‏ 1 Timothy 5

Къоролруччабазул хӏакъалъулъ насихӏатал

1Гӏумруялъ дудаса цӏикӏкӏарав чиясе хъачӏго бадибчӏвай гьабуге, инсудехун гӏадин кӏалъан малъе гьесда. Дудаса гӏолохъанал гӏадамаздаги вацазда гӏадин кӏалъай. 2Цӏикӏкӏарал руччабаздехун кӏалъай эбелалдехун гӏадин, гӏолохъаназдехун кӏалъай яцазда гӏадин, намусги вацӏцӏалъиги цӏунун.

3Хӏакъикъаталдаги кумекалде хӏажатал къоролруччабазул тӏалаб-агъаз гьабе. 4Къоролалъул лъимал яги лъималазул лъимал ругони, риччанте гьел ругьунлъизе божи-иман лъидасаго цебе жидерго рукъалъул агьлуялда бихьизабизе, эбел-инсул ва кӏудабазул тӏалаб-агъаз гьабизе. Гьеб буго Аллагь разилъулеб гӏамал. 5Кумекалде хӏажалъарай ва тӏалаб гьабизе чи гьечӏого хутӏарай къоролалъ, цохӏо Аллагьасде хьул лъун, къасиги къадги дугӏа гьабун, гьесдасан кумек гьарула. 6Амма жиндиего лазаталъе гӏоло гӏумру гьабулей йигей къоролай ккола чӏаго йикӏаго хварай гӏадан.

7Гьаб кинабго тӏубазабизе тӏаме дуца гьел, гьезул гӏумруялда гӏайиб чӏвангутӏизе. 8Гӏагарлъиялъул, хасго рукъалъул агьлуялъул тӏалаб-агъаз гьабуларев чи божи-иманалдаса ватӏалъула ва иман лъечӏездасаги квешлъула.

9Сияхӏалде росе лъабкъого сонги барал, цо нухалъ гурони росасеги инчӏел, къоролзаби. 10Гьел рукӏине ккола лъикӏал ишаздалъун машгьурлъарал, лъималазе тарбия кьурал, гьалбал рокьулел, диналъул вацазул хӏатӏал хӏурудаса чурулел, къварилъи ккарасе кумекалъе ратарал ва лъикӏалщинал ишал жидеца гьарулел рукӏарал руччаби.

11Гӏолохъанал къоролруччаби сияхӏалде росуге. Жидерго гьава бергьун Масихӏидаса рикӏкӏалъараб мехалъ, росабазе ине бокьула гьезие, 12ва гьезда тӏаде ккола росасе инарилан букӏараб къотӏи хвеялъул гӏайиб. 13Гьединго гьел ругьунлъула хӏалтӏичӏого чӏезе ва цо авалалдаса цогидалде хьвадизе. Кӏвахӏаллъарал гӏечӏого, гӏадамазда нахъасан гаргадизе ругьунлъула, чияр ишазде гьоркьоре лъугьуна, бицине рекъечӏебги бицуна. 14Гьединлъидал дица гӏолохъанал къоролруччабазе гӏакълу кьолеб буго росабазе айилан, лъимал гьарейилан, рукъалъул магӏишаталде руссайилан ва тушманзабаз квешаб цӏар чӏвазе рукӏунгейилан. 15Илбисалда нахърилълъун къосарал цо-цо къоролруччабиги ругелъулха.

16Диналъул яцалъул ругони къороллъун хутӏарал гӏагарал руччаби, биччанте гьезул тӏалаб-агъаз гьелъ гьабизе. Иман лъуразул агьлуялъе бигьалъила жалго цохӏо хутӏарал къоролруччабазе кумек гьабизе.

Иман лъуразул агьлуялъул бутӏрузул хӏакъалъулъ насихӏатал

17Иман лъуразул агьлуялъул ишал тӏуразарулезе, хасго вагӏза-насихӏаталъе хӏалтӏулезе, кӏиго бутӏаялъ цӏикӏкӏун кьезе ккела мухь. 18Тӏухьдузда хъван бугелъулха: «Лал бокъунеб бугеб оцол кӏалалда таргьа баге» ва «Хӏалтӏухъан мухь кьезе мустахӏикъав вуго», – ян. 19Иман лъуразул агьлуялъул бутӏрузда тӏасан бачӏараб гӏарза гӏадахъ босуге, гьеб битӏараб букӏин кӏиго яги лъабго нугӏас чӏезабичӏони. 20Мунагь гьабулел гӏадамалин абуни, тӏолабго агьлуялда цере къватӏир чӏвазаре, гьелъухъ балагьун цогидалги хӏинкъизе.

21Аллагьасда, Масихӏ Гӏисада ва тӏаса рищарал малаикзабазда цебе дица дуда лъазабулеб буго гьал насихӏатазда рекъон хьвадейилан, щивниги ватӏа гьавугейилан, лъиениги тӏокӏлъи гьабугейилан. 22Щивниги хъулухъалъе вачине тӏад квер лъезе гӏедегӏуге. Цогидал гӏадамаз мунагьалъукье кколеб иш гьабулеб бугони, мун гьелда гьоркьов гӏахьаллъуге. Мунго вацӏцӏадго цӏуне.

23Жибго лъим тӏокӏаб гьекъоге дуца, дагьа-дагьаб чагъир жубай, дур чехь унтараб бугелъул ва гӏемерисеб мехалъ мун лъикӏ гьечӏого вукӏунелъул.

24Цо-цо чиясул мунагьал гьанжего рихьулел руго ва Аллагьасул судалде гьесда цере-цере унел руго. Цогидаз жидерго мунагьал хадур рехъерхъулел руго. 25Гьединго лъикӏал ишалги: цоял гьанжего рихьулел руго, цогидал рихьулел гьечӏо, амма кингоги гьел лъачӏого хутӏуларо.