2Cor 12 | AvaIBTNT | STEP | Диего рецц-бакъ гьабизе кколеб буго – дие пайда гьечӏониги, гьанже бицинин Тӏадегӏанасдасан рукӏарал илгьамазулги церетӏамиязулги.

‏ 2 Corinthians 12

Павелие лъугьарал илгьамал ва церетӏамиял

1 Диего рецц-бакъ гьабизе кколеб буго – дие пайда гьечӏониги, гьанже бицинин Тӏадегӏанасдасан рукӏарал илгьамазулги церетӏамиязулги. 2 Дида лъала Масихӏиде цолъарав цо чи. Гьанжеялдаса анцӏила ункъо соналъ цеве лъабабилеб зодове восун ун вукӏана гьев. (Черхгун цадахъищ – дида лъаларо, гӏицӏго рухӏищ – гьебги лъаларо, Аллагьасда лъала.) 3 – 4 Дида лъала гьев чи алжаналъуве вачун ун вукӏаравлъи. (Черхгун цадахъищ – дида лъаларо, гӏицӏго рухӏищ – гьебги лъаларо, Аллагьасда лъала.) Гьениб гьесда рагӏана лъицаниги абичӏел ва инсанас абизеги бегьуларел рагӏаби. 5 Гьединав чиясда рекъараб буго живго веццизе, дида рекъараб гьечӏо, дирго загӏиплъи беццани гурони. 6 Дунго веццизе байбихьаниги, гӏантмахӏавлъун лъугьинаро дун, дица битӏараб бицунелъул. Дир хӏакъалъулъ рагӏарабги дилъ бихьарабги гурони гӏадамаз бицине бокьун гьечӏелъул, диего рецц-бакъ гьабиларо дица. 7 Диеги илгьамал лъугьанилан дун цӏакъго чӏухӏдарунгутӏизе, Аллагьас дир чорхолъ къазабун буго гӏазаб-гӏакъубаялъул заз. Гьеб ккола илбисалъул чапар. Чӏухӏдарунгутӏизелъун дун вухизе изну кьун буго Аллагьас гьев чапарасе. 8 Дица лъабцӏулго гьарана Тӏадегӏанасда, гьев тӏаса восейилан. 9 Амма Гьес абуна: «Дидасан бугеб баркатги гӏела дуе, загӏиплъиялъулълъидал дир къуват камиллъулеб». Гьединлъидал дагьабги цӏикӏкӏун беццила дица дирго загӏиплъи, Масихӏил къуват дилъго хутӏизе. 10 Масихӏие гӏоло загӏиплъизеги, инжит-хӏакъир гьавизеги, захӏмалъи баччизеги, хадурчӏун дир рахӏат хвезабулезул гӏазаб-гӏакъуба хӏехьезеги рази вуго дун, – загӏиплъараб мехалълъидалха дун къуватавлъун лъугьунев.

Павелица бицунеб буго коринфиязде бугеб рокьул

11 Гӏантмахӏав чияс гӏадинал жал рицунел руго дица. Нужеца рицинаруна дида гьел. Нужедани лъазе кколаан дун кинав чи вугевали. Дунго щивго гурев чи вугониги, гьел «чӏахӏиял чапарзабаздаса» сундалъунниги къадарав гьечӏо. 12 Нужее загьирлъун рукӏана хӏакъав чапар вукӏин лъазабулел жал: сундулъго сабру, мугӏжизатал, гӏаламатал ва Аллагьасдасан рещтӏараб къуватги. 13 Гӏарац кьейилан нужер гьодиде гьир бегизабичӏолъи гурони, иман лъуразул цогидал жамагӏатазе гьабуралдаса батӏияб мекъаб-тӏекъаб жо щиб дица нужее гьабураб? Гьеб рехсараб «гӏайиб» кканин, тӏасалъугьа дидаса!

14 Гьанже дида ракӏалда буго лъабабизеги нужехъе вачӏине. Гьебмехалдаги нужер гьодиде гьир бегизабиларо дица, нужераб гуро дие къваригӏун бугеб, нужго къваригӏун руго. Лъималаз гуро эбел-инсуе нахърател гьабизе кколеб, эбел-инсуца лъималазейин. 15 Дун рази вуго дир бугебщинабги нужее кьезе, дунгоги кьезе. Гьадигӏан цӏакъ дие нуж рокьулеб мехалъ, нужее дун дагьго вокьизе бегьилищ?

16 Нужедаго лъалагури, щибниги гьарун дица нужеда захӏмат баччизабичӏолъи. Амма цо-цояз абизе бегьула сихӏирго хӏалтӏун хӏиллаялъ кверде росанин дица нужилан. 17 Дица нужехъе ритӏаразул цоясдасангӏаги щибниги щварабищ дир бетӏербахъиялъе? 18 Дица Титида гьарана нужехъе айилан ва гьесда цадахъ цо вацги витӏана. Титица бегьарабищ нужер кисинибе квер? Цого Илагьияб Рухӏалъ малъухъе гурищ дунги гьевги хьвадулел ругел? Цого галаби гурищ нижеца тӏамулел ругел?

Кантӏиялде ахӏи

19 Гьаб кагъат цӏалулаго нужеца пикру гьабун батила нужеда цере нижго ритӏухъ гьаризе лъугьунел ругин нижилан. Аллагьасда цере Масихӏиде цолъун кӏалъалел руго ниж. Нужер гӏумру берцин гьабизе гӏоло буго, дир хириял, гьеб кинабго. 20 Дун хӏинкъун вуго, – нагагь дун гьениве вачӏани, дида ратизе бокьараб къагӏидаялда нужги ратиларин, нужеда ватизе бокьараб къагӏидаялда дунги ватиларин. Нужеда гьоркьоб дагӏба-къец, щакдари, ццин, хъантӏи, бугьтан, мацӏ, чӏухӏи-пахрулъи ва гъалмагъир батилин хӏинкъун вуго. 21 Гьанжеги нужехъе вачӏараб мехалъ нуж сабаблъун дир Аллагьас дун гӏодовегӏанлъизе гьавилиланги хӏинкъун вуго. Гьебмехалда нужер гӏемерисезда хадуб (хваразда хадуб гӏадин) магӏу гьабизе ккела дица. Гьел рукӏина адаб гьечӏолъи, пасалъи, хъахӏбалъи гӏадинал мунагьал гьаруниги, жал кантӏичӏел, гьел рехун течӏел гӏадамал.