2Cor 9 | AvaIBTNT | STEP | Аллагьасул халкъалъе кумек гьабизе кколеблъи дица хъвачӏониги бегьила.

‏ 2 Corinthians 9

1 Аллагьасул халкъалъе кумек гьабизе кколеблъи дица хъвачӏониги бегьила. 2 Нужер гъира-шавкъ букӏин лъайдал, македониязеги реццана дица нуж, гъоркьисаялдаса нахъего Ахая кумекалъе хӏадурго бугилан. Нужер гьеб гъира-шавкъалъ квербакъана гьезул гӏемерисезги чода цӏал кьабизе. 3 Гьеб мехалъ нуж хӏадурго рукӏина, дица цебеги бицун букӏана гьелъул хӏакъалъулъ. Гьеб ишалъулъ дица нуж реццун абурал рагӏаби гӏадада ккечӏого рукӏинелъун ритӏулел руго нужехъе гьал диналъул вацал. 4 Цинги, дида цадахъ македониял гьенире рачӏараб мехалъ, нуж хӏадурго ратичӏони, гьезда цере нуж сурарал гӏечӏого, нижги сурила, – ракӏчӏун нужеда божун рукӏиндалха. 5 Гьединлъидал дица хӏукму гьабуна гьал вацазда гьаризе, дидаса цере гьенире ун, нужеца рагӏи кьун букӏараб садакъа гьениб цебеккунго бакӏареян. Гьеб букӏина хӏалица бахъараб гуреб, ракӏ разилъун кьураб садакъа.

6 Кӏочон тоге: лъедерго хьон хьарасе лъедерго бижула, ризго хьарасе ризго бижула. 7 Щивас кьезе биччай гьесул ракӏалъ къабул гьабураб къадаралда. Бокьун гурони кьоге, кьун хадуб ракӏбухӏуге. Ракӏ разилъун кьолев чи вокьула Аллагьасе. 8 Аллагьасда кӏола нужее кинабго гьарзалъуледухъ ва садакъаде кьезеги тӏокӏлъуледухъ баркат рещтӏинабизе. 9 Тӏухьдузда хъван бугелъулха: «Мискиназе квергӏатӏидав вуго Аллагь, гьесул гьеб лъикӏлъи гӏадамазда абадиялъ кӏочон толаро», – ян.

10 Хуриб хьазе хьонги кваназе хинкӏ-чедги кьолес нужееги кьела къваригӏарабщинаб. Нужер лъикӏлъиялъул хурги цӏун бачӏина. 11 Кинабго рахъалъ бечелъила нуж, нужер сахаватлъиги цӏикӏкӏина. Нижедасан нуж ругьунлъараб сахаватлъи сабаблъун гӏемерал гӏадамаз Аллагьасе рецц гьабила. 12 Аллагьасе хирияб халкъалъе пайдаги кьела нужер садакъаялъ, гьелъухъ Аллагьасе гьабулеб реццги цӏикӏкӏина, цӏад бан хадуб гӏоразул, лъаразул лъим гӏадин. 13 Гьеб садакъаялъ бихьизабила нужер божи-иман щулалъун букӏин. Масихӏил хӏакъалъулъ Рохалил хабаралъе, – нужеца иман лъураб хабаралъе нужер мутӏигӏлъиялъухъги жидееги цогидазеги нужер квергӏатӏилъиялъухъги Аллагьасе рецц гьабила гьез. 14 Нужги рехсон, ракӏ-ракӏалъго гьари-дугӏа гьабила гьез, нужелъ Аллагьасул баркат цӏакъго цӏикӏкӏун букӏин лъан. 15 Бицун хӏалкӏоларебгӏан кӏудияб баркат нилъеде рещтӏинабулев Аллагьасе рецц!