гьез рикӏкӏинчӏого тезе чӏоге. Иман лъуразе мун мисаллъун вукӏа бицунеб рагӏулъги, гӏамал-хасияталъулъги, рокьиялъулъги, божи-иманалъулъги, вацӏцӏалъиялъул рахъалъги. 13 Дун гьениве вачӏинегӏан Тӏухьдул цӏалиялде, вагӏзабазде ва насихӏатазде машгъуллъе. 14 Аллагьасдасан рещтӏаралда рекъон, иман лъуразул агьлуялъул бутӏруз, дугӏаги гьабун, тӏад кверги лъун тӏамураб мехалъ, Аллагьасул амруялдалъун дуе насиблъараб гьунаралдаса пайда босичӏого чӏоге. 15 Гьеб кинабго тӏадчӏун ва ракӏ-ракӏалъго гьабе. Цинги киназдаго бихьила дур иш цебетӏолеб букӏин. 16 Дуца халккве дудаго хадубги дуца малъулелда хадубги. Гьеб ишалдаса кьурун гали тӏамуге, гьелдалъун дуца мунгоги духъ гӏенеккаралги хвасар гьарила.